Hatutan.com, (17 Janeiru 2026), Díli– Organizasaun Noun Governamentál Asia Justice and Rights (AJAR) konsidera Prezidente Konsellu Administrasaun Rádiu Televizaun Timor-Leste, Empreza Públiku (RTTL,E.P) Elizeu Isaac Fernandes hafoer ona RTTL,E.P tanba hala’o kna’ar inkompativilidade hodi sia dirijente iha partidu CNRT nu’udár Primeiru Vise-Sekretáriu Ezekutivu Organizasaun Juventude Partidu  CNRT (OJP-CNRT) Munisípiu Díli.

Lee Mós: Prezidente RTTL,E.P Inkompatibilidade, Konsellu Imprensa Konsidera Violasaun Grave

Prezidente Konsellu Administrasaun RTTL,E.P, Elizeiu Isaac Fernandes simu posse nu’udár Primeiru Vise Sekretáriu Ezekutivu OJP-CNRT Munisípiu Díli hamutuk ho estrutura sira iha Sede Nasionál Partidu CNRT iha Bairru dos Grilhos, Sábadu (27/12/2025). Foto/Falbo Ba Futuru

Iha loron 27 fulan-Dezembru tinan 2025 iha ámbitu konsolidasaun  no reajistamentu esturutra OJP-CNRT no Natal hamutuk OJP-CNRT Munisípiu Díli, Elizeu Isaac Fernandes hamutuk ho estrutura OJP-CNRT Munisípiu Díli simu tomada de posse husi prezidente partidu CNRT, Kay Rala Xanana Gusmão n o Sekretáriu Jerál Francisco Kalbuadi Lay.

Elizeu Isaac Fernandes assume responsabilidade iha partidu CNRT hanesan Primeiru Vise-Sekretáriu Ezekutivu Organizasaun Juventude Partidu  CNRT (OJP-CNRT) Munisípiu Díli.

Peskizadór AJAR atuál Direitór Intrinu FONGTIL, Inocênsio de Jesus Xavier bá Hatutan.com iha edifisiu AJAR, Díli,  Sesta (16/01/2026) , hateten AJAR haree katak  Prezidente Konsellu Administrasaun Rádiu Televizaun Timor-Leste Empreza Públiku (RTTL,E.P), Elizeu Isaac Fernandes inkomprimetu  bá Estatutu no regulamentu ne’ebé konstitui iha natureza  RTTL, E.P nian  ne’e  tenke perde mandatu ona,  tanba haree husi lei ne’ebé hakerek proibidu bá  autoridade ka  Prezidente RTTL,E.P atu iha  afiliasaun polítiku bá kna’ar  sira  importante iha  partidu polítiku, satán partidu ne’ebé maka Governa hela iha IX  Governu ne’e.

“Ha’u  husu Prezidente RTTL,E.P atuál  rejigna aan hodi fó fatin bá ema seluk,  hodi nune’e la bele  iha dimensaun ida  katak,   iha politizassun  bá  independéndia redasaun RTTL,E.P,” Inocênsio de Jesus Xavier hateten.

AJAR ezije ba Sekretáriu Estadu  Komunikasaun Sosiál (SEKOMS), Expedito Dias Ximenes, hodi kumpri Primeiru-Ministru Kay Rala  Xanana Gusmão nia orientasaun atu aprezenta kestaun inkompatibilidade prezidente RTTL,E.P nian ne’e bá Konsellu Ministru hodi ezonera Elizeu Isaac Fernandes husi Prezidente RTTL,E.P hodi nomeia fali ema seluk  hodi kumprimentu ba Dekretu-Lei nú.42/2008, 20 Novembru no nia alterasaun dahuluk iha loron 24 fulan-Outubru 2024, kona-bá transforma Rádiu Televizaun Timor-Leste, Empreza Públika no primeiru anexu maka Estatutu RTTL,E.P.

Peskizadór AJAR atuál Direitór Intrinu FONGTIL, Inocênsio de Jesus Xavier. Foto/Marcelino Tomae

AJAR  mós husu ba Elizeu Isaac Fernandes ho voluntariu rejigna aan rasik, husi kargu Prezidente RTTL,E.P,  atu nune’e, bele servisu fó bá poder polítiku sira hanesan Primeiru Vise-Sekretáriu Ezekutivu Organizasaun Juventude Partidu  CNRT (OJP-CNRT) Munisípiu Díli.

Nia dehan hanesan titular bá instituisaun públiku, kuandu aprezenta  karta rejignasaun ka pronúnsia buat ruma, ne’e públiku tenke hatene, sé lae públiku  konsidera katak ne’e subar buat ruma.

“Elizeu Isaac Fernandes, ho líder masímu iha partidu CNRT, tenke hatudu onestidade, ha’u dezafia sira atu hatudu karta rejignasaun ne’e,   atu nune’e, ema la bele kestiona integridade polítiku, nia tenke berani hodi hateten katak husik fatin ida-ne’e hodi fó biban bá ema seluk, tantu  RTTL, no mós OJP- CNRT Munisípiu Díli,”  nia  afirma.

“Sé Elizeu Isaac Fernandes dehan hato’o tiha ona karta rejignasaun tanba sá  maka  media Hatutan.com bá konfirma iha xede partidu CNRT Munisípiu Díli no  Nasionál sira lakohi dehan razaun, korseteza ita bele deskonfia  ne’e sira nia trasa  polítika ida, ne’ebé  dehan katak  Elizeu atu rejigna aan husi kargu Primeiru Sekretáriu Ezekutivu OJP- CNRT mós  nia hafoer ona RTTL,E.P,” Inocênsio de Jesus Xavier afirma tan.

Nia konsidera, agrumentu ne’ebé Prezidente RTTL.E.P hato’o katak   hatama ona karta rejignasaun ne’e iha loron 05  fulan-Janeiru, tinan ne’e, laiha baze fundamentu tanba evidensia laiha. Tanba aprezentasaun karta sira hanesan ne’e, tenke arkiva iha OJP- CNRT Munisípiu Díli, ida iha RTTL,E.P, atu nune’e, fasil bá média ka jornalista konfirma, tenke hatudu kedas. Nune’e mós bele administrasaun bá pozisaun sira hanesan ne’e bele hatudu katak Prezidente RTTL,E.P rejigna aan husi OJP- CNRT  Munisípiu Díli hodi halo servisu de’it bá RTTL,E.P.

“Maibé sé sira dehan ne’e konfidensial ne’e, ha’u sente hanesan sira atu subar buat ruma iha situasaun ida-ne’e, ne’ebé di’ak ha’u nia konsellu bá ha’u  nia alin Elizeu Isaac Fernandes, ita boot joven dalan sei naruk, komporta ita nia aan hanesan  ema polítiku di’ak ida hodi nune’e  ita bele hetan integridade no konfiansa polítiku, ita labele moris hatoman aan ho lia-bosok tanba lia-bosok sei la dura, no hakoi rasik ita nia aan,” nia hateten.

Nia hatutan, tuir loloos, se Prezidente RTTL,E.P Elizeu Isaac  hatama ona karta, nusa la deklara ofisiálmente katak  tenke husik pozisaun nu’udar Primeiru vise Sekretáriu Ezekutivu OJP- CNRT Munisípiu Díli, atu nune’e,  públiku bele hatene.

“Ha’u admimira tanba iha momentu ne’ebá ema hili nia,  nusa nia  la rejeita tanba nia hatene hela katak  lei Estutu RTTL,E.P ne’e la fó dalan bá nia atu halo kna’ar polítiku,  halo nusa maka nia hatene nia hakarak  simu kna’ar polítiku ne’e, ida-ne’e pur- intensaun,”  nia afirma tan.

Tuir nia, razaun sira ne’ebé  hato’o husi Kordenadór Jerál Partidu CNRT Munisípiu Díli,  Luís Ximenes Caldeira ho Prezidente RTTL Elizeu Isaac ne’e laiha baze fundamentu ka evidensia forte bá públiku

Nia afirma, Elizeu Isaac Fernandes maka hanesan ema  matenek na’in ida, nia tenke  deklara frankamente iha bá superior sira partidu polítiku CNRT iha ámbitu tomada ne’ebé realiza iha loron 27 fulan-Dezembru 2025, atu asegura integridade  RTTL,E.P.

Nia afirma, RTTL,E.P ne’e la’ós hetan osan husi partidu polítiku, maibé orsamentu Jerál Estadu, osan povu nian,  tanba ne’e Elizeu Isaac tenke hatudu nia onestidade, tanba integridade ne’e la’ós sosa ho osan no pozisaun.

Jornalista: Marcelino Tomae