Hatutan.com, (29 Dezembru 2025), Díli– Komandante Polísia Nasionál Timor-Leste (PNTL) Munisípiu Díli, Superintendente Xefe Polísia, Orlando Gomes, informa Polísia detein joven na’in-20 durante selebrasaun natal iha kapital Díli.

Komandante Polísia Nasionál Timor-Leste (PNTL) Munisípiu Díli, Superintendente Xefe Polísia Orlando Gomes. Foto/Juvinal Cabral dos Santos

“Durante selebrasaun natal, ami kaptura  no detein joven sira ne’ebé mak konsumu tua, no mós balun ne’ebé mak halo konflitu  iha bairru laran hamutuk ema na’in-20,” , Komandante Polísia Munisípiu Díli,  Superintendente Xefe Polísia Orlando Gomes, informa ba jornalista iha Centro Convenção Díli (CCD), Segunda (29/12/2025).

Nia hateten, suspeitu na’in-20 ne’e polísia detein iha sela durante oras 12 nia laran depois halo identifikasaun no bianhira iha prova katak balun involve duni iha krime, rekomenda hodi kontinua detensaun oras 72 nia laran hodi kontinua ba iha Ministeriu Públiku (MP).

Operasaun hodi asegura kapital Díli hakmatak iha selebrasaun natal no tinan foun 2026 ne’e bazeia ba diretiva operasional husi Komandu Jerál PNTL hodi prepara nia planu seguransa hodi asegura situasaun seguransa. 

Operasaun no patrollamentu lao ain ne’e hamutuk ho forsa konjuntu FALINTIL-Forsa Defeza Timor-Leste (F-FDTL), Polísia Militár (PM) ita nia forsa espesiál sira F-FDTL nian no mós  Unidade Espesiál Polísia (UEP), Unidade Polísia Maritíma (UPM) no informasun sekreta hamutuk kontrola situasaun iha kapital Díli.

Komadante  Polísia Munisípiu Díli hateten, sira nafatin esforsu hodi asegura joven sira ne’ebé iha bairru  balun halo konflitu,  autoridade seguransa prevene ba konflitu sira ne’ebé mosu.

“Durante natal iha kazu violensia domestika no joven sira hemu tua halo konflitu iha bairru laran mak hanesan iha Suku Madohi, iha mós Tuana Laran, ne’ebé ita nia opersaun konjuntu husi F-FDTL no PNTL halo prevensaun konsegue kaptura suspeitu nain-20,” nia hateten.

PNTL mós koloka pesoál Unidade Tranzitu no Rodoviáriu  iha igreja sira kapital Díli hodi asegura selebrasaun misa natal nian  la’o ho di’ak no ho transkulidade.

Jornalista: Juvinal Cabral dos Santos