Hatutan, (27 Juñu 2026), Díli-Vise- Ministru Fortalesimentu Institusional Saúde, José Magno ho médiku sirurjiaun Ospitál Nasionál Guido Valadares, Alito Soares akompañia husi Embaixadór Timor-Leste ba Malázia, Lisualdo Gaspar, Sábadu (27/06/2026), iha Palásiu Sinzas, halo konferénsia imprensa, hodi esplika tratamentu saúde eis-Prezidente Repúblika (PR), Francisco Guterres “Lú-Olo” to’o husik iis.

Vise- Ministru Fortalesimentu Instituisional Saúde, José Magno ho médiku sirurjiaun HNGV, Alito Soares akompañia husi Embaixadór Timor-Leste iha Malázia, Lisualdo Gaspar, halo esplikasuan ba públiku kona-bá tratamentu saúde eis-PR Francisco Guterres “Lú-Olo” to’o husik Iis. Foto/Juvinal Cabral dos Santos

Prezidente Asembleia Konstituente, eis-Prezidente Parlametu Nasionál  no eis-Prezidente Repúblika, Saudozu Francisco Guterres “Lú-Olo” husik iis iha  Domingu, 21 Juñu 2026, bainhira halo tratamentu intensiviu iha kuidadu intensive (ICU), Ospitál Prince Court iha Kuala Lumpur,  Malázia.  

Médiku sirurjiaun ne’ebé akompaña eis-Prezidente Repúblika, Francisco Guterres Lú-Olo ba iha Ospitál Prince Court iha Kuala Lumpur,  Malázia, esplika  katak Saudozu Prezidente FRETILIN Francisco Guterres “Lú-Olo” halo operasaun iha loron 09 fulan-Juñu iha Malázia no hela iha kuidadu intensivu (ICU) durante loron 12 no la rekupera to’o hakotu iis.

Médiku sirurjiaun HNGV, Alito Soares, ne’ebé akompaña saudozu Lú-Olo husi Díli to’o nia husik iis iha Ospitál Prince Court, haten saúdozu Lú-Olo hetan tratamentu antes nia transferénsia no esplika tan katak tuir konsulta husi ekipa kardiolojia iha HNGV, identifika ona kondisaun médiku oioin, no kazu ne’e submete ba junta médiku ida, espesifikamente liuhosi kanál ne’ebé dezignadu ba veteranu sira.

“Aprovasaun ba transferénsia hetan iha loron 20 fulan-Maiu tinan 2026. Loron tuirmai, konsellu hasoru malu, aprova prosesu, no haruka ba Ministru Saúde, ne’ebé fó aprovasaun kedas. Saída inisialmente marka ona ba loron 22 Maiu atu halo evakuasaun, maibé Saudozu Lú-Olo rasik husu atu adia to’o loron tuir mai. Tanba ne’e, evakuasaun médiku emerjénsia nian akontese iha loron 23 fulan-Maiu. Viajen ba Malázia la’o ho di’ak,” Alito Soares  informa.

Médiku ne’e haktuir bainhira to’o iha Malázia, ekipa médiku transporta kedas ho ambulánsia ba Sentru Médiku Prince Court no hetan tratamentu husi ekipa multidisiplinár ne’ebé inklui sirurjiaun vaskulár, kardiólogu, intensivista, anestesiólogu, pulmonólogu, no nefrolójiku.

Nia hatutan ekipa iha ospitál  Prince Court hala’o avaliasaun kle’an ida no deside atu kontinua ho preparasaun pré-operatóriu sira. Planu maka atu avansa ho sirurjia, ne’ebé ikus mai hala’o iha loron 09 fulan-Juñu tinan 2026.

Tuir operasaun, ekipa médiku deside hodi mantein Lú-Olo iha ICU. Maibé, eis-Prezidente Repúblika no lider nasionál nia kondisaun saúde  la  rekupera.

“Durante loron 12 ne’ebé nia pasa iha kuidadu intensivu, saudozu Francisco Guterres Lú-Olo la rekupera no ikus mai hakotu iis iha kalan 21 Juñu ne’e,” Alito Soares hateten.

Sirurjiaun ne’e deklara katak nia simu ona autorizasaun espresa hosi feto-faluk atu fó sai informasaun ne’e ba públiku.

Alito Soares   hateten hanesan médiku ne’ebé atende Sauduzu Lú-Olo, ne’ebé konsidera besik ba família hanesan maun ki’ik ida hato’o informasaun jerál hodi  mantein konfidensialidade hosi saudozu Francisco Guterres Lú-Olo  nia família tomak.  

Kona-ba kauza hakotu iis,  Alito Soares hateten étika médiku no devér konfidensialidade, hodi husu atu asuntu ne’e labele fó sai ba públiku.

“Ha’u husu komprensaun hosi ema hotu, hodi nune’e, asuntu ne’e hetan tratamentu ho respeitu, hodi hanoin sirkunstánsia triste sira ne’ebé ita hasoru daudaun. Ha’u husu mós atu tema ne’e labele espozitu ba konsumu públiku liu fali saida maka apropriadu,” Alito Soares afirma.

Iha konferénsia imprensa ne’e, Embaixadór Timor-Leste nian iha Malázia, Lisualdo Gaspar, fó sai katak Embaixada akompaña ona eis-PR Lú-Olo ba konsulta sira antes evakuasaun fulan-Maiu nian, hodi fornese apoiu no asisténsia másimu ne’ebé posivel durante nia estadia iha Kuala Lumpur.

Bainhira to’o notísia katak eis-PR Lú-Olo sei halo viajen iha voo espesiál iha loron 23 fulan-Maiu, Embaixada prepara atu simu nia iha aeroportu, maibé ospitál la espesifika aeroportu rua Kuala Lumpur nian ne’ebé maka sei uza.

Embaixadór Lisualdo Gaspar esplika katak ospitál rekomenda ona atu resepsaun ne’e hala’o diretamente iha instalasaun ospitál nian.

“Iha ha’u nia kapasidade nu’udar Embaixadór, ha’u ba ospitál hodi hein Sua Exelénsia no simu nia pesoalmente bainhira nia to’o iha kalan loron 23 nian,” Embaixadór Lisualdo Gaspar hateten.

Hafoin operasaun iha loron 09 fulan-Juñu, embaixadór ne’e rasik vizita eis-PR Lú-Olo iha loron 10 no  iha loron tuir mai iha  loron 12 fulan-Juñu.

Embaixadór Lisualdo Gaspar akompaña Saudozu Lú-Olo nia mate-isn to’o iha Dili iha loron 22 fulan-Juñu.

Jornalista Hatutan.com husu kona-bá saudozu Francisco Guterres Lú-Olo antes ba halo tratamentu iha Malázia ne’e demora tiha tanba saida? maibé, pergunta refere Vise-Ministériu Saúde José Magno, hatan de’it dehan, “Ne’e junta médiku mak hatan, ha’u hanoin ita  taka tiha, depois ita-boot sira ba  husu iha klínika veteranu iha HNGV”.

Iha konferensia Imprensa Vise-Ministru  Fortalesimentu Instituisional Saúde, José Magno hahú ho omenajen ikus bá saudozu Francisco Guterres Lú-Olo.

“Hanesan ita hotu hatene DR. Francisco Guterres  Lú-Olo fila ikas ona ba Aman Maromak Nia Kadunan Santu, iha Domingu 21 fulan-Juñu tinan 2026, hale’u tuku 21:16 Oras Malázia nian, lori Ministériu Saúde (MS) nia naran hato’o solidaridade kle’an ba família tomak ne’ebé husik hela”, Vise-Ministru  Saúde, José Magno hateten.

“Antes halo komunikadu ne’e mós ha’u lori Ministériu Saúde nia naran halo koordenasaun ho família Saudozu nia espoza, kona-ba komunikadu imprensa ne’ebé mak ita fó sai ne’e,” Vise-Ministru Saúde José Magno hateten tan.

Nia hatutan, saudozu nia espoza hateten hela katak bele halo Konferénsia imprensa, maibé ko’alia asuntu jerál de’it labele foka liubá tratamentu saudozu nian, tanba ne’e la iha perguntas no resposta.

Jornalista: Juvinal Cabral dos Santos