Hatutan.com, (26 Juñu 2026), Batugade—Governu Timor-Leste liuhusi reuniaun  no desizaun Konsellu Ministru, dekreta toleránsia pontu loron tomak iha Sesta-ne’e (26/06/2026), hodi fó livre ba sidadaun hotu, funsionáriu instituisaun Estadu nian, direta no indireta,  atu presta omenajen ikus ba Saudozu eis-Prezidente Repúblika, Francisco Guterres “Lú-Olo”.

Timoroan barak aproveita tolerásia pontu hodi hakuur ba Indonézia liuhosi Postu Fronteira Batugade hodi ba feriadu fimda semana, Sesta (26/06/2026).

Iha situasaun seluk, Timoroan lubun ne’ebé horik iha Díli no maioria hanesan  funsionáriu iha administrasaun Estadu RDTL nian, aproveita toleránsia pontu ne’e hodi halo viajen no pasa ferias fimda semana iha Indonézia, liuliu iha Atambua ho Kupang-Timor Osidentál.

Toleránsia pontu  ne’ebé Governu deside atu iha loron Sesta-ne’e hodi fó liberdade ba sidadaun hotu atu akompaña transladasaun Sauduzu Lú-Olo nian to’o ba haloot iha Jardin Eroi sira-nian iha Metinaro, maibé ema balun aproveita ba Indonézia liuhosi postu fronteira Batugade, Postu Administrativu Balibo, Munisípiu Bobonaro ho durasaun tempu Sesta-Sábadu (fimda Semana) no Domingu ka Segunda mak fila mai hodi bele tama servisu.  

Tuir observasaun Hatutan.com nian iha Postu Fronteira Batugade, Timor-Leste no Postu Fronteira Motain, Indonézia, ema atus-liu, maioria ho pasaporte Timor-Leste nadodon iha odamatan postu fronteira nian hakat tama ba Indonézia, liusu Atambua, kapitál Rejénsia Belu nian.

Bainhira portaun postu fronteira Batugade, Timor-Leste nian loke iha tuku 09:00 Dader Otl, Timoroan sira ne’e nadodon hodi forma iha liña laran hodi aprezenta sira-nia dokumentu halo viajen ba Atambua no balun liubá Kupang.  

Primeiru-Ministru interinu Mariano Assanmi Sabino, dekreta  toleránsia pontu ba loron tomak,  Sesta, 26 Juñu 2026, tanba serimónia funerál eis-Prezidente Repúblika Francisco Guterres “Lú-Olo”, ne’ebé sei hakoi iha Jardín Eroi  sira-nian iha Metinaro.

Apriveita toleránsia pontu ba Indonézia liuhosi postu fronteira Batugade.

Funsionáriu públiku sira livre atu fó omenajen ba eis-Prezidente no lider nasionál Francisco Guterres “Lú-Olo” durante tempu tomak toleránsia pontu nian  bainhira maktoban sai husi nia rezidénsia Farol ba  Komité Sentral FRETILIN (CCF), Kuartél-Jerál F-FDTL, Palásiu Prezidensiál, Katedrál no Parlamentu Nasionál molok ba haloot iha Metinaro.

Medida ne’e, publika iha despasu ofisiál, abranje funsionáriu, ajente no traballadór hotu-hotu iha administrasaun direta Estadu nian, servisu sentrál no deskonsetradu, nune’e mós organizmu administrasaun indireta nian, ne’ebé hakarak fó omenajen ikus ba Eroi Nasionál Francisco Guterres “Lú-Olo”.

Traballadór hosi servisu públiku ne’ebé nia natureza ezije funsionamentu nafatin iha loron ne’e la tama iha toleránsia pontu. Dirijente másimu sira tenke garante dispensa hanesan iha data seluk, la prejudika kontinuidade no kualidade servisu públiku nian.

Jornalista: Marcelino Tomae