Hatutan.com, (09 Juñu 2025), Díli – Cindinha Hayley Belo Monemnasi, estudante Timor-oan ida ne’ebé hala’o hela estudu iha De La Salle University-Dasmariñas (DLSU-D, sigla inglés),  Filipina, lidera ekipa husi universidade refere hodi partisipa interkambiu ba Jestaun Sustentável (Green Stewardship) ne’ebé foku liubá área Prezerva Biodiversidade no Dezenvolvimentu Sustentável avansu iha Brunei Darussalam.

Cindinha Hayley Belo Monemnasi, estudante Timor-oan lidera ekipa husi De La Salle University-Dasmariñas (DLSU-D) iha Filipina paritispa interkambiu iha Brunei Darussalam. Foto/Espesiál

Ekipa reprezentante husi Universidade DLSU-D husi Filipina lidera husi  Cindinha Hayley Belo Monemnasi nu’udár prezidente asosiasaun no nia Vise Angeline Travasso hamutuk ho delegasaun ba husi universidade DLSU-D hahú programa interkámbiu ba estudante sira ne’e iha Brunei Darussalam durante semana rua ne’ebé enrikese iha Universidade Brunei Darussalam (UBD, sigla Inglés).

Cindinha Hayley Belo Monemnasi, hahú nia estudu iha De La Salle University-Dasmariñas (DLSU-D) iha Filipina  iha tinan  2023  iha fakuldade Biodiversidade Medicine.

Iha tinan kotuk, Cindinha Hayley Belo Monemnasi nomeia hanesan prezidente Asosiasaun Estudante Internasionál iha De La Salle University-Dasmariñas (DLSU-D).

Partisipante sira mai husi Fakuldade Arte Liberál no Komunikasaun (CLAC, sigla Inglés), Fakuldade Jestaun Turizmu no Ospitalidade (CTHM,), no Fakuldade Siénsia (COS), estudante sira-ne’e sei aprofunda sira nia koñesimentu iha programa vital sira ne’ebé foka ba Jestaun Sustentável (Green Stewardship) Prezerva Biodiversidade no Avansa Dezenvolvimentu Sustentável.

Informasaun ne’ebé Hatutan.com asesu husi portal ofisiál Office of the Vice President for Global Engagement & External Relations, Segunda (09/06/2025), revela katak oportunidade inestimavel (folin boot) ida-ne’e promovidu husi rede Universitáriu ASEAN (AUN) no Universiti Brunei Darussalam, hodi destaka kompromisu rejionál ida ne’ebé maka’as ba sustentabilidade ambientál.

Atividade interkambiu iha Brunei Darussalam. Foto/Espesiál

Programa ne’e sai asesivel liután, tanba ida-ne’e maka bolsa estudu ne’ebé fornese ho laran-luak hosi UBD, ne’ebé kobre estudante sira-nia hela-fatin, hahán, no transporte lokál durante sira-nia estadia.

Fasilitasaun ba programa ida-ne’e jere hosi Gabinete Ligasaun no Bolsa Estudu iha DLSU-D husi Gabinete Vise-Prezidente ba Envolvimentu Globál no Relasaun Esterna (OVPGEER). Eskritóriu ida-ne’e serbisu beibeik atu lori oportunidade esterna oioin ne’ebé enrikese kreximentu akadémiku no pesoál estudante DLSU-D nian.

Serimónia despedida signifikativu ne’e hetan partisipasaun ofisiál husi lideransa sira universidade nian, inan-aman sira ne’ebé orgullu, no estudante sira ne’ebé simu subsídiu rasik.

Marka prezensa iha asinatura maka George Francisco, Vise Prezidente ba Envolvimentu Globál no Relasaun Esterna sira, Nor Cachuela, Edwin Lineses, no Paul Notorio, Grace Mejia; hamutuk ho inan-aman sira hosi partisipante estudante sira no estudante sira ne’ebé hetan subsídiu.

Programa interkámbiu ida-ne’e subliña kompromisu DLSU-D nian atu haburas sidadania globál, konxiénsia ambientál, no kolaborasaun akadémika, hodi prepara ninia estudante sira atu sai kontribuinte ativu ba futuru sustentável ida.

Jornalista: Zita Menezes