Hatutan.com, (18 Fevereiru 2026), Díli– Sarani Katoliku iha mundu, Kuarta ne’e, hahú tama ba kuarezma liuhosi misa Kuarta-Feira Sinzas.

Masa Kuarta-Feira Sinzas iha Igreja São José Ai-mutin, Díli, 18 Fevereiru 2026. Foto/Zita Menezes

Iha Igreja São José Ai-Mutin, Díli padre selebrante Benekditus Nuha, hateten kuarezma mak tempu grasa no mizerikórdia nian ba sarani sira.

“Ita mai la’ós nu’udár ema perfeitu, maibé nu’udár labarik sira ne’ebé hakarak tebes atu fila ba Aman Nia uma. Ahi-kadesan sei grava iha ita-nia reen-toos sinál ida katak ita mai husi rai, fraku tebe-tebes, mortál, no limitadu, Maibé, iha duni ita nia frakeza sira ne’e, Maromak Nia domin serbisu. Kuarezma la’ós tempu tauk nian ba Maromak nia malisan, maibé tempu grasa nian, tempu mizerikordia nian,” Amu Benekditus Nuha  hateten iha misa kuarta-feira sinzas, 18 Fevereirtu 2026.

Amu Benekditus fó sasin Na’i Jezús hanorin srania sira atu reja, jezún, no fó ezmola ho fuan ne’ebé loos, la’ós atu ema seluk haree, maibé atu Aman ne’ebé iha segredu haree. Ohin loron, Maromak la husu ita atu sai perfeitu. Nia husu buat ida de’it fuan ne’ebé prontu atu fila.

Nia hateten, agora maka tempu, agora mak loron salvasaun nian,  tama iha tempu Kuarezma ida-ne’e ho esperansa, ho korajen atu muda, no ho konfiansa katak ita-nia Maromak mizerikórdia la’o hamutuk ho ita.  

“Ita tama iha Kuarta-Feira Sinzas, odamatan ba kuarezma,     hadomi kuidadu pasiente naruk domin boot ida-ne’e importante tebes ba ita hotu. Kuarezma la hahú husi laran tauk, tauk Maromak nia malisan, maibé husi esperansa ba Maromak Nia laran luak,” Amu Benekditus tenik.

Tuir nia, kuarezma la’ós de’it kona-bá arrependementu pesoál, maibé kona-bá arrependementu komunidade nian. Igreja la’o hamutuk. Tempu ida atu hadi’a relasaun sira ne’ebé kotu ho Maromak no maluk Sira, tempu ida atu rekonsilia ho ita-nia an rasik.

Kuarezma mak tempu atu reklama fali ita-nia identidade nu’udár ema ne’ebé Maromak hadomi, hadi’a digbifade nu’udár Maromak nia  oan ida-ne’e signifika, Igreja mak embaixadór rekonsiliasaun nian.  Amululik no sarani sira hotu maka embaixadór mizerikórdia nian.

Jornalista: Zita Menezes