Hatutan.com, (02 Abríl 2025), Díli- IX Governu Konstitusionál ne’ebé Xanana Gusmão mak lidera kontínua suspende atividade arte-marsiál to’o loron 31 fulan-Dezembru 2025.

Lee Mós: Governu Kontínua Suspende Atividade Prátika Arte-Marsiál bá Fulan-6 Tan

Organizasaun Arte Marsiál (OAM) hamutuk 18 halo deklarasaun hodi harii dame no promete sei luta ba prevensaun konflitu ho violénsia iha komunidade, durante kampaña to’o eleisaun Parlamentár, iha Gimnáziu Díli, Kinta, 13 fulan-Abríl 2023. Foto/Dok.Elio dos Santos da Costa.

Liuhusi rezolusaun Governu ne’ebé aprova iha reuniaun Konsellu Ministru, Kuarta (02/04/2025), halo suspensaun bá ensinu aprendizajen no prátika arte-Marsiál no enseramentu temporáriu bá fatin no instalasaun hotuhotu ne’ebé destinadu bá ensinu aprendizajen no prátika arte-Marsiál

Komunikadu imprensa ne’ebé Hatutan.com asesu husi Gabinete Prezidénsia Konsellu Ministru revela  medida ida-ne’e tuir Rezolusaun Governu nian No. 45/2023, loron 10 fulan-Novembru nian, ne’ebé mak prolonga ona hosi Rezolusaun sira Governu nian ho razaun sira ne’ebé mak lori bá suspensaun hosi ensinu, aprendizajen no prátika arte-marsiál sira, no mós taka espasu sira respetivu, mantein nafatin.

Medida ne’e konsidera nafatin hanesan nesesáriu hodi konsolida dame sosiál ne’ebé hetan ona dezde fulan-Novembru 2023 no hodi garante katak, iha futuru prátika arte-marsiál sira nian akontese eskluzivamente iha ámbitu desportivu, hodi promove valór sira disiplina nian, sivilizasaun no edukasaun umanístika entre joven sira.

Iha sentidu ida-ne’e, estensaun hosi suspensaun no enserramentu temporáriu hosi instalasaun sira ne’ebé asosiadu ho atividade sira-ne’e justifikadu.

Iha biban ne’e, Konsellu Ministru mós aprova projetu Rezolusaun Governu, ne’ebé aprezenta hulosi Primeiru-Ministru, kona-bá modelu Administrasaun Espesiál Rejiaun Administrativa Espesiál Oé-Cusse Ambeno (RAEOA).

Ho Rezolusaun Governu ne’e objetivu mak organiza, iha konsulta ho populasaun lokál enklave Oe-Cusse Ambeno, modelu administrasaun foun ida bá Autoridade rejiaun nian, nune’e mós modelu zona ekonómika espesiál, ne’ebé konstitusionalmente prevee bá rejiaun ne’e.

Iha intensaun mós atu konsulta ho dirijente administrativu sira, autoridade lokál sira no sosiedade Oe-Cusse Ambeno, kona-bá eskolla no dezignasaun, entre sira, kona-bá sé mak sei bele ezerse mandatu administrativu sira rejiaun nian, iha Autoridade no iha zona ekonómika espesiál.

Jornalista: Elio dos Santos da Costa