Hatutan.com, (22 Abríl 2025), Díli- Gabinete Imprensa Santa Sé fó sai ona informasaun sira kona-ba Primeira Kongregasaun Jerál ne’ebé hala’o iha Tersa (22/04/2025), ne’ebé dura oras ida ho balun, hahú hosi tuku 09:00 dadeer to’o tuku 10:30 dadeer oras lokál iha Roma.

Lee Mós: Sarani Katóliku Timor-Leste Realiza Selebrasaun Eukaristia Ba Maktoban Papa Francisco

Imajen dahuluk hosi Santu Padre ne’ebé toba iha estadu iha Casa Santa Marta. Foto/Mídia Vatikanu

Sita husi publikasaun Vaticano News katak iha Primeira Kongregasaun Jerál ne’e, Kardeál hamutuk na’in-60 resin marka prezensa iha Salaun Sínodu Foun iha Vatikanu, ne’ebé hahú ho momentu ida orasaun nian ba Papa Francisco.

Kardeál sira jura atu kumpre ho laran-metin norma sira Konstituisaun Apostólika nian “Universi Dominici Gregis” kona-bá vaga Sé Apostólika no eleisaun Pontífise Romanu nian, no hananu “Adsumus”. Lee tiha parágrafu 12 no 13 Konstituisaun Apostólika no kardeál Farrel, Camerlengo husi Santa Igreja Romana, lee Testamentu espirituál Papa Francisco nian, ne’ebé fó sai horikalan.

Iha ámbitu Kongregasaun nian, deside ona data ba transferénsia Urna (mate-isin) Amu-Papa Francisco nian hosi Kapela Casa Santa Marta ba Bazílika S. Pedro nian, ne’ebé sei iha Kuarta, 23 Abril, tuku 09:00 dadeer oras lokál.

“Desizaun seluk ne’ebé halo maka loron funerál: Sábadu, 26 Abril, tuku 10:00 dadeer oras Itália nian.” Hatutan.com sita nota imprensa ne’ebé publika husi Vaticano News.

Iha Kongregasaun Jerál ne’ebé hala’o ohin dadeer, Koléjiu Kardeál sira-nian deside atu suspende selebrasaun beatifikasaun ne’ebé marka ona, hodi hein desizaun husi Pontífise Romanu foun.

Imajen dahuluk hosi Santu Padre ne’ebé toba iha estadu iha Casa Santa Marta. Foto/Mídia Vatikanu

Kardeál na’in tolu dahuluk hosi Komisaun ne’ebé tulun Camerlengo iha desizaun ordináriu sira hetan sorteiu: Pietro Parolin, Stanisław Ryłko no Fabio Baggio, ida ba orden ida-idak ne’ebé halo parte iha Koléjiu, ida hosi bispu sira, amlulik sira no diákonu sira. Kardeál sira husi Komisaun ida-ne’e halo sorteiu kada loron 3.

Kongregasaun Jerál Daruak sei hala’o iha loraik loron-kuarta, 23 Abril, tuku 5:00 lokraik, tanba iha dadeer kardeál sira sei partisipa iha transladasaun.

Misa iha Domingu, 27 Abril, iha Prasa S. Pedro, sei prezide husi Sekretáriu Estadu, Kardeál Pietro Parolin, no sei sai nu’udar daruak husi Novendiál sira. Misa novendiál sira sei selebra loron-loron iha tuku 5 lokraik.

Jornalista: Elio dos Santos da Costa