Hatutan.com, (16 Outuburu 2025), Balibo— Provedór Direitu Umanus no Justisa (PDHJ), Virgílio da Silva Guterres ” Lamukan” kontra  medida koasaun husi Tribunál Judisiál Primeira Instansia Dili (TJPID) ne’ebé  aplika de’it aprezentasaun periodika (AP) bá arguidu ajente-xefe polísia ho inisiál JLO, ne’ebé tiru nia  kaben iha área Ai-Mutin, foin lalais ne’e.

Lee Mós: Tribunál Aplika Medida Aprezentasaun Periódika ba Membru PNTL Tiru Nia Kaben

Provedór Virgílio da Silva Guterres “Lamukan” . Foto/Dok

Provedór Virgílio da Silva Guterres, triste haree ajente-xefe polísia ida uza sasán Estadu hodi  halo kanek sidadaun ne’e, tanba  lori kilat ne’ebé la’ós ninian,  maibé Estadu nia sasán hodi ba tiru nian kaben.

“Ita triste  no ita kontra, tanba ho kazu ida sériu hanesan ne’e, bá tribunál fó  sansaun ka aplika medida koasaun Aprezentasaun Periodika ba Membru PNTL  ida-ne’e, medida ne’ebé fó ne’e la tuir nia hahalok,” Virgílio da Silva Guterres bá jornalista sira  hafoin partesipa komemorasaun loron Nasionál Liberdade Imprensa ba dala-3 no trajédia Balibo bá dala-50 iha Postu Administrativu Balibó, Munisìpiu Bobonaro, Kinta (16/10/2025).

Provedór  haktuir katak,  desizaun tribunál nian dala ruma, tanba advogadu sira ka ema sira ne’ebé halo asisténsia legál  bá  vitimá, nia argumentu la forte atu bele enkoraja juis sira atu bele fó prizaun preventiva bá suspeitu.

Nia afirma,  desizaun ne’ebé tribunal foti ne’e la justu, tanbá membru Polisia ofisiál Estadu nian halo abuzu poder, halo sala hasoru  sidadaun, depois nia halo krime hasoru sidadaun ida, mézmu nia feen.

“Ne’ebé banhira desizaun hanesan ne’e la justu ba ita haree hosi kazu, ne’e todan,” Virgílio Lamukan argumenta.

Nia afirma se kazu ne’e maka akontese bá povu babain maka komete krime hanesan ne’e, dala ruma tribunál nia desizaun ho  pena ne’ebé boot, maibé kazu ne’e komete hosi enidade estadu  nian  tanba polísia ka dala ruma, tanba advogadu ne’ebé defende vítima ne’e ladún fó asisténsia maka’ás no argumenta maka’as, maka desizaun juis nia ne’e sai hanesan ne’e.

Nia dehan,  kazu hanesan barak akontese, la’ós tanba juis sira maka hakarak fó hanesan ne’e, maibé tanba iha tribunál defesor Públiku no advogadu sira nia argumentu la forte atu enkorajz juis atu hola desizaun medida ida ne’ebé maka’ás bá prizaun preventiva.

“Ne’ebé, ita triste, maibé ita husu nafatin bá parte legal sira atu haree kestaun ida ne’e, tanba  desizaun ida ne’e la justu, tanba ofisiál polísia halo abuzu de poder, tanba uza sala nian podér no kargu ne’e, depois nia halo krime hasoru sidadaun depois tribunal fó medida hanesan de’it, ida ne’e la justu,” nia hateten.

Tribunal Judisial Primeira Instansia Dili (TJPID), aplika medida koasaun Aprezentasaun Periodika ba arguidu ajente-xefe polísia ho inisiál JLO iha Tersa ( 14/10/2025) hafoin akontese insidente ne’e loron 12 fulan-Outubru tinan 2025

Jornalista: Marcelino Tomae