Hatutan.com, (07 Janeiru 2026), Díli— JU’S Juridiku  Sosiál ne’ebé fasilita asisténsia legál ba vitíma asédiu seksuál iha TIC Timor, Institutu Públiku, lamenta tebetebes ho desizaun  Komisaun Funsaun Públiku  (CFP, sigla portugés) ne’ebé fó de’it xamada atensaun ba dirijente TIC Timor,I.P ne’ebé deskonfia envolve iha asédiu seksuál ne’e.

Lee Mós: Kazu Asédiu Seksuál, “Apa-Boot” Prontu Bá Hatán iha Tribunál

Advogada estajiaria JU’S Juridiku Sosiál, Maria Agnes Bere. Foto/Marcelino Tomae

Advogada estajiaria JU’S Juridiku Sosiál, Maria Agnes Bere  bá Hatutan.com iha nia knaar fatin, Farol, Díli, Segunda, 05 fulan-Janeiru ne’e,  hateten JU’S lamenta tebes ho prosesu ida-ne’ebé tuir loloos simples rekolla informasaun no bele la’o lalais. Tanba ne’e, JU’S dúvida  mós bá iha seriedade no mós kapasidade atu halo prosesu dixiplinár ne’e.

Desizaun ida-ne’e,  Maria Agnes Bere, afirma tuir loloos Ministériu  Transporte  no Komunikasaun maka foti  tanba TIC Timor,I.P ne’e tutela bá MTK, entaun desizaun ne’e iha Ministru  Transporte no Komunikasaun, Miguel Marques Gonçalves Manetelu maka fó desizaun, tanba ne’e adminitrativa indireita bá  TIC Timor I.P.

Nia hatutan  desizaun ne’e vítima foin simu besik períodu Natál. Maibé, desizaun ne’ebé hasai de’it xamada atensaun bá ema ne’ebé komete alegasaun asédiu seksuál, nu’udár superiór ida iha TIC Timor, I.P sai kedas dezde fulan-Juñu 2025.

Nia fundamenta katak  iha momentu ne’ebé vitíma hato’o  keixa iha fulan-Agostu 2024, prosesu dixiplinár seidauk loke. Maske nune’e, iha períodu ne’ebá superiór ne’e  hetan nomeiasaun atu sai nu’udár emboot iha TIC Timor,I.P.

Nia  subliña katak, maske prosesu ne’e seidauk iha desizaun ida, governu nafatin halo nomeiasaun fali ema ne’ebé deskonfia halo pratika asédiu seksuál hodi uza nia otoridade no poder.

“Maibé iha prosesu dixiplinár ida -ne’e Minstru Transporte no Komunikasaun rasik  konvida CFP atu sai hanesan ekipa  instrusaun  bá prosesu  hodi halo prosesu dixiplinár,  maibé  bá funsionariu sira baibain  normalmente iha CFP  maka halo prosesu dixiplinár, mas ba hirak ne’ebé assume kargu ho natureza nomeasaun polítika superior másimu liu iha ministériu ne’ebé tutela ba TIC Timor,I.P mak tenke foti desizaun no loke prosesu dixiplinár,” nia esplika.

Nia afirma, kuandu  JU’S Juridiku Sosiál haree ba desizaun ne’ebé sai, la iha eskrita ho klaru hahalok ne’ebé Superiór TIC Timor I.P. komete no desizaun ne’e mós la ko’alia ho klaru kona-bá kestaun asédiu seksuál, tanba la hakerek detallu kona-bá hahalok ne’ebé alegadamente halo husi dirijente institusaun ne’e.

Parte JU’S Juridiku Sosiál konsidera katak maske  fó desizaun bá   iha superiór TIC Timor  bazeia bá pedidu husi Advogadu JU’S  bá vítima nian, maibé iha desizaun ne’e la hakerek hahalok saida maka direjente ne’e viola maka hanesan  asédiu seksuál ne’ebé maka halo hasoru ninia sub-ordinadu  ka nia funsionária.

“Ida-ne’e maka ami lametavel tebes, iha prosesu desizaun ne’e rasik, tuir loloos hahalok asédiu seksuál ida-ne’e, dala ruma ema hanoin katak ida-ne’e nia halo simples de’it,  maibé ida-ne’e tuir loloos grave tanba halo ambiente  servisu ne’ebé la di’ak ona, estraga ambiente servisu, lakon konfiansa,  atu hala’o servisu ne’ebé di’ak, entaun ambiente  servisu sai la di’ak  no la saudavel ona atu,”  Maria Agnes Bere   hateten.

JU’S Juridiku Sosiál nia hanoin katak tuir loloos desizaun ne’e tenke tetu bá gravidade ne’ebé maka iha, maske Superiór TIC Timor ne’e ninia hahalok la to’o krime.

Pozisaun  JU’S Juridiku Sosiál bá kazu ne’e,  bá futuru, sei buka dalan hodi halo rekursu,  maibé   sira seidauk asesu bá relatoriu.

“Ida-ne’e maka ami sei halo pedidu asesu relatóriu, ne’ebé maka to’o  agora mak seidauk hetan asesu bá relatoriu,  seikKarik desizaun ne’e, sira garante katak sei fó kastigu, dixiplinár bá superior TIC Timor,I.P, maibé ho fundamentasaun ne’e maka saída,  ami  presiza atu haree hotu iha relatoriu,  maibé relatoriu ne’e ami seidauk simu atu haree oinsá  posibilidade atu halo rekursu  bá desizaun dixiplinár ne’ebé maka iha,” Maria Agnes Bere    afirma.

JU’S sei tetu hela atu halo mós  prosesu sivíl  bá danu ka estragu no sofrimemtu  ne’ebé  maka  vítima hetan  husi hahalok  ne’ebé maka arguidu ka kodenadu ne’e halo hasoru vítima. Nune’e,

JU’S sei halo komunikasaun ho vítima, atu halo mós  prosesu bá Tribunál no mós prosesu  sivíl atu husu indemnizasuan ka kompensasaun bá hahalok ne’ebé superior TIC Timor halo fó ona sofrimemtu  no impaktu  ona vítima.

Nia dehan bainhira kazu sira ho natureza seksuál,  ne’ebé la informa bá vítima kona-bá prosesu, ka  prosesu ne’e pendente  no dada tempu naruk, tuir loloos fó  impaktu bá vítima, tanba vítima rasik la hatene saída maka akontese.

Nia afirma tan katak, kazu ida-ne’e besik tinan ida depois, vítima atraves nia Advogadu  hato’o ka denunsia bá prosesu dixiplinár, hasoru nia superior,  ami hato’o iha 2024, maibé desizaun ne’e foin tun iha 2025 la devia nia prosesu ne’e naruk.

Nia dehan  vítima iha direitu uainhira hato’o ona keisa ka petisaun ruma,  vitíma tenke hetan informasaun fila-fali, kona-bá progresu, inklui  desizaun, maibé ida-ne’e depois tinan ida halo  pedidu husu progresu to’o iha ne’ebé  maka vitíma  hetan desizaun ne’e iha foin lalais ne’e.

Husi sorin seluk, Ministru Transporte no Komunikasaun,  Miguel Marques Gonçalves Manetelu, informa katak desizaun ne’e sai tiha ona iha fula-Jullu 2025, maibé ida-ne’e desizaun husi  CFP.

“Ita boot (Jornalista) bá husu iha CFP kona-bá kazu asédiu sekuál ne’e, ema nain hira maka CFP  demite  husi funsionáriu,  imi bá konfrima iha CFP,” Ministru Miguel Manetelu hateten.

Antes ne’e mós  Hatutan.com  tenta atu halo komfirmasaun bá Komisaun Funsaun Públiku, maibé Komisariu Asuntu Asuntu Disiplina Agapito da Conceição,  okupadu hela ho servisu seluk, la lakohi fó komentariu

 Jornalista: Marcelino Tomae