Hatutan.com,  (11 Jullu 2025), Díli– Governu Timor-Leste submete ona karta ba Governu Myanmar tuir pedidu Myanmar nian ho intensaun atu haforsa kooperasaun bilateral entre nasaun rua.

Lee Mós: Timor-Leste Nia Adezaun Formal Ba ASEAN Marka Ona Ba Loron 26 fulan-Outubru 2025

Bandeira Myanmar ho Timor-Leste/ Foto/MNEK

Iha komunikadu ne’ebé Hatutan.com asesu husi Gabinete Média Ministériu Negósiu Estranjeiru no Kooperasaun (MNEK), Sesta (11/07/2025),  informa karta ne’e entrega husi Embaixadór Timor-Leste nian ba Malázia, Lisualdo Gaspar ba reprezentante Governu Myanmar, Sekretáriu Permanente Ministériu Negósiu Estranjeiru Myanmar, Aung Kyaw Moe, iha marjen Enkontru Ministeriál ASEAN ba dala 58 iha Sentru Konvensaun Kuala Lumpur Malázia.

Minitru Negósiu Estranjeiru no Kooperasaun (MNEK), Bendito dos Santos Freitas konfirma, karta ne’e entrega ona ba reprezentante Governu Myanmar nian iha Malázia bazeia ba pedidu ne’ebé husi Governu Myanmar.

“Ohin, ita aprezenta ona karta tuir pedidu ne’ebé sira husu liu husi ita-nia Embaixadór ne’ebé baze iha Kuala Lumpur Malázia, karta ne’ebé ita halo, ita mós ba Ministru Prezidénsia Konsellu Ministrus, Agio Pereira ami haree iha entendimentu hamutuk mak karta ne’e hasai. Konteudu karta ne’e ami seidauk bele dehan, tanba ne’e to’o ba karik sira fó resposta,” hatete Ministru Bendito dos Santos Freitas.

Governante ne’e haktuir, iha karta ne’e, Governu Timor-Leste esplika kona-ba ka’er prinsípius no valores hanesan respeita direitus umanus, estadu direitu demokrátiku no seluk tan.

“Timor-Leste esplika mós iha karta ne’e katak, ka’er nafatin ba prnsípiu ida-ne’ebé ita sempre mai husi luta ida naruk hodi defende valores justisa, demokrasia no direitus umanus, tanba ne’e ita hato’o nafatin ita-nia pozisaun ba asuntu ne’e,” Ministru Bendito Freitas hateten.

Konteudu kompletu husi dokumentu ne’e seidauk bele fó-sai ba públiku, tanba konfidensiál, tanba foin entrega no hein resposta husi Governu Myanmar.

Jornalista: Marcelino Tomae