Hatutan.com, (10 Fevereiru 2026), Díli–Totál reajente ne’ebé rejista iha armazén sentrál Intitutu Nasionál Famásia no Produtu Médiku (INFPM)  atinji 88%.

Lee Mós: PDHJ Husu Anula no Suspende Rekrutamentu Kadetas PNTL Foun

Kuadru Armazén Sentral INFPM iha Kampu Alor, Díli. Foto/Marcelino Tomae

Dadus ne’ebé Hatutan.com asesa husi pesoál sira iha armazén INFPM ne’ebé lokaliza iha área Kampu Alor, Díli, informa katak  husi nesesidade nasionál ekivalente ho serka 1,760 item reajente no husi totál estimadu 2,000 item ne’ebé uza bá servisu laboratoriu iha nivel nasionál.  Husi totál ne’e, aprosimadu 9% ka 180 item konsidera hanesan stock-out temporáriu tanba prosesu distribuisaun ka renovasaun kontratu.

Iha Tersa  (10/02/2026), hale’u tuku 09:30 dadeer Otl, Hatutan.com  tenta konfirma ho Deirtora Ezekutiva INFPM, Paulina  Mendonça  kona-bá razaun  ne’ebé husi Komisaun Rekrutamentu kadetes  PNTL foun   na’in- 400 atu tuir teste médiku, maibé iha informasaun reajente laiha tanba ne’e Komisaun Rekrutamentu PNTL adia fali ba loron seluk atu halo teste médiku ba kandidatu ajente foun PNTL na’in-400.

Iha komunikasaun ho gabinete Diretora Ezekutivu INFPM nian atu bele halo entrevista ho Diretora Ezeutiva INFPM, maibé parte  INFPP seidauk bele halo entevista tanba okupadu ho servisu.

“Deskulpa tanba Diretora okupadu hela, dadaun  ne’e prepara hela relatóriu atu bá aprezenta Parlamentu Nasionál,”  pesoál gabinete diretora ezekutiva INFPM informa ba Hatutan.com.

Bainhira jornalista Hatutan.com  hakat sai husi  Gabinte INFPM  nian, pesoal balun hakbesik mai hodi husu atu la bele publika nia identidade informa katak estoke reajente iha hela armazén INFPM no sufisiente tanba  provizóriu ne’ebé halo avaliasaun iha inísiu tinan 2026.

Fontes ne’e hateten daudaun armajen hatudu reajente iha hela. Diverjénsia informasaun mosu tanba relatóriu la atualizadu ho tempu ne’ebé hanesan.

Nia afirma, totál reajente ne’ebé rejista iha armazén sentrál INFPM agora atinji 88% husi nesesidade nasionál, ekivalente ho serka 1,760 item reajente husi totál estimadu 2,000 item ne’ebé uza bá servisu laboratóriu iha nivel nasionál.  Husi totál ne’e, aprosimadu 9% ka 180 item konsidera hanesan stock-out temporáriu tanba prosesu distribuisaun ka renovasaun kontratu.

Pesoál INFPM ne’e subliña, reajente vitál sira hanesan reajente bá hematologia, bioquímica no teste diagnostiku moras infeksiozu  iha disponibilidade normál no la iha indikasaun krize imediata iha ospitál referál sira. Problema prinsipál, tuir fontes ne’e, la’ós iha estoke, maibé iha fluxu informasaun, koordenasaun no  komunikasaun entre instituisaun sira.

Nia subliña diferensa informasaun públika  husi  Polísia Nasionál Timor-Leste, kona-bá falta reajente ka la iha reajente, inklui husi entidade seguranzsa, bele kria persepsaun negativu iha sosiedade se la halo verifikasaun tekniku ho INFPM molok hato’o bá públiku.

Molok  ne’e, portavós Komisaun Juri bá  Rekrutamentu  membru Polísia Nasionál Timor-Leste (PNTL) tinan 2025, Superintendente Polísia António da Luz, liuhosi konferénsia imprensa iha Sentru Formasaun  Akademia Polísia (CFP-sigla portuges), Segunda (09/02/2026), hateten Departamentu Saúde PNTL halo koordenasaun ho Laboratoriu Nasionál iha HNGV ba konfirma katak ekipamentu ne’ebé mak atu halo teste hanesan reajente to’o agora seidauk iha, tanba ne’e mak fó hatene fali ba kandidatu sira hein ekipamentu ne’e to’o ona maka foin bele halo teste médiku.

Iha fatin hanesan Xefe Departamentu Saúde Superintendente Assistente Polísia Analita do Rego, haktuir, oráriu atu ba prova médiku tuir loloos hahú iha loron 10  to’o loron 20  fulan-Fevereiru ne’e, maibé tuir konfirmasaun husi departamentu saúde, katak laboratoriu nasionál HNGV reajente ne’ebé atu halo teste ne’e seidauk to’o iha Timor-Leste.

Portavós Komisaun Juri bá  Rekrutamentu  membru PNTL tinan 2025, Superintendente Polísia António da Luz, hatutan tan katak tenke hein parte laboratoriu nian, atu reajente ne’e to’o tiha iha Timor-Leste mak bele hahú teste médiku ba kandidatu ajente PNTL na’in-400 ne’ebé atu konkore ba vaga 400 iha PNTL.

“Ita espera katak iha tempu badak mai ona para  ita-nia joven sira  400 ne’e bele teste,”  Superintendente Polísia António da Luz hateten tan.

Nia esplika, ba tuir teste médiku mantein kandidatu 400  bazeia ba Rezolusaun Governu Nu:10/2025 ne’ebé mak fó sai presiza na’in-400 de’it.

Lee Mós: Kandidatu Ajente PNTL Sei Koordena ho Universitáriu Sira Organiza Manifestasaun

Jornalista: Marcelino Tomae