Hatutan.com, (04 Setembru 2026), Díli– Autoridade Protesaun Sivíl (APC) konfirma katak predisaun rai-nakdoko iha teritóriu Timor-Leste ne’ebé esplla iha média sosiál Facebook no iha grupu WhatsApp  sira-ne’e fake news ka hoax.

APC konfirma informasaun kona-bá predisaun rai-nakdoko iha Timor-Leste ne’e hoax. Foto/Repro

Prezidenti Autoridade Protesaun Sivíl (APC), Jesuino dos Reis Matos, husu ba públiku atu labele paniku, rona ka fiar kedas, no evita fahe informasaun falsu ka hoax kona-bá fenómenu rai-nakdoko no ameasa tsunami.

“APC husu ba komunidade atu labele fiar no fahe informasaun hoax kona-bá rai-nakdoko ka tsunami, maibé tenke buka informasaun hosi fonte ofisiál no autoridade kompetente. Medida ne’e importante atu evita pániku no konfuzaun iha komunidade, no permite públiku simu orientasaun loos bainhira iha situasaun emerjénsia,” Jesuino dos Reis Matos haktuir iha konferénsia imprensa iha edifisiu APC, Díli, Sesta (04/09/2026).

Nia hateten katak, to’o agora seidauk iha fonte kredível ka detesaun téknika ne’ebé bele konfirma katak rai-nakdoko sei akontese iha oras ka tempu espesífiku.

Jesuino dos Reis Matos  rekoñese Timor-Leste iha duni risku ba rai-nakdoko, maibé to’o agora seidauk iha detesaun ne’ebé konfirma akontesimentu rai-nakdoko iha Timor-Leste. Maibé, rai-nakdoko ne’ebé akontese iha rai vizinu Indonézia,  liuliu iha Illa Flores bele afeta mai Timor-Leste.

Nia hatutan, iha duni informasaun kona-bá risku rai-nakdoko, maibé iha área sira iha Sumatra, Sulawesi, Java no Kupang (Flores). Ita iha risku, maibé rai-nakdoko ka vulkánu iha Indonézia bele rebenta no bele afeta to’o mai Timor-Leste.

“Iha loron hirak liubá akontese rai-nakdoko iha Beasu, Viqueque,  maibé iha tasi klaran no dook uitoan,”  Jesuino dos Reis Matos   informa.

APC kontinua husu ba komunidade atu labele paniku bainhira rona informasaun ne’ebé espalla liuhosi média sosiál no presiza kontaktu autoridade kompetente atu hetan esplikasaun no klarifikasaun hodi bele iha informasaun kredivel.

Prezidenti APC mós esplika kona-ba sistema sirene ne’ebé uza atu fó sinal ba komunidade bainhira iha situasaun emerjénsia ne’ebé koloka iha área rua, inklui iha área Comoro, parte Aeroportu Internasionál  Prezidente Nicolau Lobato, agora la funsiona tanba seidauk halo manutensaun no sirene ida ne’ebé koloka iha Largo Lecidere mak sei funsiona di’ak.

Jesuino dos Reis Matos mós husu ba komunidade atu fó atensaun ba anin boot ne’ebé akontese agora, liuliu ba família sira ne’ebé uma hela besik ai-hun boot, tanba anin-boot bele hamosu risku ba vida no propriedade. (*)