Hatutan.com, (27 Janeiru 2026),  Díli–Konsellu Ministru extra-ordinariu,  Tersa (27/01/2026), aprova  projetu Rezolusaun Governu nian ne’ebé aprezenta hosi Ministru Prezidénsia Konsellu Ministru, Agio Pereira no Sekretáriu Estadu Komunikasaun Sosiál, Expedito Dias Ximenes, ne’ebé determina ezonerasaun ba atuál Prezidente Konsellu Administrasaun Rádiu no Televizaun Timor-Leste, Empreza Públiku (RTTL, EP) , Elizeu Isaac Fernandes.

Lee Mós: Lalais Salva RTTL,E.P, SEKOMS Expedito Ximenes: “Ha’u Seidauk Simu Relatóriu”

Jornalista Hatutan.com entrevista Prezidente Konsellu Administrasaun RTTL,E.P Ezoneradu, Elizeu Isaac Fernandes, Kuarta (02/07/2025). Foto/Dok

Reuniaun Konsellu Ministru ne’e mós deside hodi nomeia Rosário da Graça Maia asume kargu nu’udar Prezidente Konsellu Administrasaun foun ba RTTL,E.P ho mandatu tinan-haat, 2026-2030.

Nomeasaun ne’e prodús efeitus hahú loron 1 fulan-Fevereiru tinan 2026 no bazeia ba imparsialidade, integridade, kapasidade téknika no jestaun Prezidente foun nian, no mós ninia esperiénsia profisionál no senioridade ne’ebé hetan rekoñesimentu.

Rosário da Graça Maia nu’udár antigu reporter Rádiu UNTAET iha  tinan 2001 no bainhira  transforma  Rádiu UNTAET ba RTTL iha  tinan 2002, Rosário kontinua hala’o profisaun hanesana Jornalista  to’o nia rejigna aan iha tinan 2013.

Bá Jornalista sira   Sekretáriu Estadu Komunikasaun Sosiál, Expedito  Dias, afirma Prezidente Konsellu Administrasaun RTTL,E.P atuál,  Elizeu Isaac Fernandes,  hetan  nomeasaun husi Konsellu Ministru iha tinan ida liubá  tuir dekreitu-lei 42/2008.  Maibé, Expedito Dias Ximenes afirma tan Elizeu Isaac Fernandes ne’ebé antes ne’e hanesan nia Xefe Gabinete iha SEKOMS  la konsiente ba  forma legal sira ne’ebé eziste hodi hola parte iha  partidu polítiku nu’udár Primeiru Sekretáriu Ezekutivu Organizasaun Juventude Partidu CNRT  (OJP-CNRT) Munisípiu Díli.

Prezidente foun RTTL,E.P, Rosário da Graça Maia. Foto/Espesiál

Expedito afirma katak haree bá estatutu RTTL, E.P artigu 13 aliña b informa katak Konsellu Administrasaun RTTL, labele sai dirijente bá partidu polítiku. Maibé,  Elizeu Isaac Fernandes viola artigu 13 iha aliña b, maka konsidera inkompativel.

“SEKOMS hanesan membru Governu ne’ebé responsavel bá área Komunikasaun Sosiál, RTTL tutela mai iha SEKOMS, maka ho kompeténsia ho autoridade  ne’ebé iha, SEKOMS aprezenta proposta rezolusaun Governu nian mai iha  Konsellu Ministru hodi halo ezonerasaun ba Elizeu Isaac Fernandes husi kargu prezidente konsellu administrasaun RTTL,E.P ,” Expeidto Dias Ximenes esplika.

Nia hatutan, Elizeu Isaac Fernandes halo kna’ar inkompatibilidade, maka  Kosellu Ministru liu-husi diskusaun  ida-ne’ebé naruk ikus mai Konsellu Ministru ezonera Elizeu Isaac Fernandes husi Prezidente Konsellu Administrasaun RTTL,E.P nian no nomeia Rosario de Graça Maia, hanesan prezidente foun bá Konsellu Administrasaun iha  RTTL,E.P.

Jornalista: Marcelino Tomae