Hatutan.com, (10 Fevereiru 2026), Díli-Komisaun E Parlamentu Nasionál ba asuntu Infraestrutura, semana kotuk, halo fiskalizasaun iha Munisípiu Manatuto hodi haree ezekusaun obra ka projetu sira uma dignu ba povu ne’ebé gasta orsamentu estadu husi programa Governu da-sia nian la’o atrazu.

Projetu uma dignu iha Suku Aubeon, Postu Administrativu Barike, Munisípiu Manatuto ne’ebé la’o atraza. Foto/Mídia ADN

Liuhosi plenária PN, Tersa (10/02/2026), membru Komisaun E, Carminda Carlota hateten projetu uma dignu ne’e la’o atrazu loos no husu Governu atu bele toma medida ba empreza sira ne’ebé hetan fiar ezekuta projetu ne’e.

“Bazeia ba fiskalizasaun husi Komisaun iha Suku Aubeon, Postu Administrativu Barike, Munisípiu Manatuto, identifika konstrusaun ba uma dignu hamutuk 25, maibé realidade iha terrenu hatudu katak uma ne’e foin finaliza unidade ualu (8) no uma 17 seluk husi total uma   25 ne’e seidauk finaliza no atraza,” Deputada Carminda Carlota informa.

Komisaun E  husu ba ministériu relevante atu aumenta tán traballadór ne’ebé mak kaer obra  referé no mós husu ba Prezidente Autoridade Munisípiu Manatuto (PAM) atu ajuda haree konstrusaun hirak ne’e nia ezekutasaun.

“Ami husu mós ba ministériu relevante kuandu iha futuru fó projetu uma dignu tenke fahe ba kompañia Timoroan haat ka lima  labele fó de’it ba kompañia ida mak kaer ikus mai projetu sira ne’e atraza,” Deputada Deputada Carminda Carlota hateten.

Teknikú sira husi Vise-Ministru Asuntu Parlamentár  ne’ebé partisipa iha plenária ne’e anota preokupasaun Komisaun E nian ne’e hodi hato’o ba iha Governu liuliu ministériu relevante atu bele buka solusaun imidiata.

Sita husi pajina mídia sosial Agência Desenvolvimento Nacional, Instituto Público ADN, IP, iha loron 19 fulan-Novembru 2025, tékniku ADN destakadu iha Munisípiu Manatuto, hamutuk ho na’in ba projetu MDRHC ne’ebé maka destaka iha fatin konstrusaun Uma Dignu ba Povu halo monitorizasaun ba projetu uma dignu ba povu no iha oportunidade hanesan halo mós diskusaun hodi buka solusaun relasiona ho projetu nia progresu ne’ebé tarde.

Projetu konstrusaun uma dignu ba povu ida ne’e implementa husi kompaña Delon Unipesoál Lda no nia progesu foin atinze 40 pursentu.

Jornalista : Zita Menezes