Hatutan.com, (13 Agostu 2025), Ainaro– Jestór turizmu Rabilau-Maubisse, Joaquim Coutinho, husu Governu atu fasilita hela bee-moos bá fatin turizmu Rabilau tanba durante ne’e turizmu rabilau susar atu asesu bá bee-moos hodi atende bá vizitante sira.

Atividade kultura iha fatin turizmu Rabilau-Maubisse, Ainaro. Foto/Zita Menezes

“Iha ne’e buat ne’ebé sei susar liu maka, bee-moos, entaun iha oportunidade ne’e hakarak husu bá Ministériu Turizmu no Ministériu obra públiku (MOP)  no Bee Timor-Leste, Empreza Publika   (BTL,E.P) sé bele karik fasilita hela bee-moos bá  turizmu rabilau dada hela bee-moos mai atu nune’e ita bele fasilita ita nian vizitante sira hotu,” jestór Joaquim Coutinho bá jornalista sira iha Rabilau, Kuarta (13/08/2025).

Jestór Turizmu Rabilau Maubisse ne’e dehan, kona-bá kondisaun estrada di’ak daudaun ona tanba daudaun ne’e kompañia sira hadi’a hela.

Nune’e haris-fatin iha fatin turizmu rabilau daudaun ne’e hamutuk  neen,  tolu kria husi  VIII Governu no tolu kria husi IX Governu, haris-fatin sira funsiona hotu maibé bee-moos maka susar.

Tuir nia durante  ne’e maioria  vizitante sira ne’e mai husi turista lokál, maibé la taka dalan mós katak kada semana, kada fulan turista sira ne’ebé maka halo viajen mai husi rai liur mós barak maka halo vizita iha fatin turizmu rabilau.

“Tuir dadus ne’ebé ami iha  fulan kotuk liubá ne’e turista ne’ebé vizita fatin turizmu Rabilau barak liu ne’e maka turista sira husi nasaun Australia sira purvolta 8000-itál maka vizita ona fatin ida-ne’e,” nia tenik.

Tuir fali maka turista husi Indonézia, no Reinu Unidu  no mós barak liu husi nasaun Europa ne’ebé mai halo vizita fatin ida-ne’e kada semana no kada fulan, no simu diretamente husi lia na’in no kultura Maubisse nian.

Nune’e iha fatin turizmu rabilau fasilita mós fatin deskansa bá turista kada kalan $25.00  sira inklui mós fasilidade sira seluk.

Iha fatin hanesan turista husi Reinu Unidu, Lucy  Mannios ne’ebé halo vizita bá fatin turizmu Rabilau  hateten nia senti  kontenti loos ho fatin turizmu rabilau nomós ho Timor-Leste nian kulutra ne’ebé unikú tebes.

“Ha’u sente envolve loos iha ita-boot sira nian kultura no ha’u sente unikú loos no furak nune’e, ha’u agradese bá ema hotu iha fatin turizmu rabilau,” hateten Lucy  Mannios bá jornalista iha fatin turizmu Rabilau.

Jornalista : Zita Menezes