Hatutan.com, (27 Juñu 2025), Díli-Ministru Administrasaun Estatál (MAE),  Tomas do Rosário Cabral, informa nomeasaun bá Prezidente Autoridade Munisípiu (PAM) Díli sei hein rezultadu auditória.

Lee Mós: Irregularidade Administrativu no Finansas, Baze ba Gregório Rezigna An hosi PAM Díli

Ministru Admistrasaun Estatal (MAE) Tomas do Rosário Cabral. Foto/Dok.

“Auditória  seidauk hotu, rezultadu kuandu auditória remata ona, ita foin nemoeia, selae ida foun bá ida tuan husik hela problema foun bá orsida duun malu ladún di’ak,” Ministru MAE Tomas Cabral bá Jornalista sira iha CCD, Sesta (27/06/2025).

Ministru Tomas Cabral esplika tuir lei rezultadu auditória tenke submete bá Primeiru-Ministru, tanba sé maka nomeia sé maka ezonera ne’e Primeiru-Ministru, ne’ebé autoridade Munisipál sira ne’e tutela direitamente bá Primeiru-Ministru.

Nia hatutan, presiza auditória atu PAM foun iha  karik, buat hotu la’o tuir norma ne’ebé maka iha. Nune’e, inspektor MAE sei halo auditória no sira sei haree hela liuliu bá ezekusaun Orsamentu Jeral Estadu, rekursu umanu no implementasaun atividade iha teritóriu Munisípiu Díli nian.

MAE husu tenke haree auditória ne’e imparsiál, baze bá auditória ne’e maka sei submete lista no rezultadu auditória bá Primeiru-Ministru.

Eis-Prezidente Autoridade Munisípiu Díli, Gregório Saldanha “Mouris”, submete nia rezignasaun ofisial  iha  Tersa,  28 fulan-Janeiru 2025. Nune’e, ohin loron, seidauk iha PAM foun tanba sei hein rezultadu auditoria.

Jornalista : Zita Menezes