Hatutan.com, (02 Fevereiru 2026), Díli-Joven na’in-rua ho identidade naran Glen Armindo de Fátima (tinan 21) ho Agusto Pinto (tinan 23) lakon vida iha asidente tráfíku iha Estrada área Eskola 04 Setembru UNAMET, Balide, Díli.

Lee Mós: 2024, Ema 117 Lakon Vida Tanba Asidente Tráfegu

Polísia Munisípiu Díli asegura hela motór sira ho kazu asidente tráfiku. Foto/Juvinal Cabral dos Santos

Asidente ne’ebé akontese iha Segunda (02/02/2026), tuku 04:45 madrugada ne’e, Glen Armindo de Fátima ho Agosto Pinto, tula-malu iha motór halai ho velosidade soke trotoár hodi rezulta sira na’in-rua mate fatin.

“Ita-nia  Polísia Seksaun Tránzitu no Rodoviáriu  tuun direta no foti evidénsia motór hodi asegura  hela iha Komandu Polísia Munisípiu Díli no  mate-isin iha Ospitál Nasionál Guido Valadares (HNGV)  hodi submete ba autopsia,” Komadante Polísia Nasional Timor-Leste (PNTL) Munisípiu Díli, Superintendente Xefe Polísia Orlando Gomes.

Joven na’in-rua ne’ebé lakon vida iha asidente ne’e kondús motór honda Sonik ho númeru matrikula Q-6770 TL. Vítima ne’ebé lori motór nia naran Glen Armindo de Fátima no ida tur kotuk naran Agusto Pinto.

Dadus husi Polísia katak iha inisiu fulan-Fevereiru ne’e, asidente tráfiku iha rua antes ne’e ida akontese iha dia 01 fulan Fevereiru kalan ne’e hale’u tuku 23:24 Otl iha kruzamentu edífisiu Eletrisidade Timor-Leste Empreza Públika (EDTL,EP) ne’e motór ho motor soke malu sira tenta rezolve tuir família tiha, hotu ida ba fali ospital  halo tratamentu doutor  sira leno depois nia hetan moras rins nakfera entaun nia mós hakotu iis iha Segunda-kalan, 02 Fevereiru 2026.

“Asidente iha kalan 01 Fevereiru ne’e,  maske sira na’in-rua resolve, maibé to’o ikus Agusto N. Fernandes mate, entaun ita-nia tránzitu sei nafatin foti suspeitu sira para mai presta deklarasaun prosesu ne’e kontinuasaun ba oin,”  Superintendente Xefe Polísia Orlando Gomes hateten.

Tuir dadus seksaun tránzitu Munisípiu Díli husi fulan-Janeiru tinan 2026 rejistu asidente fatál ida iha parte Comoro besik Banco do Nosso Futuru (BNF-sigla portuges), no fulan-Fevereiru ne’e, registu asidente ida iha Doimingu-kalan hodi rezulta vítima lakon vida no ida seluk akontese iha Segunda-madrugada, soke iha área  Eskola 04 Setembru, Balide, Díli, ne’ebé nian na’in-rua lakon vida.

Jornalista: Juvinal Cabral dos Santos