Hatuan.com, (18 Agostu 2025), Díli—Kompañia internasionál husi Indonézia PT Aulia Multi Sarana la utiliza ona patrimóniu Estadu Timor-Leste nian ne’ebé harii iha resintu projetu konstrusaun edifísiu sentrál Rádiu Televizaun Timor-Leste, Empreza Publiku (RTTL,E.P).

Lee Mós: Projetu Konstrusaun Edifísiu Sentral RTTL,E.P, MOP Konfirma Soil Test Uluk NIPPON KOIE Halo Laiha Dúvida no Di’ak

Projetu konstrusaun edifisiu sentral RTTL,E.P paradu no PT Aulia Multi Sarana sobu ona fasilidade patriomiu estadu nian ne’ebé durante ne’e sira utiliza hanesan armazen ho eskritóriu administrativu. Foto/suplly

Dezde semana rua liubá PT Aulia Multi Sarana haloot sira-nia ekipamentu pezadu sira lori sai ona husi terrenu projetu konstrusaun edifísiu sentrál RTTL,E.P, inklui sobu hotu ona materiál sira patrimóniu Estadu Timor-Leste nian ne’ebé sira foti hodi harii edifísiu administrasaun provizóriu no harii mós armazén ba tau material sira servisu projetu nian.  

Dezde projetu konstrusaun edifísiu sentrál foun RTTL,E.P lansa husi Primeiru-Ministru (PM), Kay Rala Xanana Gusmão,  iha loron 19 fulan-Dezembru 2024, empreza PT Aulia Multi Sarana utiliza  uma  RTTL,E.P nian hodi halo eskritóriu, utiliza  mós cobby house  RTTL,E.P nian  ida no PT Aulia Multi Sarana harii uma provizóriu ida ba tékniku sira empreza nian utiliza fasilidade ka kalén uzadu RTTL,E.P nian ne’ebé hola parte ba Patrimóniu Estadu nian.

Observasaun  Hatutan.com iha terrenu projetu konstrusaun edifísiu sentrál RTTL,E.P hatudu katak sasán sira ne’ebé  empreza PT Aulia Multi Sarana estabelese ka harii durante ne’e sobu tetu hotu ona no servisu iha terrenu mós paradu ka la hatudu progresu, inklui material sira ho forsa traballu sira la iha ona.

Iha  Segunda dadeer (18/08/2025), hale’u tuku 08:30  Otl, Hatutan.com  hakat bá lokál konstrusaun edifísiu Sentrál foun RTTL,E.P hodi halo konfirmasaun ho kompañia PT Aulia Multi Sarana kona-bá  projetu ne’ebé deskonfia  paradu fulan ida ona, maibé pesoal seguransa iha lokál konstrusaun la autoriza ho rajaun kompañia bandu la bele foti imajen ka video iha projetu refere.

“Deskulpa la’ós ami maka lakohi, maibé, patraun orienta ami atu la bele loke odamatan bá ita-boot sira, bainhira ita-boot sira, atu mai foti imajen ruma, tanba natoon  ita-boot foti ne’e patraun  sira kompañia PT Aulia Multi Sarana hirus ami. Di’ak liu ita-boot bá husu UNDP ho RTTL,E.P tanba sira maka hatene,”  pesoál seguransa lia tun.

Seguransa ne’e, dehan,   relasiona ho Publikasaun Hatutan.com ho títulu Projetu Konstrusaun Edifísiu Sentrál RTTL,E.P, MOP Konfirma Soil Test Uluk NIPPON KOIE Halo Laiha Dúvida no Di’ak,  nune’e iha loron  ne’e kedas kompañia PT Multi Aulia Sarana, hirus no  hatún kedas orientasaun katak kualkér mídia  sé de’it la bele husik tama bá konstrusaun hodi foti imajen no video.

Hatutan.com   halo konfirmasaun liuhosi telefónika  ho Prezidente Konsellu Administrativu RTTL,EP, Elizeu Isaac Fernandes, kona-bá progresu konstrusaun edifisu Sentrál RTTL,E,P, maibé  prezidente dezmente atu fó komentáriu.

“Bá husu bá sira, husu fali mai ha’u ne’e! Ne’e la’ós ha’u nia servisu ne’e, ne’ebé ne’e ha’u la hatene ida,” Prezidente RTTL.E,P, Elizeu Isaac Fernandes hateten.

Projetu konstrusuan edifisiu sentrál RTTL,E.P paradu. Foto/suplly

Iha Segunda loron 04 fulan-Agostu 2025,  redasaun Hatutan.com  halo  karta pedidu bá UNDP  ho númeru referénsia 01/Hatutan.com/VIIII/2025  hato’o bá  parte kompetente sira iha UNDP atu bele disponivel halo entrevista ho Hatutan.com kona-ba polémika projetu konstrusaun edifisiu sentrál RTTL,E.P ne’e. Maibé,  iha loron 07 fulan-Agostu ne’e, parte sira husi   Programa Nasoins Unidas ba Dezenvolvimentu (UNDP) aprezenta nia kumprimentus bá Hatutan.com no afirma UNDP  nia apoiu kontinua  bá inisiativa dezenvolvimentu ne’ebé implementa iha parseria ho Governu Timor-Leste projetu sira ne’ebé hetan apoiu hosi UNDP aliña ho nasionál.

Relasiona ho implementasaun, progresu, ka rezultadu sira husi projetu sira-ne’e, UNDP prefere iha karta ne’e katak tenke dirije bá omólogu Governu respetivu sira ne’ebé responsavel ba inisiativa ida-idak.

Programa Nasoins Unidas ba Dezenvolvimentu (UNDP) aproveita oportunidade ida-ne’e atu aprezenta bá Hatutan.com garantia sira kona-bá  ninia konsiderasaun sinseru.

Fó hanoin fila fali katak, kompañia internasionál PT Aulia Multi Sarana ne’ebé kaer obra konstrusaun edifísiu sentrál Rádiu Televizaun Timor-Leste, Empreza Publika (RTTL,E.P)  fó garantia iha reuniaun Konsellu Administrasaun (board meeting) katak sira termina projetu ne’e tuir tempu ne’ebé konsta iha kontratu laran.

Projetu edifísiu sentrál foun RTTL,E.P ne’e previstu investimentu ida  ho montante US$5,970659,11 ne’ebé finansiamentu hetan hosi parseria ida entre Governu Timor-Leste, Governu Japaun no Programa Nasoins Unidas ba Dezenvolvimentu (UNDP, sigla inglés) hanesan implementadór.

Iha loron 19 fulan-Dezembru tinan 2024, hala’o serimónia hatuur fatuk dahuluk  ba projetu konstrusaun edifísiu foun Rádiu no Televizaun Timor-Leste (RTTL,E.P) nian husi Primeiru-Ministru, Kay Rala Xanana Gusmão,  no projetu ne’e tenke remata ka termina iha fulan-Marsu 2026.

Jornalista: Marcelino Tomae