Hatutan.com, (29 Abríl 2026), Díli-Polísia Nasionál Timor-Leste (PNTL) submete ona evidésia droga ho kuantidade 1,040 grama ba Ministériu Públiku (MP).

Lee Mós: PNTL Detein Suspitu Na’in-Lima Ba Kazu Droga

Polísia aprezenta evidénsia kazu droga. Foto/Juvinal Cabral dos Santos

Xefe Operasaun Diresaun Servisu Investigasaun Kriminál (DSIK), Superintendente-Asistente Polísia Mouzinho Tavares Correia, Kuarta (29/04/2026), informa  evidénsia sira ne’ebé ekipa prende ne’e tipu droga pozitivu sabu-sabu  ho nia todan 1,040 grama,  telefone iPhone rua, no dokumentu karreta nian ida inklui osan US$280.00.

Iha loron 27 Abríl ne’e, Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK) hamutuk ho servisu sekreta sira, detein sidadaun  Indonézia na’in-haat ho Xinés na’in-ida (hamutuk na’in-lima) ne’ebé deskonfia envolve kazu droga sabu-sabu  iha área rua, maka hanesna ida iha área Comoro no seluk fali iha Akadiruhun.

“Husi operasaun ida-ne’e konsege deteta kazu droga oin rua, ema droga la hanesan, primeiru iha dadeer DSIK deteta kazu droga ho tipu ema uza no fa’an, ida-ne’e la hanesan ho faan, entaun iha dadersan ita konsege halo detensaun ba sidadaun estranjeiru na’in-haat, mane rua no feto rua, sira na’in-haat ne’e ita identifika no detein bainhira sira konsumu hela droga, entaun kazu ne’e ohin ita aprezenta ona iha MP,”  Superintendente-Asistente Polísia Mouzinho Tavares Correia, ba jornalista sira, Kuarta(29/04/2026).

Nia haktuir,  autoridade seguransa identifika atividade droga balun no iha tuku 22:00 Otl, halo operasaun ba dala-rua nia hodi halo detensaun ba sidadaun estranjeiru na’in-ida  mane, tanba komete halo tráfiku droga ilisítu iha rai laran.

“Kazu rua ne’e, ita aprezenta ba ona MP, ita hein katak tempu badak bele submete ba audénsia Primeiru Interogatoriu (PI),” Superintendente-Asistente Polísia Mouzinho Tavares Correia informa.

Tipu droga ne’ebé  iha depois autoridade seguransa halo ezame ba droga ida-ne’e deteta katak ida-ne’e ho tipu Fentanil/ sabu-sabu katak ida-ne’e la’ós foun,  mais ne’e klasifikasaun númeru 01, tuir lei númeru 2/2007 nia kona-ba droga Timor-Leste ninia.

PNTL husu ba Timor oan sira atu evita envolve iha atividade droga sira-ne’e no kuidadu an husi droga sira ne’ebé oras ne’e tama ona mai iha rai laran.

Autoridade sira rejistu ona kazu ne’e ho Númeru uniku krimi rua tanba iha diferensia lokál krime, ida mak NUK: 0153/26-PNSIC  kazu ilisítu droga iha área Comoro, no ida seluk rejistu ho NUK:0155/26-PNSIC kazu ilisítu droga iha área Akadiruhun.

Jornalista: Juvinal Cabral dos Santos