Hatutan.com, (15 Outubru 2022), Díli—Prezidente Conselho Imprénsa (CI), Virgílio da Silva Guterres, konsidera komunidade média iha Timor Leste laiha sentidu solidariedade ba kazu instalasaun Set-Top Box Rádiu Televizaun Timor Leste, Empreza Públika (RTTL,E.P).

Prezidente Konsellu Imprénsa (KI) Timor-Leste, Virgílio da Silva Guterres. Foto/Hatutan.com.

Konsiderasaun ne’e tanba tuir Prezidente CI nia haree katak, kazu ne’e sériu no asuntu públiku ne’ebé fó prezuizu ba Estadu ne’ebé tuir loloos sai asuntu kobertura média nian ho nia funsaun kontrolu sosiál.

Lee Mós: Deskonfia, MAPKOMS Nu’udar Prezidente FFTL Fó Projetu iha RTTL,E.P Ba Sekretaria FFTL

Kazu Instalasaun Set-Top Box RTTL,E.P, CAC “Borgol no Detein tán” Sekretária FFTL

Asuntu ida-ne’e líder másimu CI ne’e ko’alia repete ba dala tolu ona,  primeiru iha eventu Editors Club Discussion, ne’ebé oraganiza hosi Asosiasaun Jornalista Timor-Leste, segdundu iha diskursu aniversáriu Hatutan.com iha Suai Room Timor Plaza no terseiru durante intervensaun iha Forum Editoriál Nasionál iha Balibo, Sábadu (15/10/2022).

“Ema hotu hatene, ne’e Hatutan.com nia issue, la’ós média nasionál nia issue. Tuir loloos, problema ne’e nasionál, problema públiku ninian. Tanba sá mak Hatutan.com de’it mak lorloron kuaze de’it iha ne’ebá, média sira seluk la halo kobertura. Ne’e tanba média seluk falta solidariedade mós atu haree,” Virgílio hateten.

Virgílio mós sita kazu seluk tán hanesan iha tinan hirak liubá, kazu abuzu seksuál ne’ebé mak eis Padre ida iha Topohonis, ema hotu-hotu dehan, ne’e kazu Neon Metin ninian, maski kazu ne’e kazu públiku.

Ida seluk tan maka, kazu ne’ebé involve figura eminente Timor ninian ida, Bispu Dom Carlo Filipe Ximenes Belo, média sira iha Timor konsidera  kazu média estranjeiru nian, la’ós kazu Timor ninian.

“Mas loloos, média Timor mós buka hatene atu investiga. Sé hanoin atu nega, saida mak média internsioál fó-sai ne’e, falsu, la loos, ita halo investigasaun,” nia hateten.

Kona-bá ida ne’e, CI hanoin no konsilleiru sira hala’o debate iha plenária no deskobre katak, laiha sentidu solidariedade ne’e iha kauza balun hanesan seidauk iha korajen natoon, tanba koñesimentu seidauk natoon, atu argumenta ho faktus sira ne’e.

“Entaun, ida-ne’e mak ha’u dehan solidariedade profisionál entre média sira, entre jornalista sira, laiha,” subliña tán.

Nia mós fó foti referénsia ida iha tinan 2016 bainhira mosu buat ida iha Panamá Papers, papél des panáma, to’o agora, ema seidauk hatene buatamak ida fó dadus ne’e, kuaze  dokumentus ne’e rihun rahun loos maibé to’o agora nia naran ne’e, anónimatu hela.

Maski nune’e, jornalista sira la preokupa atu deskobre buatamak ne’e naran saida. Sira la preokupa, sira preokupa, tanba issue ne’ebé dokumentu fó sai ne’e issue públiku, issue transnasionál, entaun jornalista ida de’it hosi média Alemaña nian ne’ebé la brani atu halo kobertura mesak, entaun nia kontaktu média hotu-hotu iha mundu hanesan BBC, Aljazera, iha Amérika Latina, sira hamosu konsórsiu internasionál bá jornalista investigativu.

Hosi konsórsiu ne’e, sira tuur hamutuk, hamosu kódigu konduta oinsá identifika issue ne’e, issue ida ne’ebé mak atu sai uluk, sé mak fó sai uluk, sira kombina malu atu fó sai buat ne’ebé ikus mai, mosu mós Plataforma ida atu sir abele tuir.

“Ha’u hanoin katak, sé iha Timor, asosiasaun sira, jornalista sira, sé iha preokupasaun atu tuur hamutuk, diskute, debate, bele to’o tempu ida, hamosu mós Plataforma ida ne’ebé ikus mai sira bele deside dehan, issue ida ne’ebé mak ita tenke tau hamutuk,” nia salienta.

Iha kuarta (12/10/2022), bainhira partisipa iha seremónia aniversáriu ezisténsia Média Online Hatutan.Com, iha Suai Room, Timor Plaza,  Prezidente Konsellu Imprénsa, Virgílio da Silva Guterres ko’alia hodi toka mós kona-bá asuntu ne’e, dehan, Média no jornalista sira iha Timor-Leste, oras ne’e laiha sentidu solidariedade bá malu, tanba bainhira jornalista ida hasoru ruma, jornalista ne’e rasik mak enfrenta mesak nia problema.

“Buat ne’ebé mak ha’u ko’alia bebeik maka, hametin solidariedade entre meius de komunikasaun sosiál, nomós entre jornalista sira. Buat ne’ebé durante CI nota katak, jornalista sira ladún iha solidariedade, maka, kuandu Hatutan.com enfrenta problema ruma, média seluk husik Hatutan.com de’it mak enfrenta mesmesak. Bainhira maun António Sampaio hasoru problema, nia mesak mak enfrenta,” Prezidente CI ne’e hateten.

Tuir Virgílio, solidariedade la’ós dehan tenke konkorda malu, dala-ruma iha konteúdu ka informasaun balun ne’ebé mak falta rigór, falta ballansu. Entaun, apoiu solidariedade bá malu ne’e hanesan apresiasaun krítika hosi jornalista, hosi média atu hadi’a konteúdu.

Maibé, importante liu maka, Kritika no debate sira iha públiku, debate sira ne’ebé mak tenke bazeia bá argumentu, la’ós debate ida ne’ebé mak bazeia bá sentimentu, rasísta, ida-ne’e mak mósu barak liu iha média sosiál.

Antes ne’e, iha eventu Editors Club Discussion, ne’ebé organiza hosi Asosiasaun Jornalista Timor-Leste (AJTL), Prezidente CI Virgílio da Silva Guterres, hato’o katak média iha Timor-Leste ninia problema maka falta atu fó solidariedade bá malu.

“Bá kazu Hatutan.com, buat ida ne’ebé ke ha’u nota ne’e mak ne’e, média TL laiha solidariedade bá malu. Hosik Hatutan.com mesmesak mak halo kobertura kona-bá ida-ne’e. Média seluk la halo kobertura no ikus mai, ema hanoin katak ne’e problema entre Hatutan.com MAPKOMS. La’ós ne’e problema nasionál,” nia ko’alia.

Tuir loloos kazu ida hanesan ne’e, kazu públiku, entaun média hotu-hotu tenke buka tuir, iha ne’ebé, média ida levanta ona hanesan Breaking News, média seluk mós tenke bá ona atu fó-sai.

Jornalista: Rogério Pereira Cárceres