Jornalista: Felix Fernandes

Hatutan.com (26 Outubru 2026) Dili— Guvernu Timor-Leste liu husi Ministériu Transporte no Komunikasun (MTK) ho  Autoridade da Aviação Civil de Timor-Leste, Institutu Públika (AACTL,I.P) no Administração de Aeroportos e Navegação Aérea de Timor-Leste, Empreza.Públika (ANATL,E.P) halo hela esforsu ba kompañia Waskita Karya ne’ebé mak halo konstrusaun ba Aeroportu internasionál Prezidente Nikolau Lobato ne’ebé nia progresu sei  la’o tarde.

Ekipa pezadu sira koloka iha projetu konstrusaun aeroportu internasionál prezidente Nicolau Lobato. Foto/Felix Fernandes

Ministru Transporte no Komunikasun, Miguel Marques Gonçalves “Manetelu”, Segunda  (26/10/2026/), konfirma  katak, daudaun ne’e sira halo hela esforsu ba kompañia estatál Indonézia nian, Waskita Karya ne’ebé  mak halo hela konstrusaun ba aeroportu internasionál Prezidente Nicolau Lobato ne’ebé mak dadaun ne’e la’o tarde tanba Aeroportu ne’e hanesan infraestratura kritiku no estratejiku liuliu ba lideransa Timor-Leste nian ba ASEAN iha tinan 2029,

“Hanesan Timor-oan no liuliu MTK ho h’au nia ekipa Autoridade da Aviação Civil de Timor-Leste, Institutu públika (AACTL,I.P) ho Administração de Aeroportos e Navegação Aérea de Timor-Leste, Empreza.Públika (ANATL,E.P), ami halo hela esforsu no buat hotu ami halo para asegura katak aeroportu ne’e tenke hotu tanba ne’e la’ós interese MTK nian, maibé ne’e interese nasionál no nasaun nian, ita iha kalemdáriu polítiku atu lidera ASEAN ne’ebé aeroportu ne’e tenke finaliza,” Ministru Miguel Manetelu hateten.

Maske Ministru Manetelu rekoñese konstrusaun iha terenu la’o tarde, maibé esforsu sira ne’ebé mak sira  halo ho  Guvernu Indonézia hodi dudu Empreza Waskita Karya tenki halo projetu ne’e hotu ho lalais maske ritmu ne la’o tarde,

Iha sorin seluk Prezidente Komisaun E Parlamentu Nasionál,  Marcos Xavier hateten Timor-Leste iha aeroportu internasionál ida de’it, tanba fiar katak ho ezekusaun MTK nian la’o di’ak tanba ne’e molok fulan-Dezembru sira nia ejukasaun bele sa’e to’o 85%

“Konstrusaun ba Aeroportu lao hela tanba ita iha Aeroportu Internasionál ida de’it, loos duni ita haree konstrusaun la’o tarde uitoan maibé MTK nia ejekusaun la’o di’ak sira iha kompromisiu, ha’u fiar katak molok to’o fulan-Dezembru, tinan ne’e, sira nia ejekusaun bele sa’e to 85%,”  Deputadu Marcos Xavier hateten. (*)