Reportajen: Maria Angelita Sandi Belo

 Hatutan.com, (24 Setembru 2026) Díli – Ministru Petroleu no Rekursu Minerál, Francisco da Costa Monteiro, prevee katak produsaun husi projetu Greater Sunrise bele hahú iha tinan 2034.

Foto/Repro.Timor Gap

Ministru Francisco da Costa Monteiro ba jornalista sira iha Díli, Kinta (24/09/2026), konfirma katak produsaun projetu ne’e prevee iha tinan 2034  liga ho prosesu avaliasaun foun kona-bá kondisaun merkadu mundiál no finalizasaun dokumentu legal sira  tanba prosesu atu lori dezenvolvimentu Greater Sunrise  mai Timor-Leste sei depende ba finalizasaun dokumentu sira ne’ebé relasiona ho projetu ne’e.

Nia hatete refere ba komunikasaun no prosesu negosiasaun ne’ebé hala’o ona antes, maka Governu konsidera tinan 2032 hanesan tempu posivel ba produsaun. Maibé, governu agora presiza reavalia tempu ne’ebé realistiku, konsidera kondisaun merkadu mundiál no asuntu tékniku sira ne’ebé sei presiza rezolve.

“Ita bele dehan produsaun ida ne’ebé realistiku liu agora ba oin ne’e 2034,” Fransisco da Costa Monteiro afirma tan.

Nia adianta kona ba ekipa téknika Timor-Leste no Austrália hala’o ona servisu iha kampu iha Austrália. Dokumentu prinsipál tolu ne’ebé sei sai nu’udar enkuadramentu legal ba dezenvolvimentu Greater Sunrise mós finaliza ona iha fulan kotuk.

Dokumentu sira ne’e agora iha prosesu aprovasaun iha parte Austrália no Timor Leste hafoin lori ba aprezenta ba Parlamentu Nasionál husi nasaun rua atu halo apresiasaun no aprovasaun, ne’ebé bele hala’o iha fulan rua tolu tuir mai.

Dokumentu prinsipál tolu ne’e inklui Petroleum Mining Code, Fiskál Regime no Biosafety, ne’ebé importante atu estabelese enkuadramentu legal no regulatóriu ba dezenvolvimentu projetu Greater Sunrise.

Tuir nia, iha tinan 2027 prosesu sei avansa ba konseitu úniku, hanesan parte husi esforsu atu kontinua dezenvolve projetu ne’e tanba dezenvolvimentu Greater Sunrise iha potensiál boot atu aumenta rendimentu Estadu, kria oportunidade empregu no kontribui ba dezenvolvimentu sosiuekonómiku Timor-Leste.

Refere  ba estudu ne’ebé hala’o iha tinan 2024, Ministru Francisco Monteiro haktuir,  projetu ne’e bele lori benefísiu finanseiru liu husi  billaun US$50 ba Estadu Timor-Leste, aumenta Produtu Internu Brutu (PIB) no kria  empregu liu 17.000. (*)