Hatutan.com, (15 Outubru 2022), Díli—Durante missa agradesimentu bá komemorasaun tinan 47, trajédia Balivo 5, ne’ebé hala’o iha Igreja Parókia Santu António Balibo Vila, Munisipiu Bobonaro, selebrante Padre Eko Aroon, SVD reza ba jornalista estranjeiru na’in-lima ne’ebé mate hodi defende lia-loos, no husu ba jornalista Timoroan sira atu banati tuir espríritu ida ne’e iha knaar ida ne’e.

Fotografia Jornalista na’in lima ne’ebé mate iha trajédia Balibo, iha Kinta, 13 Outubru 1975.

“Hanesan ita-nia jornalista sira na’in-lima mate iha tinan 1975, tanba sira hamriik bá lia-loos. Lorloron, jornalista sira hasoru problema iha mundu tomak, no mate iha mundu tomak, tanba sira hamriik bá lialoos. Ita rez aba jornalista Timoroan sira atu banati tuir hodi sempre hamriik defende lia loos,” Pároku Parókia Santu António Balibo, Eko Aroon, SVD hateten iha omília, Sábadu (15/10/2022).

Lee Mós: CI Gasta $39.200 bá Komemorasaun Tinan 47 Trajédia Balibo V

Iha omilia ne’e, nia esplika Jesus mai iha mundu, atu kriatura sira bele hetan moris abundánsia. Nia moris hanesan ema, hetan terus no mate iha Kruz, no moris hias hosi mate. Bainhira hanesan sarani  selebra missa, ne’e katak, fó hanoin kona-bá Jesus Nia terus, mate no moris hias.

Advertisement

Nu’udár ema sarani iha fiar bá Igreja Katólika, Padre Eko Aroon, husu ema hotu atu brani hodi hamriik, bá lia-loos, dala-barak ema tauk, atu fó sasin kona-bá lia-loos. Nu’udár sarani, ema ida-idak bele haree ninia moris hanesan viájen ida, hanesan peregrinu bá Aman-Maromak, oinsá ninia viájen depende bá ema ida-idak.

Missa agradesimentu bá komemorasaun tinan 47, trajédia Balivo 5, ne’ebé hala’o iha Igreja Parókia Santu António Balibo Vila, Munisipiu Bobonaro, Sábadu (15/10/2022). Foto Hatutan/Rogério Pereira Cárceres.

“Ita bele tuir dalan boot, ka dalan korta, depende bá ita. Maibé, bainhira ita mate, ita-nia etapa ikus ka, destinu ikus nian ita tama iha Maromak nia Reinu,” nia hateten.

Ohin, Sábadu (15/10/2022), sarani sira halibur malu iha Igreja hamutuk ho maluk jornalista sira atu agradese bá Maromak, tánba sira hetan forsa atu hala’o nia sira nia kna’ar lorloron nian, liuhosi Espíritu-Santu.

Tanba ne’e, agradese bá Maromak no bá jornalista sira na’in-lima ne’ebé mai iha Timor-Leste ho objetivu di’ak, maibé sira hasoru trajédia no mate iha fatin no fakar sira rán iha TL, iha rai Balibo.

“Ita reza bá sira, nune’e sira bele hetan rahun di’ak Maromak Nian, iha reinu Lalehan. Ita mós reza bá maluk jornalista sira hotu ne’ebé servisu iha rai TL, nune’e sira bele brani atu hasoru dezafiu, hamriik metin bá lia-loos, no fó sasin bá lia-loos. Espíritu Santu sei akompaña sira, gia sira, iha sira-nia servisu, amen,” Padre Eko Aroon, harohan.

Jornalista internasionál na’in-lima hosi Televizaun Australianu ne’ebé mate iha Trajédia Balibo, iha Kinta, 13 Outubru 1975 mak hanesan, Greg Shackleton (29) no Tony Stewart (21), ne’ebé hamutuk ho Gary Cunningham (27) hosi Nova Zelándia, ne’ebé servisu iha Estasaun Televizaun Channel Seven iha Melbourne, Brian Peters (26) no Malcolm Rennie (29) hosi Inglaterra no servisu bá Estasaun Televizaun Channel Nine, ne’ebé ho sentru iha Sydney ne’e, hela iha Balibo hodi halo kobertura relasiona ho operasaun segredu Indonézia nian iha Timor Portugés.

Advertisement

Jornalista: Rogério Pereira Cárceres