Hatutan.com, (21 Novembru 2025), Díli– Tribunál Judisiál Primeira Instánsia Dili (TJPID), Sesta (21/11/2025), hala’o primeiru interrogatóriu ba sidadaun Xina ho   inisiál SD ne’ebé envolve iha utiiza pistola ho kilat Polísia Nasionál Timor-Leste nian hodi hal otreinu iha fatin treinu tiru iha Kaitehu, Munisípiu Liquiça, foin lalais ne’e.

Arguidu SD nu’udár sidadaun Xina ne’ebé envolve iha utiliza kilat ho pistola PNTL nian hodi treinu tiru iha Kaitehu, foin lalais ne’e. Foto/Juvinal Cabral dos Santos

Prosesu judisiál ne’ebé rejistu ho Númeru Úniku Krime (NUC): 0313/25.PNSIC, juís turnu, José Gonçalves hatun despaixu aplika medida koasaun tolu, mak hanesan;

1. Medida Termu Identidade Rezidénsia (TIR)
2. Aprezentasaun Periódika (AP) husu atu arguido sidadaun Xina ne’e aprezenta aan biha Eskuadra PNTL Dom-Aleixo fulan ida dala-rua
3. Proibisaun ba auzénsia hodi bandu arguidu SD sai husi teritóriu Timor-Leste durante prosesu ne’e la’o hela ho medida kaosaun US$10,000.00.

Observasaun Hatutan.com, Sesta (21/11/2025), hale’u 14:00 Otl, sidadaun Xina ho inisiál SD ne’ebe membru Korpu Seguransa Pesoál (CSP) fasilita fó kilat ho pistola ba nia hodi  treinu tiru iha Kaitehu ne’e, prezensa iha Primeiru-Interrogatoriu Tribunal Judisial Primeira Instánsia Díli akompaña husi autoridade seguransa polísia.

Durante iha prosesu interogatóriu ba kazu ne’e Ministeriu Públiku liuhusi Prokuradór João Marques promove arguidu ho krime arma proivida ne’ebé previstu no punidu iha artigu 211 husi Kódigu Penál Timor-Leste.

Liuhosi prosesu interogatóriu  dahuluk ne’e Ministeriu Públiku (MP) iha nia alegasaun husu ba Tribunál atu aplika medida aprezentasaun periódika, proibisaun auzénsia no medida obrigasaun selu osan kaosaun ba Tribunál $10,000.00

Iha alegsaun Defeza ne’ebé fó asisténsia legal ba arguido,  Advogadu Privadu Jerónimo Piedade da Silva husu atu Tribunál absolve nia kliente husi krime ne’ebé Ministeriu Públiku promove tanba iha indikasaun katak  detensaun ne’ebé mak autoridade sira halo hasoru nia kliente ne’e iha iregularidade uituan. Infelismente, Tribunál adopta no aplika  medida koasaun tolu ne’e ba arguido SD.

Iha entervista Defeza Arguidu nian Jerónimo, fundamenta katak  nia parte la konkorda ho despaisu Tribunál nian, nune’e sei halo rekursu hodi kontesta ba despaisu referida.

“Husi ami nia parte la konkorda, mas ida ne’e mak desizaun Tribunálno ita tenke obedese maibé se ita la konkorda ita iha via seluk para rekore hodi halo rekursu,” Jerónimo Piedade da Silva hateten.

Jornalista: Juvinal Cabral dos Santos