Hatutan.com,  (14 Janeiru 2026), Díli– Konfirmadu, Elizeu Isaac Fernandes  atuál prezidente Konsellu Administrasaun Rádiu Televizaun Timor-Leste, Empreza Pûblika (RTTL,E.P) assume mós kargu nu’udár dirijente iha Partidu CNRT ho pozisaun primeiru Vise-Sekretáriu Ezekutivu Organizasaun Joventude Patrtidu CNRT (OJP-CNRT) Munisípiu Díli.

Lee Mós: SEKOMS Expedito Ximenes “Admite” Elizeu Isaac Viola Lei Hodi Hala’o Mós Knaar Nu’udár Primeiru Vise-Sekretáriu Ezekutivu OJP-CNRT Munisípiu Díli

Elizeu Isaac Fernandes simu pose nu’udár dirijente OJP-CNRT iha loron 27 fulan-Dezembru tinan 2025. Foto/Repro husi konta Facebook pesoál EliZeu IsaAc Valoso

Koordenadór Jerál  CNRT Munisípiu Díli atuál membru  Bankada Parlamentár CNRT, Luís Ximenes Caldeira,  Kuartu (14/01/2026),  bá  Hatutan.com iha Parlamentu Nasionál (PN) hateten, nia parte rekoñese duni Elizeu Isaac Fernandes hetan konfiansa  husi Organizasaun Joventude Partidu CNRT (OJP-CNRT)  hodi asume kargu primeiru Sekretáriu Ezekutivu OJP-CNRT Munisípiu Díli ne’ebé simu posse husi Preizdente Paritdu CNRT atuál Primeiru-Ministru, Kay Rala Xanana Gusmão ho Sekretáriu Jerál atual Vise-Primeiru Ministru Francisco Kalbuadi Lai iha ámbitu konsolidasaun estrutura OJP-CNRT Munisípiu Díli no Natal Hamutuk ne’ebé hala’o iha Sede Nasionál Partidu CNRT iha Bairro dos Grilhos, Díli iha loron 27 fulan-Dezembru tinan 2025.  

“Membru sira  husi partidu CNRT nian iha direitu bá estrutura, sai kuadru  partidu nian  ne’e normal, tanba iha prosesu demokrásia, tanba iha ita-nia rai ne’e hanesan ne’e, ema ida-idak iha nia desizaun polítika. Joventude sira ne’ebé sai membru ba OJP-CNRT nomeia  alin Elizeu Isaac Fernandes bá pozisaun dirjinete OJP-CNRT nu’udár primeiru Vise-Sekretáriu Ezekutivu OJP-CNRT Munisípiu Díli,”  Koordenadór partidu CNRT Munisípiu Díli, Luís Ximenes Caldeira  hateten.

Luís Ximenes Caldeira hatutan istitusaun RTTL.E.P ne’e  parte ketak ida,   atividade partidu ne’e halo iha loron feriadu,  entaun prezidente RTTL, E.P  Elizeu Isaac Fernandes mós kuadru ka dirijente partidu CNRT nian iha direitu atu tuir atividade polítiku no  iha oportunidade assume kargu    iha estrutura partidu CNRT.

Deputadu Luís Ximenes Caldeira afirma mós katak, sé Dekretu-Lei nú.42/2008, 26  Novembru no nia alterasaun dahuluk iha loron 24 fulan-Outubru tinan 2024 kona-bá transforma Rádiu  Televizaun Timor-Leste ba Empresa Publika no primeiru Anexu maka Estatutu RTTL,E.P dehan bandu katak membru Konsellu Administrasaun RTTL,E.P laq bele sai dorijente partidu polítiku, entaun  Elizeu   Isaac Fernandes maka tenke hatene aan  bainhira haree bá norma legál  katak kontra duni  lei,  di’ak liu rejigna aan husi pozisaun   rua  ne’e ida.

Nia dehan, tanba   Governu   liu-husi Konsellu Ministru maka  nomeia no bele ezonera Prezidente Konsellu Administrasaun RTTL.E.P,  maka   Sekretáriu Estadu Komunikasaun Sosiál (SEKOMS), Expedito Dias Ximenes maka  tenke responsabilidade no poder  atu halo  foti desizaun, katak  bele ezonera Elizeu Isaac Fernandes no sumete fali ema seluk ba Konsellu Ministru nomeia fali hodi kontinua lídera RTTL,E.P.

Nia mós husu bá SEKOMS hodi hala’o nia kompeténsia, hodi haree bá Estatutu RTTL,E.P,  tanba atividade partidu ne’e,  parte polítiku ne’e, maibé RTTL.E.P hanesan  fó informasaun públiku, sé Estututu ne’e  la tolera, di’ak liu Elizeu Isaac Fernandes rejigna aan husi nu’udár dirijente OJP-CNRT.

“Sei estatutu RTTL,E.P ne’e la fó dalan,  di’ak liu, ha’u nia alin Elizeu mak tenke deside nia aan atu husik pozisaun konsistente ida husi pozisaun ne’ebé maka agora dadaun nia asume hela, Governu mós tenke haree karik lei la fó dalan,  di’ak liu, nomeia fali ema seluk,”  Deputadu Luís Ximenes Caldeira husi Bankada CNRT ne’e afirma.

Husi sorin seluk, Prezidente Asosiasaun Jornalista Timor Lorosa’e (AJTL) Zevonia Vierra hateten,  AJTL haree katak,  se Prezidente RTTL,E.P Elizeu Isaac Fernandes, envolve nu’udár dirijente partidu CNRT ne’e inkompatibilidade, tanba estatutu rasik hakerek klaru katak lideransa RTTL,E.P la bele envolve sai nu’udár dirijente partidu polítiku.

Asosiasaun Jornalista Timor Lorosa’e (AJTL) husu Sekretáriu Estadu Komunikasaun Sosiál (SEKOMS), Expedito  Dias Ximenes ezonera Elizeu Isaac Fernandes, husi Prezidente Kobsellu Administrasaun RTTL,E.P tanba hala’o funsaun inkompatibilidade.

Nia afirma, tanba RTTL ne’e, institusaun média estatál no públiku  tenke  mantein ninia  independénsia fó sai notísia ne’ebé maka loos, tuir  kodigu étika ne’ebé maka iha no prinsipiu jornalizmu nian,  sé  Elizeu Isaac Fernandes nu’udár dirijente partidu CNRT ne’e  kontra no viola ona estatutu RTTL.E,P nian.

Prezidente AJTL Zevonia Vierra . Foto/Marcelino Tomae

“Ami esperra katak SEKOMS bele haree ida-ne’e no  ezonera  Elizeu Isaac Fernandes ka foti desizaun tanba durante ne’e Primeiru-Ministru rasik hateten  katak  média no Jornalista servisu independente, ha’u fiar Primeiru-Ministru sempre promove liberdade imprensa iha Timor, respeita  servisu jornalista sira nian, di’ak liu SEKOMS ezonera  Elizeu Isaac Fernandes husi kargu Prezidente RTTL,E.P

Nia  subliña, tanba bazeia bá diskusaun públiku sempre  hatete katak situasaun iha RTTL,E.P la’o ladún loos,  entermu independensia editoriál  la la’o tuir prinsipiu   Jornalizmu no  kode étika ne’ebé maka iha.

“Ida-ne’e la’ós ona segredu, maibé rahasia ne’e terbuka ona, presiza haree, maibé husi AJTL ami  haree katak RTTL,E.P la’ós la di’ak iha durante ne’e,  tanba ita haree sira nia notisia, ita haree husi sira nia kobertura, notisia ne’ebé maka dala ruma hamosu kritika,  hasoru lideransa ka Governu  ne’e la fó sai,” Zevonia Vierra  hateten.

AJTL  hatene katak RTTL,E.P  la’ós partidu nian, la’ós Governu nian, maske   orsamentu ne’e mai husi Estsdu, maibé  média Públiku tenke fó espasu barak bá públiku, atu nune’e, povu  no ema hotu ko’alia sira nia aspirasaun,  no preokupasaun, atu nune’e, Governu buka solusaun, maibé  realidade hatudu  momoos katak RTTL ne’e foka liu de’it bá  atividade Governu,  la fó espasu ki’ik-oan  bá  povu sira  i atu ko’alia problema ne’ebé maka povu  enfrenta.

Tuir AJTL haree  bainhira iha lideransa ida katak Xefe ida atu lidera  média ida liu-liu hanesan média Estatál,  maske  estadu nian, maibé  tenke nomeia ema ida ne’ebé maka  independente no laiha relasaun ho partidu  polítiku, tanba  ne’e iha indikador boot atu bele  influénsia to’o iha   sala redadasaun.

Durante ne’e AJTL observa  interferensia husi  poder  polítika to’o sala Redasaun RTTL,E.P akontese  beibeik la’ós tempu ida agora, maibé iha tempu hirak liu-bá  bainhira hetan nomeasaun husi  partidu  atu lidera. Patrtidiu  ne’ebé lidera Governu sempre  nomeia sira nia ema atu bá lidera  instituisaun  média  ida hanesan RTTL,E.P.

 “Ida-ne’e influénsia maka’ás, indikasaun boot atu  halo influénsia maka’ás bá independensia  editorial. Jornalita sira iha redasuan la hala’o servisu ho livre no independete tanba redasaun sempre hetan interferensia polítika husi partidu sira ne’ebé ukun,”  Zevonia hateten.

Hatutan.com  husi opiniaun husi    Prezidente  Timor-Leste Prees Uniaun (TLPU), Candido Alves liu-husi telfefonika hateten,   tuir estatutu, RTTL,T.L  maka   Elizeu Isaac Fernandes envolve duni  iha estrutura partidu polítiku,  ne’e labele sai líder ona bá RTTL,E.P tanba   ne’e inkompatibilidade ona.

“Maibé hanesan ita hatene katak RTTL,  ne’e órgaun Estudu nian, tanba ne’e ha’u sempre hatete katak ema haree husi   kaca mata rua, ida  kaca mata  polítika, ida  seluk kaca mata media, entaun,  ha’u  hanesan média,  ne’e la furak kuandu Elizeu Isaac Fernandes hala’o ona knar inkompatibilidade,” Candido Alves hateten.

Pozisaun TLPU husu ba SEKOMS Expedito Dias Ximenes atu bele tetu ho situasaun ne’e bazeia  Dekretu-Lei nú.42/2008, 26  Novembru no nia alterasaun dahuluk iha loron 24 fulan-Outubru tinan 2024 kona-bá transforma Rádiu  Televizaun Timor-Leste ba Empresa Publika no primeiru Anexu maka Estatutu RTTL,E.P.

Komunikadu Imprensa SEKOMS

Jornalista Hatutan.com halo konfirmasuan direta ho SEKOMS Expedito Dias Ximenes. Foto/dok

Esklaresimentu no korresaun ofisiál SEKOMS nian kona-ba títulu notísia Hatutan.com relasiona ho informasaun/notísia hosi mídia online Hatutan.com, ho títulu notisia kona-ba, SEKOMS Expedito Ximenes “Admite” Elizeu Isaac Viola Lei Hodi Hala’o Mós Knaar Nu’udár Primeiru Vise-Sekretáriu Ezekutivu OJP-CNRT Munisípiu Díli, ne’ebé publika iha loron Tersa-feira, loron 13 fulan-Janeiru tinan 2026.

SECOMS hanoin katak iha diskrepánsia entre títulu no substánsia deklarasaun nian. Títulu ne’ebé publika la reflete kompletamente kontestu entrevista no iha potensiál atu hamosu interpretasaun la loos iha públiku. Tanba ne’e, SEKOMS fó sai hela klarifikasaun ofisiál ne’e nu’udar forma responsabilidade institusionál hodi hadi’a informasaun no reafirma prinsípiu ezatidaun no objetividade iha informasaun.

Secretário de Estado da Comunicação Social (SEKOMS) Expedito Loro Dias Ximenes, fó sai hela klarifikasaun ofisiál ida kona-ba informasaun hosi mídia online Hatutan.com, konsidera la reprezenta loloos substánsia hosi deklarasaun durante entrevista.

Notísia nia títulu ne’ebé publika la aliña ho narrativa, no reflete ba jornalista nia opiniaun, katak, la’ós SEKOMS nia deklarasaun ofisiál.

Entrevista entre Hatutan.com ho Secretário de Estado da Comunicação Social Expedito Loro Dias Ximenes ne’e akontese iha loron tersa-feira, loron 13 fulan-Janeiru tinan 2026, iha Salaun Enkontru Konsellu Imprensa Timor Leste, Kintal-Boot, hafoin enkontru entre governante ne’e ho Xefe Redasaun, Diretor Midia, no lideransa Asosiasaun Jornalista sira nian.

Depois sorumutu, Jornalista sira hosi Plataforma oioin halo entrevista fila-fali kona-ba rejultadu enkontru ne’e, Jornalista Hatutan.com lansa perguntas, no SEKOMS hato’o nia hanoin sira bazeia ba enkuadramentu legál no regulamentu ne’ebé aplikavel.

Iha alínea 7 hosi konteudu notísia ne’e, SEKOMS Expedito Loro Dias Ximenes esplika katak, “Iha nia kurikulum ne’e mai husi partidu A ka B ne’e laiha tanba estatutu RTTL ne’e, hateten klaru. lideransa bá RTTL, E.P ne’e la bele mai husi partidu, sé Elizeu líder partidu ne’e lei la fó dalan,” Expedito Dias Ximenes afirma.

Deklarasaun ida-ne’e aprezenta hanesan interpretasaun normativa ida ba provizaun legál, lahó refere ba, julga, ka afirma indivídu espesífiku ruma.

Atu justifika substánsia husi deklarasaun ida-ne’e, SEKOMS hasai deklarasaun klarifikasaun tuir mai:

“Há’u hakarak fo ba iha públiku liuliu ba sira neebé akompaña media sosial kona-ba notísia hatutan.com neʼebé ho títulu SEKOMS admite Eliseu Isaack viola lei hodi halo mós kna’ar nu’udar primeiru Vise-Sekretáriu Ezekutivu OJP CNRT Munsipiu Dili, tantu títulu husi notisia online ida ne’e la tuir deklarasaun ne’ebé hatutan rasik husu ba ha’u iha enkontru horseik iha Konselhu Imprensa tantu iha pergunta duni kona-ba Prezidenti RTTL hetan tomada de posse sai primeiru sekretariu OJP, maibe ha’u hateten, bainhira Konsellu Ministru nomeia Elizeu Isaac Fernandes iha Fevereiru tinan 2025, ne’e señor Eliseu la’ós dirijente partidu, maibé sé nia agora sai Prezidente partidu haʼu seidauk hatene ha’u seidauk rona neʼebé ami sei buka verifika kona-ba informasaun ida ne’e”.

Prezidente Konsellu Administrasaun RTTL,E.P, Elizeiu Isaac Fernandes simu posse nu’udár Primeiru Vise Sekretáriu Ezekutivu OJP-CNRT Munisípiu Díli hamutuk ho estrutura sira iha Sede Nasionál Partidu CNRT iha Bairru dos Grilhos, Sábadu (27/12/2025). Foto/Falbo Ba Futuru

“Husu ba publiku ne’ebé asesu iha media sosial liuliu ba asesu ba notisia hatutan nian, klaru mak ida ne’e katak, tuir dekretu lei 42 /2008 ne’ebé transforma RTTL,E.P ba empreza publika iha artigu 13 husi dekretu ne’e klaru tebes katak, labele sai membru Konsellu Administrasaun sa tan Prezidente, ema ida ne’ebé funsionariu no ajente administrasaun publika, i ida fali labele sai dirijente ba partidu politiku sira, ne’ebé husi artigu 13 dekretu lei 42 2008 ne’e hatudu momos katak, baihira Prezidente ba media Estatal maka hola parte iha hanesan dirijente ba partidu politiku ne’e bolu inkompativel katak labele hala’o kna’ar dirijente ba media ida, tanba ne’e hanesan ezemplu, iha momentu hau nia kolega Antonio Belo iha momentu nia mos Prezidente Konsellu Administrasaun RTTL, mesmu nia hanesan militante no simpatizante partidu, ne’e ida idak nia direitu politika sidadaun ida iha, maibé nia sai dirijente nee kona kedan iha artigu 13 dekretu lei ida ne’e, ne’e inkompativel laiha ona inkompatibilidade,”.

“Atu husu mós ba públiku katak, ami agora verifika hela kona-ba verasidade kona-ba informasaun ne’ebé fo sai iha media sosial katak, Prezidente RTTL Sr. Elizeu Isaac Fernandes asumi kargu mós hanesan Vise Primeiru Ezekutiuivu iha OJP Munisipiu Dili nian, nune’e ami sei verifika hela, maibé saida mak Hatutan fó sai, la tuir saida mak ha’u ko’alia, neʼebé ha’u husu ba públiku atu nafatin akompaña informasaun ne’ebé kredivel, informasaun neʼebé tuir lolos tenke iha verasidade, tuir deklarasaun fonte ne’ebé ko’alia, ho ida ne’e ami sei kontaktu ba media hatutan.com atu bele hadi’a fali informasaun neʼebé lalos, se karik ami verifika mak los dunik maka fo sai husi sosial media katak, Prezidente RTTL,E.P asumi ona mos kargu ba partidu politiku OJP munisipiu Dili nian maka ida tama ona kategoria inkopatibilidade.”

Deklarasaun ne’e ho intensaun atu klarifika ba públiku nia komprensaun kona-ba deklarasaun Secretário de Estado da Comunicação Social nian ne’ebé kontein iha notísia ne’e. Kona-ba ida-ne’e, Secretário de Estado da Comunicação Social husu atu Media Hatutan.com hala’o prátika jornalístika tuir Kódigu Étika Jornalístika, ne’ebé haktuir iha númeru 6 katak, “konfirma no verifika informasaun hothotu ne’ebe simu molok atu publika, rekoñese informasaun sira ne’ebé sala hafoin publikasaun no hadia lalais kedas, respeita sidadaun nia direitu atu hatan”.

Bazeia ba ne’e, ezije jornalista no mídia sira atu-rekoñese no korrije lalais informasaun ruma ne’ebé sala hafoin halo publikasaun; Respeita direitu ba resposta, direitu konstitusionál sidadaun nian. Atu klarifika katak, títulu nu’udar elementu xave ida hodi forma persesaun públiku.

Títulu ida ne’ebé la verifika ba nia konformidade ho konteúdu no kontestu deklarasaun iha potensiál atu halo sala, prejudika fonte, no viola prinsípiu kona-ba ezatidaun no responsabilidade imprensa nian. Tanba ne’e, hadi’a títulu ida nu’udar parte ida hosi obrigasaun étika mídia ba públiku. Bazeia ba konsiderasaun hirak ne’e maka SEKOMS husu ofisialmente ba Media online Hatutan.com atu hadi’a títulu ka headline hodi aliña ho substánsia, kontestu entrevista, no prinsípiu Kódigu Étika Jornalístika nian.

SEKOMS Expedito Loro Dias Ximenes hein katak, klarifikasaun ida ne’e sei sai hanesan baze ida ba Media Hatutan.com atu halo koresaun ne’ebé proporsional no responsavel tuir Kódigu Étika Jornalístika nian.

SEKOMS afirma ninia kompromisu atu kontinua kolabora ho mídia ho espíritu profisionalizmu, ezatidaun, no respeitu ba étika imprensa ba interese públiku.

Nota korresaun ne’e fó sai husi Secretaria de Estado da Comunicação Social (SEKOMS) Expedito Loro Dias Ximenes, iha Kuarta-feira, loron 14 fulan-Janeiru tinan 2026, iha Gabinete SEKOMS, Palasiu Governu, Dili.

Jornalista: Marcelino Tomae