Hatutan.com, (17 Fevereiru 2026), Díli— Sistema sosa pulsa eletrisidade ka token pré-pagu Eletrisidade de  Timor-Leste,  Empreza Públiku (EDTL, E.P) avaria ka error durante loron rua ona, hahú  iha loron 16 to’o 17 fulan-Fevereiru ne’e.

Lee Mós: Dirijénte EDTL,E.P Kontínua Nonook ho Kazu Karreta Bucket Truck ho Kustu US$216,000.00

Kliente EDTL,E.P forma narok iha resintu edifisiu sentral EDTL,E.P iha Caicoli, Díli, hosi sosa token pré-pagu eletrisidade, Tersa kalan (17/02/2026). Foto/Mercelino Tomae

Tanba token pré-pagu eletrisidade avaria, afeta maka’ás ba ajensia autorizadu EDTL,E.P nian ne’ebé fa’an pulsa eletrisidade taka hotu no la funsiona. Nune’e, kliente EDTL sira iha teritóriu nasionál tenke ba sosa deit token  pré-pagu eletrisidade iha edifisiu EDTL.

Tuir observasaun Hatutan.com nian iha resintu edifisiu EDTL iha Caicoli Díli, to’o tuku 22:21 Otl, kliente sira forma narok no sena malu hodi bele sosa token pré-pagu EDTL.

Aguida  Maria Elo, hateten sira forma narok tanba  loja ka fatin sira fa’an token pré-pagu EDTL la bele fa’an token pré-pagu EDTL hanesna baibain tanba Sistema error.

“Ami atu  hola pulsa  eletrisidade iha Tasi-tolu dezde Segunda horsehik to’o Tersa-kalan ne’e, tenke forma narok tanba rona dehan sistema EDTL nian mak avaria hela,” nia hateten.

Aguida Maria Elo konta, ajénsia sira hatete katak problema ne’e la’ós husi sira-nia sistema, maibé tanba sistema sentrál EDTL mak error.

Sistema token pré-pagu eletrisidade avaria. nune’e, kliente sira EDTL,E.P tenke forma narok hodi bele sosa pulsa pré-pagu eletrisidade iha edifisiu sentrál EDTL,E.P iha Caicoli, Díli. Foto/Marcelino Tomae

Hatutan.com mós halo komfirmasaun ho  Komisáriu Korporativu EDTL,E.P,   Júlio de Jesus Gonçalves, liuhosi telefoneka rekoñese duni sistema EDTL avaria, no husu deskulpa bá públiku.

“Ami sujere bá  kliente no públiku katak  bele sosa direita token pré-pagu  iha EDTL Sentrál, ha’u orienta ona tékniku sira, katak ohin kalan ne’e sira rezolve kedas,” Júlio de Jesus Gonçalves responde ho badak de’it.

Nia dehan, tanba agora sistema avara hela ajénsia sira labele fa’an token pré-pagu eletrisidade, tanba ne’e, kliente ka abitante sira ne’ebé prezisa urjente tenke ba EDTL sentrál hodi sosa token pré-pagu.

“Agora kedas ha’u informa ona bá tekniku sira, ne’ebé ha’u dehan ha’u atu dehan sistema ne’e avaria seidauk to’o  loron tolu,” Júlio de Jesus Gonçalves hateten.

 Jornalista: Marcelino Tomae