Hatutan.com, (30 Juñu 2025), Díli—Tribunál Julgamentu Rejionál Manila-Filipina  adia julgamentu ba kazu omisídiu ne’ebé komete ba eis-reprezentante Negros Oriental Arnolfo “Arnie”  Teves Jr ba loron 14 fulan-Jullu 2025.

Lee Mós: PN La Aprova Rezolusaun Atu Loke Investigasaun Bá Prosesu Arnolfo Teves Jr Mai Timor-Leste

Autoridade Timor-Leste halo deportasaun ba Fujitivu Arnolfo Teves Jr iha Aeroportu Internasionál Prezidente Nicolau Lobato, Díli, 29 Maiu 2025. Foto/dok

Tuir Atty. Ferdinand Topacio, advogadu ne’ebé fó asisténsia legal ba Arnolfo Teves Jr, Segunda (30/06/2025), informa  GMA News Online katak sira-nia parte submete ona mosaun ida atu adia audiénsia iha Tribunál Julgamentu Rejionál Manila nian iha Sukursál 12 iha semana kotuk tanba Teves nia appendectomy.

“Sujeitu hosi akuzasaun la iha kondisaun fíziku atu tuir audiénsia pesoalmente,” Ferdinand Topacio hateten.

Tuir Topacio, Teves bele alta ohin ka Tersa dadeer (01/07/2025), tanba sei sente moras uitoan. Teves Jr, fujitivu  INTERPOL nian ne’ebé halai mai subar iha Timor-Leste dezde 2023-2025, hasoru hela kazu omisídiu, omisídiu frustradu, no tentativa omisídiu tanba alegasaun omisídiu ba Governadór Orientál Negros Roel Degamo no ema na’in 10 seluk iha 2023.

Aleinde ida-ne’e, nia hasoru kazu pose ilegál ida ba kilat no esplozivu sira iha tribunál Manila nian. Teves Jr rekuza ona atu hatama deklarasaun ida iha nia kazu sira, ne’ebé halo tribunál oioin iha Manila hatama deklarasaun la kulpa nian ba nia.

Konsellu Anti-Terrorizmu dezigna ona Teves Jr no ema seluk hanesan terrorista, hodi fó ezemplu ba alegasaun omisídiu no asédiu oioin iha Negros Orientál.

Jornalista: Marcelino Tomae