Hatutan.com, (27 Dezembru 2021), Díli—Durante selebrasaun loron boot Natál, entre loron 24 no 25 Dezembru, Polísia Nasionál Timor-Leste (PNTL), Komandu Munisípiu Dili, rejista kazu asidente tráfegu hamutuk ualu (8), no na’in-ida lakon vida.

Kazu sira ne’e mosu iha Postu Administrativu Na’in-Feto, Verra Cruz no Dom Aleixo, kauza hosi hemu tua-lanu.

“Asidente fatál ne’e iha rua, depois kanek todan ho kanek kamán, hamutuk 4. Ita nian parte tránzitu mak responde, mais iha mós asidente tungal ka, ida ne’ebé mak na’in monu rasik ne’e iha. Ida ne’e eskuadra sira maka atende, no maioria tanba lanu. Entaun, ita lori ba iha eskuadra, depois de sira nia kondisaun lanu, moos, haruka sira fila-fali ba uma,” Komandante PNTL Munisipiu Dili, Superintendente Xefe Polisia, Henrique da Costa, informa ba jornalista sira, iha Caicoli, Segunda (27/12/21).

Advertisement

Komandu Munisipiu Dili (KMN) mós, halo detensaun ba motorista ida, iha Sela Detensaun Caicoli, durante oras 72, tanba konduz ninia motor, maibe laiha karta kondusaun no prosesu oras ne’e hein de’it atu aprezenta ba iha Ministériu Públiku (MP).

Detein Suspeitu na’in 20-resin

Durante selebrasaun loron boot Natál, PNTL Dili mós, detein suspeitu hamutuk ema na’in 20-resin, hosi Postu Administrativu Vera Cruz, Cristo Rei, Dom Aleixo ho Na’in-Feto, tanba asalta-malu (tuda malu ho fatuk) ne’ebé kauza mós hosi hemu tua-lanu.

Iha mós insidente ka akontesimentu iha área Dili ninian, iha Postu Administrativu Metinaro, no Ataúro, maibé situasaun la’o ho normál, tanba laiha insidente boot ruma.

Kazu sira ne’e, akontese, tanba ódiu malu ho problema pasadu, liu-liu liga ho Grupu Arte Marsial (GAM), ida-idak defende ninia grupu hodi ikus mai mosu ataka malu iha 24 dezembru, oras kalan.

Advertisement

“Maibe, polisia responde kedan, no ita to’o iha fatin, balun halai lakon, maibe’ balun ne’ebé mak iha, ita kaptura, lori mai iha komandu, hodi prosesa,” Komandante Henrique da Costa, informa tán.

Maske nune’e, situasaun enjerál iha munisipiu Dili, la’o ho hakmatek, laiha problema seriu ne’ebé prezudika ema seluk nia moris, tanba Polisia Komandu Munisipiu Dili, reforsa hosi Unidade Espesial Polisia (UEP), Unidade Patrullamentu Fronteira (UPF), ne’ebé destaka iha Aeroportu Internasionál Nicolau Lobato, Unidade Polisia Marítima (UPM), Kuartel Jerál, liu-liu Tránzitu nomós membru sira ne’ebé iha terrenu.

Durante selebrasaun loron boot Natál, Komandu PNTL Munispiu Dili, destaka nia membru sira hodi fó seguransa iha Igreja, Kapela nomós fatin importante sira, hodi nune’e bele garante seguransa iha fatin sira ne’ebé identifikadu nu’udár risku ba konflitu.

Jornalista: Rogério Pereira Cárceres

Advertisement