Hatutan.com, (22 Juñu 2026) Díli– Família no povu Timor-Leste tomak sente lakon boot ba falesimentu eis-Prezidente Republika no lider nasioná Francisco Guterres “Lú-Olo”.

Lee Mós: Timor-Leste Lutu Nasionál Loron Hitu Ba Falesimentu Eis-Prezidente Repúblika Francisco Guterres Lú-Olo

Saudozu Francisco Guterres “Lú-Olo. Foto/dok

Saudozu nia alin Domingos Guterres, hateten  triste ne’e la’ós família de’it, maibé povu tomak sente tanba lakon líder ida ne’ebé nonook no dedika aan ba nasaun.

“Ema hotu hatene katak, maun, aman, eis-Prezidente Repúblika laiha ona, momentu ida-ne’e ami família mós triste, agradese no solidáriu tomak ba parte governu, no partidu, ba povu tomak ninia apresiasaun boot ba aman ida ne’e ninia mate, triste boot ba família, triste mós ba nasaun no povu hotu-hotu,” Domingos Guterres hato’o lia hirak ne’e ba jornalista sira iha Saudozu nia rezidénsia iha Faról, Díli, Segunda (22/06/2026).

“Senáriu atividade hotu-hotu sei kompletamente aban mak ita bele ko’alia. Momentu ida-ne’e ami iha informasaun katak, Tersa dadeer, tuku 06:30 Otl, sei to’o iha Timor, mais ninia oráriu tomak seidauk iha data fiksu loos. Ne’e tentativa ida ne’ebé ami parte rua, governu, ohin ida ne’e hanesan komunikasaun inisiu ida, maibé aban mak sei hein to’o ita nia aman ninia espoza sei Timor mak ami deside hamutuk nune’e ba senáriu hirak sira ne’e,” Domingos Guterres informa

Familia too agora seidauk hatene ninia moras, só ne’e médiku sira mak bele esplika. Familia prepara de’it kondisaun mínimu atu simu eis-PR Lú-Olo nia mate isin mai, ida ne’e mak família nia prepara.

Família haktuir, nia sai husi Timor nia só preokupa de’it ho ninia moras de’it, maibé imi hatene katak, Prezidente ne’e ema ida ne’ebé nonook, nia la ko’alia barak.

Saudozu nia alin esplika, Saudozu sai husi Timor ba halo tratamentu iha Malázia iha loron 23 Maiu 2026. Hakotu iis Domingu-kalan, 21 Juñu,  mais menus tuku 10:00  oras Malázia.

“Ami simu informasaun nu’udar ema umanu, ami triste tanba ami lakon ami nia ema, ida ne’e família hotu-hotu ne’ebé iha, la’ós família de’it kuaze povu tomak triste nu’udar líder ida. Triste tomak mós ba ami família ida ne’e, ami lakon ami nia ema. Neste momentu ita bele dehan, tratamentu ne’e ha’u ladun akompaña nia prosesu sira ne’e maibé tratamentu sempre halo,” nia esplika.

Saudozu antes halo tratamentu iha Malázia, Saudozu mós halo ona tratamentu junta médiku husi HNGV mak transfere ba iha Malázia.

Iha fatin hanesan, saudozu nia feton Francisca Guterres hatete, hodikalan nia toba tiha ne’ebé ohin dader mak sira foin fó hatene.

“Tanba ha’u mós moras atan ida ne’ebé sira la fó hatene ha’u ida. Sente triste  agora ha’u nia alin mak ba tiha ne’e. Ami maun Alin  hamutuk na’in ualu, feton na’in  haat, mane na’in haat,” saudozu nia feton haktuir.

Jornalista: Juvinal Cabral dos Santos