Hatutan.com, (05 Marsu 2026), Díli-Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK) submete ona ba Minitériu Públiku (MP) kazu ofisiál FALINTIL-Forsa Defeza Timor-Leste (F-FDTL) husi unidade Polísia Militár (PM) na’in-rua ho naran inisiál WLC no A ne’ebé baku lesuk vítima ZFS.

Lee Mós: Deskonfia, Ofisiál Polísia Militár Na’in-rua Baku Lesuk ZFS

Portavós interinu Komandu Jerál PNTL, Superintendente Asistente Polísia Mouzinho T. Correia (klaran) halo konférensia imprensa iha salaun Minitériu Interiór, Kinta (5/03/2026). Foto/Juvinal Cabral dos Santos

“Prosesu ita halo ona identifikasaun ba pesoal na’in-rua ne’ebé suspeita involve ba kazu ne’ebé komete husi  elementu Polísia Militár (PM) ho  inisiál WLC ho A,” Portavós interinu Komandu Jerál PNTL, Superintendente Asistente Polísia Mouzinho T. Correia  informa ba jornalista sira iha sala konferénsia Ministériu Interior (MI),  Kinta (05/03/2026).

Polísia mós asegura ona ZFS iha uma mahon tanba vitíma presiza rekuperasaun mental no fizika husi violénsia ne’ebé membru Polísia Militár na’in-rua halo ba nia.

Fó hanoin fali katak, vitíma ho naran inisiál ZFS, Segunda 23 Fevereiru 2026, hale’u tuku 18:55 OTL, submete keixa kontra ofisiál Polísia Militár F-FDTL na’in-rua ho inisiál WLC ho A ne’ebé baku lesuk nia.

Informasaun ne’ebé vítima haktuir ba iha autoridade Polísia liuhusi Diresaun Servisu Investigasaun Kriminál (DSIK) katak krime ofensa integridade fizika grave ne’e akontese iha loron 05 fulan-Fevereiru 2026, tuku 12:00 meudia Otl, iha Fatuhada, Díli.

Relasiona ho kazu krime ofensa ba integridade fízika grave ne’e, Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK) rejistu ona ho NUK:0064/26-PNSIC.

Tuir Leí Kódigu Penál krime ne’ebé suspeitu nain-rua komete mak,  Tentativa iha  artigu 23°, Ofensa ba Integridade Fizika Grave ne’e iha artigu 146°, Ameasa iha artigu 157°, Maus-Tratus ba Konjuje iha artigu 154°, no Dekreitu-Lei númeru 07/2010 kona-ba Violensia-domestika.

Jornalista: Juvinal Cabral dos Santos