Hatutan.com, (29 Jullu 2025), Díli–Polísia Nasionál Timor-Leste (PNTL) detein inan-aman ne’ebe sira-nia oan mane fó isin rua ba nia namorada ho inisiál S.

Polísia detein inan-aman ne’ebé nia oan fó isin-rua ba S. Foto/Juvinal Cabral dos Santos

Suspeitu na’in-rua hanesan aman-inan ba oan mane ho inisiál P fó isin-rua ba S ne’ebé daudaun ne’e tama ona ba fulan-hitu (7), maibé  la iha inisiativa husi  P atu bele responsabiliza bá S ho bebe ne’ebé iha hela knotak.  

Polísia detein inan-aman P nian ne’e iha sela detensaun Polísia Eskuadra Dom Aleixo tanba envolve iha insidente ne’ebé kuaze atu hakotu S nia inan nia vida, Segunda-kalan (28/07/2025).

“Iha kazu insidente ida akontese iha área Dj Plaza Becora nian. Kazu ne’e mosu tanba entre mane no feto hola malu, mane fó tiha isin-rua ba feto kuaze fulan-hitu (7) mas kazu ne’e la rezolve. Depois inan-aman  sira buka malu atu rezolve la konsege, entaun inan-aman hasoru malu iha loja Dj Plaza sira husu malu to’o hamosu insidente,” Komandante PNTL Munisípiu Dili, Superintendente Xefe Polísia Orlando Gomes, informa ba jornalista sira iha Eskuadra Polísia Dom Aleixo, Díli,  Tersa (29/07/2025).

Nia kronolojia ne’ebé Polísia rekolla katak mane nia inan-aman kompras iha loja Dj Plaza Becora no  momentu ne’ebá husi labarik feto nia inan mós mai hasoru-malu iha fatin ne’ebá no labarik feto isin-rua ne’e nia inan husu labarik mane nia inan-aman kona-ba kazu ne’e bainhira mak rezolve tanba sira-nai oan  fó isin rua ba nia oan feto..

Momentu ne’ebá husi labarik mane nia inan-aman loke hela odamatan karreta nian, depois mak labarik feto nia inan ba husu no nia liman kaer hela karreta besik odamatan, depois mane nia inan taka odamatan habit lezada nia liman iha karreta mak  nia katuas oan halai rasta lezada kuaze metru 50 hodi  rezulta lezada nia ain no liman kanek nakles hotu.

Ho insidente ne’e, Polísia to’o kedas fatin akontesimentu no halo intervensaun hodi  lori vitima ba halo tratamentu iha  klinika Becora. Nune’e, Polísia foti kedas labarik mane nia inan-aman  hanesan suspeitu lori ba iha eskuadra Kristu Rei halo identifikasaun prosesu detein oras 72 nia laran.

“Ita haree kazu ne’e grave tebes tanba ne’e agora dadauk prosesu hela pois ita aprezenta ba iha Ministériu Públiku, agora ita detein ona suspeitu na’in-rua, fen-la

en, iha ona sela detensaun eskuadra Dom Aleixo,” Komandante Polísia Munisípiu Díli,  Superintendente Xefe Polísia Orlando Gomes hateten.

Polísia mós bolu joven feto ne’e namoradu inisial RP no feto inisial S, ne’ebé ho kondisaun isin-rua todan tanba bebé iha kanotak fulan-hitu ona.

Jornalista: Juvinal Cabral dos Santos