Hatutan.com, (13 Janeiru 2026), Díli–Sekretáriu Estudu Komunikasaun  Sosiál (SEKOMS), Expedito Dias Ximenes, “admite” Elizeu Isaac Fernandes atuál Prezidente Konsellu Administrasaun Rádiu Televizaun Timor-Leste, Empreza Públika (RTTL,E.P)  viola Dekretu-Lei hodi hala’o knar inkompativel nu’udár Primeiru Vise-Sekretáriu Ezekutivu Organizasaun Juventude Partidu-CNRT (OJP-CNRT) Munisípiu Díli.

Lee Mós: SEKOMS Expedito Ximenes Nomea Ema husi Nia Gabinete Bá Lidera Mídia Estatál Parte Husi Intervensaun no Kontrola

Prezidente Konsellu Administrasaun RTTL,E.P, Elizeu Isaac Fernandes simu posse nu’udár Primeiru Vise Sekretáriu Ezekutivu OJP-CNRT Munisípiu Díli hamutuk ho estrutura sira iha Sede Nasionál Partidu CNRT iha Bairru dos Grilhos, Sábadu (27/12/2025). Foto/Falbo Ba Futuru

Iha Sábadu, 27 fulan-Dezembru tinan 2025, Elizeu Isaac Fernandes  hamutuk ho estrutura OJP-CNRT Munisípiu Díli simu tomade posse hodi assume kargu polítika iha partidu CNRT nu’udár Primeiru Vise Sekretáriu Ezekutivu OJP-CNRT  Munisípiu Díli.

Haktuir ba Dekretu-Lei nú.42/2008, 26  Novembru no nia alterasaun dahuluk iha loron 24 fulan-Outubru tinan 2024 kona-bá transforma Rádiu  Televizaun Timor-Leste ba Empresa Publika no primeiru Anexu maka Estatutu RTTL,E.P  iha númeru 1 hateten, Ema ida labele sai membru Konsellu Administrasaun ne’ebé simultaneamente (Não pode ser membro do Conselho de Administração quem seja simultaneamente):  

a) Funsionáriu públiku ka ajente Administrasaun Públika nian (Funcionário ou agente da Administração Pública);

b) Dirijente partidu polítiku ida nian (Dirigente de um partido politico);

c) Titulár kargu polítiku ida (Titular de um cargo politico);

d) Titulár ida ho interese finanseiru signifikativu iha telekomunikasaun no mídia iha Timor-Leste (Detentor de interesses financeiros significativos nas telecomunicações e na comunicação social em Timor-Leste).

Tanba baze ba Dekretu-Lei nú.42/2008, 26  Novembru no nia alterasaun dahuluk iha loron 24 fulan-Outubru tinan 2024, maka Sekretáriu Estadu Komunikasaun Sosiál (SEKOMS), Expedito Dias Ximenes, aprezenta iha reuniaun Konsellu Ministru iha Kuarta, 26 fulan-Fevereitu tinan 2025, hodi ezonera Prezidente Konsellu Administrasaun RTTL,E.P tempu ne’ebá José António Belo Taraleu tanba hala’o knar inkompativel hodi assume kargu polítiku iha esturutra Partidu Libertasaun Populár (PLP).

  Iha loron ne’e kedas Konsellu Ministru nomeia Elizeu Isaac Fernandes hodi asume kargu Prezidente Konsellu Administrasaun RTTL,EP ba mandatu tinan-haat (4) no ho rajaun seluk mak  nomeasaun ne’e bazeia bá kapasidade téknika no jestaun ne’ebé   husi Prezidente foun, no mós ninia esperiénsia profisional, senioridade,  no imparsialidade

Ba kestaun ne’e, Hatutan.com konfirma ho Sekretáriu Estadu Komunikasaun Sosiál  (SEKOMS), Expedito  Dias Ximenes iha salaun Konsellu Imprensa, Kintal-Boot, Díli,  Tersa (13/01/2026), hateten, prezidente Konsellu Administrasaun RTTL, E.P, Elizeu Isaac Fernandes la’ó estrutura ka lideransa partidu CNRT,  maibé nia hanesan militante partidu, ne’e bele.

“Iha nia kurikulum ne’e  mai husi partidu A ka B ne’e laiha tanba estatutu RTTL ne’e, hateten klaru. lideransa bá RTTL, E.P ne’e la bele mai husi partidu, sé  Elizeu líder partidu ne’e lei la fó dalan,”  Expedito Dias Ximenes afirma.

Expedito subliña tan katak nomeia Elizeu Isaac Fernandes lidera RTTL E.P   la iha evidénsia  boot ida sai  iha ne’ebá katak nia ema lideransa Partidu.

Kona-bá SEKOMS ho Konsellu Ministru ezonera José António Belo Taraleu  husi  Prezidente RTTL,E.P tanba inkompatbilidade asume kargu iha partidu polítiku no daudaun ne’e mós Elizeu Isaac Fernandes envolve iha Estrutura OJP-CNRT Munisípiu Dili, maibé Expedito  la hetan.

Nia mós deklara , katak, estatutu RTTL.E.P ne’e nakloke bá ema hotu, mak maibé  la’ós envolve iha  partidu  Polítiku.

“Maun José Belo klaru katak nia direjénte Partidu, ne’e líder boot hanesan, agora hanesan  Elizeu ne’e, ema  profesionál, sé karik nia família bá partidu ne’e ami  la hatene,  maibé sei ha’u hetan nia maka nia dirijénte partidu ne’e la bele,” Expedito Dias Ximenes tenik tan.

Nia afirma,  razaun ezonera José António Belo  Taraleu tanba  mós mandatu atu hotu ona,  razaun seluk  maka  José António Belo Taraleu assume kargu direjente partidu, hanesan  Vise-Prezidente  bá Komisaun Polítika Nasionál no  ne’e inkompatibilidade.

Husi sorin seluk, Hatutan,com mós husu opiniaun antigun prezidente RTTL,E.P, José António Belo Taraleu, maibé nia la koa’alia barka no dehan dei’t, “ha’u la hakfodak ho notísia ne’e. Tanba lei ne’e vale de’it ba seluk, mas ba sira ne’ebé ukun, lei ne’ebé sira maka halo ne’e la vale ka la vinkula ba sira.”

Jornalista: Marcelino Tomae