Jornalista: Maria Angelita Sandi Belo

 Hatutan.com, (27 Outubru 2026) Díli—Prezidente Komisaun Reguladora Arte Marsiál (KRAM), Octavio da Conceição, konfirma  katak kazu omisídiu ne’ebé akontese iha Suku Kotamutu, Postu Administrativu Luro, Munisípiu Lautém, iha loron 23 Outubru 2026, laiha relasaun ho arte-marsiál, maibé problema individuu sira.

Insidente ne’e rezulta sidadaun ida lakon vida, enkuantu ema na’in-rua seluk sofre kanek, ho kondisaun ida kanek todan no ida seluk kanek kmaan. Autoridade seguransa mós detein ona suspeitu na’in-haat ne’ebé liga ho kazu refere.

Octavio da Conceição esplika katak, bazeia ba informasaun ne’ebé iha, konflitu ne’e hahú husi problema entre kondutór no pasajeiru, ne’ebé hamosu diskusaun no ikus mai rezulta sona malu.

Nia subliña katak, ema ne’ebé  sona la’ós membru arte-marsiál, maski sidadaun ne’ebé lakon vida mak membru organizasaun arte-marsiál ida.

“Konflitu arte marsiál mak bainhira grupu sira ne’ebé uza farda organiza-an atu tuku malu, oho malu ka hamosu problema, ida-ne’e mak ita konsidera konflitu arte-marsiál,” dehan Prezidente KRAM, Octavio da Conceição iha konferénsia imprensa iha salaun Dalan ba Dame KRAM, Lesidere,  Segunda, (26/10/2026).

Nia hatutan, bainhira problema akontese entre individu sira no la iha ligasaun ho atividade organizadu husi arte-marsiál, responsabilidade kriminál tenke atribui ba individu ne’ebé komete aktu refere, tuir gravidade krime ne’ebé nia halo.

Tuir nia, investigasaun importante atu determina ho klaru kauza no natureza konflitu ne’e, inklui atu hatene se iha duni ligasaun ho organizasaun arte marsiais ruma.

“Ohin loron, Timoroan barak mak prátika arte marsiais, bainhira problema akontese no ema la temi problema ne’e hanesan problema individu nian, maibé liga kedas ho organizasaun arte marsiais, situasaun ne’e bele hamosu interpretasaun ne’ebé la loos,” nia dehan.

Durante períodu konsolidasaun loron 90, KRAM sei kontinua halo diálogu ho lider organizasaun arte marsiál no joven sira atu garante katak individu ida-idak responsabiliza ba aktu ne’ebé nia komete, la’ós lori responsabilidade ba organizasaun tomak.

Nia afirma, se investigasaun prova katak konflitu ida iha duni bazeia ba arte marsiais, autoridade sei aplika lei no prosedimentu legál ne’ebé relevante, inklui dispozisaun legál kona-ba prevensaun no kontrolu ba konflitu ne’ebé iha ligasaun ho arte marsiais.

KRAM hein katak, liuhusi implementasaun lei no kooperasaun ho lider organizasaun sira, bele hametin responsabilidade individuál no prevene atu problema pesoál la sai razaun atu atribui responsabilidade ba organizasaun arte marsiál tomak. (*)