Hatutan.com, (05 Setembru 2026) Díli – Kompañia nasionál TIMOR GAP, E.P. estabelese akordu vinkulativu ida hodi sosa empreza Osaka Gas Austrália nia partisipasaun tomak 10% iha projetu Greater Sunrise.

Imajen/Dok. TIMOR GAP

Ho desizaun ne’e  fó vantazen boot ba aumenta Timor-Leste nia partisipasaun iha konsórsiu ba 66,56% iha empreza konjunta Greater Sunrice.

Komunikadu imprensa TIMOR GAP nian ne’ebé Hatutan.com sita, haktuir akizisaun ne’e kobre partisipasaun sira Osaka Gas Austrália nian iha kontratu fahe produsaun rua hosi Área Dezenvolvimentu Petrolíferu Konjuntu (PSC 03-19 no PSC 03-20) no arrendamentu retensaun australianu rua (NT/RL2 no NT/RL4), bainhira hein hela kontratu finál hosi fahe produsaun úniku ida iha ámbitu Tratadu Fronteira entre Timor-Leste no Austrália.

TIMOR GAP, E.P. maka empreza petrolífera nasionál Timor-Leste nian, ne’ebé kria hodi jere partisipasaun Estadu nian iha atividade sira esplorasaun no dezenvolvimentu petróleu nian, ho objetivu ne’ebé deklara ona atu maximiza valór ba tempu naruk hosi rekursu idrokarbonetu sira nasaun nian ba populasaun timoroan.

Prezidente no CEO TIMOR GAP, Rui Soares, haktuir iha komunukadu ne’e katak akizisaun ne’e hanesan marku signifikativu ida ba TIMOR GAP no ba Timor-Leste.

Rui Soares fundamenta katak, konsolidasaun partisipasaun sira iha projetu no hametin Timor nia pozisaun globál tenke permiti  hodi aselera serbisu pendente sira ba selesaun konseitu dezenvolvimentu LNG Timor nian iha tempu badak.

Rui Soares hatutan operasaun tenke hadi’a mós aliñamentu iha ámbitu Empreza Konjunta Sunrise nian, hodi hakbesik parseiru sira ba desizaun ikus ida investimentu nian ne’ebé desblokeia valór hosi rekursu Greater Sunrise nian ba benefísiu hosi povu timoroan, membru sira hosi empreza konjunta, no parte interesada sira seluk.

Ida-ne’e la’ós ba dahuluk  TIMOR GAP  hametin nia pozisaun iha Greater Sunrise tanba iha fulan-Abril 2019, TIMOR GAP kompleta sosa partisipasaun 30% hosi ConocoPhillips no partisipasaun hosi Shell Austrália hosi 26,56% iha projetu, iha akordu ho valór millaun US$650, ne’ebé finansia liuhosi empréstimu hosi Fundu Petrolíferu Timor-Leste.

Operasaun ida ne’e tuir mai fó ba Timor-Leste partisipasaun maioria 56,56% iha konsórsiu, hamutuk ho operadór Woodside Energy, ho 33,44%, no Osaka Gas, ho restu 10%.

Estrutura partisipasaun hosi konsórsiu Greater Sunrise fahe entre parseiru rua de’it: TIMOR GAP, ho 66,56%, no Woodside Energy, hanesan operadór, ho 33,44%.

Kampu gás no kondensadu Sunrise no Troubadour, koñesidu koletivamente ho naran Greater Sunrise, lokaliza maizumenus kilómetru 150 ba sudeste Timor-Leste nian no kilómetru 450 ba noroeste Darwin nian, iha Territóriu Norte Austrália nian.

Projetu ne’e iha rekursu kontinjente sira ne’ebé kalkula iha 5.13 trillaun pés kúbiku gás nian no 225.9 millaun barríl kondensadu nian.

Tuir Tratadu Fronteira Marítima 2018 nian, maizumenus 70% kampu Greater Sunrise lokaliza iha tasi Timor nian.

Tratadu ne’ebé hanesan estipula katak reseita ne’ebé hetan hosi projetu ne’e sei fahe 70/30 ba favor Timor-Leste nian karik dezenvolvimentu ne’e inklui gazodutu ida ba teritóriu timoroan, sa’e ba 80% karik gás ne’e prosesa iha Austrália – kestaun ida ne’ebé sai nu’udar sentru ba impase liu dékada ida kona-ba lokalizasaun ba futuru fábrika LNG nian. (*)