Hatutan.com, (21 Juñu 2026), Díli–Prezidente Repúblika (PR), Jose Ramos-Horta akompaña husi Ministru Transporte no Komunikasaun (MTK), Miguel Marques Gonçalves Manetelu no CEO Aero Díli, Lourenço de Oliveira ho Embaixadora Austrália iha Timor-Leste, Caitlin Wilson, Domingu (21/06/2026), halo vó inaugural  Aero Dili ho rota Díli-Darwin.

Lee Mós: Aero Díli Hahú Voo Inaugural Ba Kuala Lumpur ho Pasajeiru Na’in-93

Prezidente Repúblika, José Ramos-Horta akompaña vó inaugural Aero Dili husi Díli ba Darwin-Austrália, Domingu (21/06/2026). Foto/Espesiál

Prezidente Republika konsidera rute foun Aero Dili nian ne’e nu’udár pasu importante ba konetividade aero entre Timor-Leste ho nasaun viziñu no orgullu ba Timor-oan.

Iha lansamentu ne’e, Prezidente Ramos-Horta aprésia ba ezisténsia Aero Dili nu’udár kompañia Timor-oan nian ne’ebé lori bandeira Timor-Leste semo iha kalohan leten ba mundu.

“Desde inísiu Prezidente Repúblika foti pozisaun ida atu fó nia apoiu tomak ba inisiativa ne’ebé Aero Dili halo,” Xefe Estadu afirma iha nia diskursu.

Prezidente Repúblika hateten rota Darwin-Díli sai ponte importante atu fasilita movimentu ema nian. Objetivu prinsipál mak hodi hametin parseiria, haburas vida ekonomia, no harame tuirista iha Timor-Leste.

Tuir planu, vó foun ida ne’e sei hala’o semana ida dala rua, entre Domingu no Tersa-Feira husi oras tuku 8:00 Otl dadér oras Timor-Leste.

Prezidente Ramos-Horta kontinua husu atu Aero Dili fó nia prestasaun servisu ho di’ak hodi aumenta rute barak liután, liuliu rute sira ba nasaun iha ASEAN nian.

Bainhira to’o iha Aeroportu Darwin, Prezidente Repúblika agradese ba autoridade Norte Austrália nian ne’ebé simu vó husi Aero Timor-oan nian atu halo operasaun iha Austrália. “Nu’udár nasaun estratéziku ba Timor-Leste,” nia subliña.

Rota Dili-Darwin ne’e hein katak sei fasilita liután viajen ba sidadaun Timor-Leste, estudante, negosiante, no turista sira entre nasaun rua.

Biban ne’e, Ministru Transportes no Komunikasaun, Miguel Marques Gonçalves Manetelu, lori governu nia naran hato’o parabéns ba Aero Dili ba vizaun, kompromisu no determinasaun Aero Dili nia, hodi lansa servisu aéreu internasionál.

“Ida-ne’e maka marku signifikativu ida iha Timor-Leste nia viajen ba konetividade rejionál no globál ne’ebé boot liu,”  Ministru Miguel Manetelu afirma.

CEO Aero Dili, Lourenço de Oliveira entrega prenda ba Embaixadora Austrália iha Timor-Leste, Caitlin Wilson iha ámbitu vó inaugural Aero Dili ba Darwin. Foto/Espesiál

Tuir nian, ida-ne’e reflete Estadu Timor-Leste nia kompromisu koletivu atu hakbesik povu Timor-Leste, fasilita komérsiu no investimentu, promove turizmu no kria oportunidade foun ba kresimentu ekonómiku ne’ebé sustentável.

Ministru Miguel Manetelu hateten liu husi lansamentu vó Aero Dili ba Darwin ne’e hametin liután Timor-leste nia konetividade sai nafatin hanesan prioridade prinsipál ida husi Governu. Liuhusi Ministériu Transporte no Komunikasaun nia kompromisu u atu dezenvolve sistema transporte ida ne’ebé modernu, seguru, konfiável no efisiente ne’ebé promove dezenvolvimentu nasionál no hametin Timor-Leste nia integrasaun iha ekonomia rejionál no globál.

Lori governu nia naran Ministru Manetelu hato’o apresiasaun sinseru mós ba Governu Austrália no parseiru sira hotu nia kooperasaun no apoiu kontribui ona route foun ida-ne’e sai realidade.

CEO Aero Dili, Lourenço de Oliveira, agradese ba entidade hotu nia suporta  hodi Aero Dili bele aumenta tan vó Dili-Darwin no ba fatin hotu-hotu.

Embaixadora Austrália iha Timor-Leste, Caitlin Wilson, hato’o  mós nia apresiasaun boot ba CEO Aero Dili, Lourenço de Oliveira no Austrália  konsidera ida-ne’e vó aviaun timor-oan nian da-huluk ba Austrália.

Embaixadora Caitlin Wilson  emosionante tebes tanba nu’udar parseiru belun ne’ebé la dook husi Timor-Leste no liuhosi aumenta konetividade ida-ne’e kontinua  promove negósiu entre povu Timor-Leste ho Austrália

Jornalista: Juvinal Cabral dos Santos