Hatutan.com, (13 Fevereiru 2026), Díli-Prezidente Komisaun B Parlamentu Nasionál (PN) ne’ebé trata Asuntu Negósiu Estranjeiru, Seguransa no Defeza, Domingos Augusto “Deker”, konsidera iregularidade iha rekrutamentu Polísia Nasionál Timor-Leste (PNTL) ne’e média mak inventa sasán tun-sa’e tanba la bazeia ba faktu ka realidade.

Lee Mós: Governu Suspende Tempráriu Rekrutamentu Ajente PNTL 2025

Prezidente Komisaun B PN, Domingos Augusto “Deker” akompaña husi Komisáriu Jerál Polísia Henrique da Costa. Foto/Juvinal Cabral dos Santos

“Foin lamentasaun husi públiku de’it, serteza loloos ne’e seidauk iha, liuhusi fiskalizasaun mak foin bele identifika sasán sira-ne’e loos ka lae, tanba média ohin loron bele inventa sasán tun-sa’e. Ami nia parte, ami la ko’alia ba ema nia lamentasaun, ami hakarak ko’alia tenke bazeia ba faktu ka realidade,” Prezidente Komisaun B, Domingos Augusto “Deker” ba jornalista sira hafoin reuniaun ho Komandante Jerál PNTL Komisáriu Jerál Polísia  Henrique da Costa, no  Prezidente Komisaun Juri Rekrutamentu PNTL nu’udár Segundu Komandante Jerál Komisáriu Polísia Pedro Belo iha Kuartel Jerál PNTL, Sesta (13/02/2026).

Nia hatutan, ohin foin to’o iha Komandu PNTL informasaun serteza ne’e kuandu komisaun B hasoru malu ho komisaun rekrutamentu.

“Publikasaun média balun bele loos no balun bele la loos, tanba ita seidauk hetan dadus konkretu,” Deputadu Domingos Augusto “Deker” afirma.

Komisaun B hakarak informa ba públiku presenza iha Kuartel Jerál PNTL la’ós mai halo manifestasaun, maibé  komisaun B kumpri nia papel hanesan reprezentante povu liu-liu hanesan responsavel bá área Negósiu Estranjeiru, Seguransa no Defeza, bazeia ba lamentasaun sira iha públiku liu-liu kandidatu kadetes sira.

“Lamentasaun liga ba rekrutamentu ne’ebé tuir sira nia hanoin katak mosu iregularidade iha ne’ebá, hanesan la iha tranparánsia, iha prarika familiarismu no favoretismu,  sasán sira ne’e hotu mak komisaun B mai buka konfirma ho Komandu Jerál PNTL,” Prezidente Komisaun B Domingos Augusto “Deker” haktuir.

Nia dehan, depois komisaun B simu lamentasaun sira ne’e, komisaun B rasik tenke deside hanesan reprezentante povu hala’o nia knaar tuir rezimentu PN nian, atu halo konfirmasaun bá Minitériu Interiór no  kontinua mai iha Komandante Jerál PNTL liu-liu ho prezidente komisaun juri  rekrutamentu Segundu Komandante Jerál Pedro Belo rasik atu halo konfirmasaun katak lamentasaun sira ne’e iha serteza ka lae.

Komisaun B mós kontinua halo vizita fiskalizasaun ba komisaun ba rekrutamentu atu hetan dadus ruma tuir papel Komisaun B nian hodi halo fiskalizasaun.

Deputadu Domingos Augusto “Deker”  esplika, husi ne’e Komisaun B nia parte mós kontribui liuhusi sira nia relatoriu, tanba komisaun B nia prinsipiu no pozisaun rekoñese katak iregularidade ne’e iha, maibé bazeia ba nesesidade Komandu PNTL nian.

Liu-liu preukupasaun menus rekursu umanus iha instituisaun PNTL ida ne’e, Komisaun B nia opozisaun antes kedas enves anula para depois lakon tempu tan, entaun di’ak liu suspende para depois parte hotu-hotu kontribui  ba hadia iregularidade hira ka failansu sira ne’ebé mak iha.

Prezidente komisaun B Domingos Augusto “Deker” hatutan, hanesan reprezentante povu hakruk no respeita nafatin prinsipiu separasaun poder, hanesan órgaun polítiku sira hala’o fiskalizasaun depois kontribui ba relatóriu.

“Komisaun B seidauk realsa buat ruma, hato’o buat ruma ba públiku, enkuantu seidauk kaer evidensia iha liman,” Domingos Augusto “Deker” tenik.

Prezidente Komisaun B afirma, nia la dehan membru atu kompete ne’e Deputadu nia oan, Ministru nia oan, polísia nia oan ka sidadaun baibain nia oan importante mak nia prienxe rekizitu sira. Maibé, buat ida favoretismu  mézmu la prienxe rekizitu mós tenke liu, ne’e komisaun B la tolera.

Iha fatin hanesan Komandante Jerál PNTL Komisariu Jerál Polísia Henrique da Costa hateten, vizita husi Komisaun B Parlamentu Nasionál atu hetan esklaresimentu kona-bá prosesu rekrutamentu.

“Komandante Jerál PNTL hamutuk ho prezidente juri simu vizita husi Komisaun B, hetan esklaresimentu ruma kona-bá iha prosesu rekrutamentu rasik, ne’ebé prezidente juri esplika ona,” Komisariu Jerál Polisia Henrique da Costa haktuir.

Komandu Jerál Henrique afirma, rekrutamentu nia baze prinsipál ida mak ne’e, iha prosesu ne’e tenke tau konsiderasaun, tau atensaun halo prosesu tenke tranparánsia.

“Hahú prosesu ida ne’ebé mak ho justu, ita iha tempu loron-20,  atu nune’e, servisu hamutuk hodi haree kona-ba ida ne’e,” Henrique da Costa informa.

Nia salienta, komisaun ne’e la’ós kompetensia komandante jerál nian hodi deside pesoal ruma atu ba tuur iha sekretáriadu ka komisaun juri ne’e kompetensia Ministru Interiór (MI).

Jornalista: Juvinal Cabral dos Santos