Hatutan.com, (20 Marsu 2025), Díli-Primeiru Ministru (PM), Kay Rala Xanana Gusmão, hateten misaun loloos  saúde sira-nian atu serbí povu (pasiente) la’ós servisu atu hetan de’it osan.

Lee Mós: Governu Sei Halo Estudu Ida Kle’an Kona-bá Rejime iha Saúde

Pesoál saúde halo tratamentu saúde bá populasaun iha Suku Asulau, Sare, Munisípiu Ermera. Foto/Dok

“Iha servisu rua ne’ebé, la’ós servisu atu hetan osan, edukasaun ho saúde sira-nia servisu ne’e misaun, profesór sira hanorin labarik sira atu sai matenek, atu serbí rai ida-ne’e, pesoál saúde sira atu kura ema husi moras, tanba Timor-Leste iha tinan hira mai tenke saudavel no edukadu,”   Primeiru Ministru Kay Rala Xanana Gusmão hateten ba Jornalista sira hafoin enkontru semanál ho Prezidente Repúblika (PR) iha Palásiu Prezidensiál, Díli, Kinta (20/03/2025).

Konsellu Ministru, kuarta ne’e mós aprova ona medida atu kontrola didi’ak pesoál saúde ka médiku sira  ida ne’ebe mak fó reseita ne’e, atu fó ai-moruk saida. Tanba dala ruma ko’alia mate atus ida ona ka mate rihun ida ona, agora Governu nia misaun ne’e buka hatene mate tanba saida. Katak karik la’ós de’it tanba moras falta hahán, mas dalaruma kona-bá buat ida tratamentu ne’e bele ladi’ak. 

“Medida ne’ebé Konsellu Ministru hasa’e kona-bá reseita ne’e, atu haree see doutór ida ne’e nia servisu iha klínika ida ne’ebá nia fó reseita ai-moruk ba de’it ema ida mak nunka mais kura ne’e, ita haree took tanbasá. doutór ida-ne’e iha fali klínika ida seluk, nia fó mós ai-moruk hanesan mais ita haree mós dehan katak, la’ós moras ida ne’ebá ai-moruk kura. Entaun doutór ida ne’e ladún halo análize didi’ak karik, iha ne’e mak ita bele kurize  mentalidade. Tanba ita bele matenek to’o iha ne’ebé, mais mentalidade ladún di’ak, ita hakarak simu de’it osan,” PM Xanana esplika.

Primeiru Ministru hatuir tan katak, desentralizasaun ne’e importante, importante hodi  haree sistema ne ‘e la’o oinsá hanorin malu fó servidór Estadu ne’e sira-nia misaun boot atu serbí povu.

Jornalista: Tome da Silva