Hatutan.com, (04 Juñu 2025), Díli-XI Governu Konstitusionál liuhusi reuniaun Konsellu Ministru, Kuarta (04/06/2025), iha Palásiu Governu, aprova ona proposta husi Federasaun Futebol Timor-Leste (FFTL) ne’ebe atu halo reabilitasaun ba Estádiu Munisipál Díli no halo tán konstrusaun foun ba Estádiu ho kampu futsal indoor tuir padraun internasionál iha Tasi-tolu, Díli.

Lee Mós: Nilton Gusmão Eleitu ba Prezidente FFTL Bá Restante Mandatu 2022-2026

Dezeñu futuru Estádiu Munisipál Díli. Foto/FFTL

Komunikadu impresa ne’ebé Hatutan.com asesu haktuir proposta ne’e, hetan aprovasaun hafoin Prezidente FFTL, Nilton Telmo Gusmão dos Santos, Sekretáriu Jerál FFTL, Sr. José Adilson Ribeiro ho ekipa aprezenta iha reuniaun Konsellu Ministru, ne’ebe lidera direita husi Primeiru-Ministru, Kay Xanana Gusmão.

Komunikadu imprensa ne’e mensiona presiza halo reabilitasaun ba Estádiu Munisipál Díli, tanba estádiu ikónika ne’ebé kleur ona sai sentru ba atividade futeból nasionál, nune’e presiza atualizasaun tuir rekizitu sira iha padraun FIFA/AFC nian ba kompetisaun nasionál no internasionál sira.

Presiza halo mós konstrusaun estádiu foun ida iha Tasi-tolu, ne’ebé dezeña nu’udár instalasaun modernu ho padraun internasionál, hodi apoia kreximentu desportu nian, formasaun, no nu’udar uma-na’in ba torneiu rejionál no internasionál sira iha futuru.

Prezidente FFTL, Nilton Gusmão mós informa, inisiativa ne’e la’ós de’it fó apoiu ba dezenvolvimentu futeból iha Timor-Leste, maibé parte ida nu’udár orgullu nasionál, dezemvolvimentu desportu, turizmu ne’ebe bele kria mós impaktu sosiu-ekonómiku, kria empregu, no hametin papél desportu nu’udár instrumentu ida hodi halibur ema-hotu.

Desizaun ne’e marka kompromisu governu nian hodi koloka desportu nu’udár parte integrante ba dezenvolvimentu nasionál, liu-liu hodi prepara jerasaun foun no hasa’e Timor-Leste nia prezensa iha palku futeból internasionál.

“Ha’u bele iha de’it tinan ida atu lidera FFTL, maibé ha’u determinadu atu halo ida-ne’e sai estraórdináriu,” CEO grupu empreza Esperança Timor Oan (ETO), Nilton Telmo Gusmão dos Santos afirma.

Konstrusaun ba estádiu rua ne’e, tuir planu sei hahú iha tinan 2025, ho kompletasaun ne’ebé hein iha tinan 2026. Projetu ne’e sei implementa iha ámbitu Parseria Públiku-Privadu (PPP) entre FFTL ho Governu Timor-Leste liuhusi Ministériu Planeamentu Investimentu Estratéjiku (MPIE).

Reabilitasaun ba Estádiu Munisipál Díli, ne’ebe atu aumenta tribuna parte leste ho 2.000 bankadas, no konstrusaun ba Estádiu foun ho kapasidade 15.300 lugares.

Rezultadu aprovasaun ba proposta ne’e, Prezidente FFTL, Sr. Nilton T. Gusmão dos Santos, lori FFTL nia naran, hato’o apresiasaun no agradesimentu kle’an ba Primeiru-Ministru Xanana Gusmão no membrus IX Governu Konstitusionál tomak, tanba aprova ona proposta FFTL nian kona-ba reabilitasaun Estádiu Munisipál Díli no konstrusaun estádiu no futsal indoor foun ida iha Tasi-tolu.

Aprovasaun ba proposta FFTL. Nian ne’e eflete kompromisu maka’as Governu nian hodi apoia progresu futebol nasionál no dezenvolvimentu infraestrutura desportiva ne’ebé dignu ba povu Timor-Leste tomak.

 Ida ne’e hanesan pasu istóriku ida ne’ebé sei la hametin de’it fundasaun desportu nian, maibé mós sei lori esperansa no entuziazmu foun ba jerasaun foun no sosiedade hadomi-na’in futeból sira hotu.

Jornalista: Zita Menezes