Hatutan.com, (04 Setembru 2025), Díli–Primeiru-Ministru (PM), Xanana Gusmão, konfirma katak Konsellu Ministru (KM) aprova tiha ona pedidu husi Federasaun Futeból Timor-Leste (FFTL) nian ba reabilitasuan Estádiu Munisipál Dili no harii kampu futsal indoor tuir padraun internasionál iha Tasi-Tolu.

Lee Mós: FFTL-MJDAK Hahú Tama Kapítulu Foun iha Konflitu

Primeiru-Ministru Kay Rala Xanana Gusmão. Foto/Zita Menezes

XI Governu Konstitusionál liuhusi reuniaun Konsellu Ministru iha Palásiu Governu, Kuarta 04 fulan-Juñu 2025, aprova  proposta husi Federasaun Futeból Timor-Leste (FFTL) ne’ebe atu halo reabilitasaun ba Estádiu Munisipál Díli no halo tán konstrusaun foun ba Estádiu ho kampu futsal indoor tuir padraun internasionál iha Tasi-tolu. 

Mézmu nune’e, to’o ohin loron, Federasuan Futeból Timor-Leste (FFTL) seidauk bele hahú prosesu reabilitasaun Estádiu Munisipál Dili tanba Ministériu Juventude, Desportu Arte no Kultura (MJDAK) seidauk tuur hamutuk ho FFTL atu halo diskusaun no atribuisaun Estádiu Munisipál Díli ne’e ba FFTL.

Liuhosi konferénsia imprensa iha edifísiu FFTL, Tersa 12 fulan-Agostu 2025, Prezidente FFTL, Nilton Telmo Gusmão dos Santos, ko’alia nakloke sentimentu triste no nakonu ho dúvida  kona-bá esforsu sira FFTL nian atu dezenvolve infraestrutura futeból iha Timor-Leste, mas kuaze la hetan apoiu husi Governu liuhosi MJDAK.

Nilton Gusmão dos Santos, fó lembra katak Konsellu Ministru aprova tiha ona proposta FFTL nian atu halo reabilitasaun ba Estádiu Munisipál Dili dezde loron 04 fulan-Juñu 2025, maibé to’o agora MJDAK nunka simu audiénsia ho FFTL atu halo diskusaun kle’an ba implementasaun prosesu reabilitasaun ne’e hodi estimula iha akordu konsesaun entre FFTL ho MJDAK.

Hosi sorin seluk, Ministru Juventude Desportu  Arte no Kultura (MJDAK) Nelio Isaac Sarmento, ne’ebé jornalista sira konfirma, Kuarta 13 fulan-Agostu /2025, klarifika  MJDAK nia  responsabilidade maka atu asegura patrimóniu Estadu ne’ebé  responsabiliza iha Governu.

Ministru Nelio Isaac Sarmento hateten nia agora sei okupadu hela atividade Komité Revizaun Orsamentu Jerál Estadu 2026, tanba ne’e seidauk iha tempu tuur hamutuk ho FFTL atu halo diskusaun ba reabilitasaun estádiu Munisipál Dili.

“Iha ne’ebé maka ha’u la   autoriza, maibé ha’u dehan beibeik ona, ha’u sei haree jogu CPLP depois mai iha KRO,  ida-ne’e hotu lai bá maka ha’u foin mai halo reuniaun ho FFTL,  tanba ne’e ha’u dehan katak dala ruma ita nia informasaun sira hanesan ne’e ita lakohi klarifika didi’ak  depois ita jeneraliza  hodi dehan buat hotu laiha atensaun bá sasán sira ne’e,” Ministru Juventude Desportu  Arte no Kultura (MJDAK) Nelio Isaac Sarmento hateten.

Bá kestaun MJDAK ne’ebé la hatudu vontade di’ak no boa-fé atu aselera reabilitasuan Estádiu Munisipál Dili tuir proposta FFTL nian, Primeiru-Ministru Kay Rala Xanana Gusmão, afirma projetu realitasaun Estádiu Munisipál Díli, Konsellu Ministru aprova ona.

“MJDAK la koabora ho FFTL ne’e ha’u la hatene.  Ha’u hatene de’it katak Konsellu Ministru aprova tiha ona no halo Estádiu ida iha Tasi Tolu”  Primeiru Ministru, Kay Rala Xanana Gusmão  hateten hodi hatan Hatutan.com bainhira remata enkontru semanal ho Prezidente Repúblika José Ramos Horta iha Palásiu Prezidensiál, Kinta (04/09/2025).

Jornalista: Marcelino Tomae