Hatutan.com, (21 Outubru 2022), Díli—Ekipa investigadór no instrutór hosi Diresaun Jerál Servisu Migrasaun, servisu hamutuk ho Organizasaun Internasionál ba Migrasaun (IOM), kontinua halo sosializasaun bá lei Migrasaun no Ázilu no lei Tráfiku Umanu hanesan medida preventiva ida iha kontekstu luta kontra tráfiku umanu iha Timor-Leste.

Ekipa investigadór no instrutór hosi Diresaun Jerál Servisu Migrasaun, servisu hamutuk ho Organizasaun Internasionál ba Migrasaun (IOM), hala’o sosializasaun bá lei Migrasaun no Ázilu no lei Tráfiku Umanu hanesan medida preventiva ida iha kontekstu luta kontra tráfiku umanu iha Timor-Leste, iha Covalima. Foto/PNTL.

Sosializasaun ne’e ho objetivu atu garante ezisténsia hosi asaun koordenada ida entre autoridade justisa, sosiedade sivíl, autoridade seguransa no komunidade iha liña fronteira, nune’e bele define polítika no estratejia nesesária sira ba prevensaun no luta ida ne’ebé efikás kontra tráfiku ba ema sira inklui promove konvensaun sira ne’ebé Timor-Leste ratifika ona.

Lee Mós: PNTL Tenke Servisu Makas Kontra Kríme Tráfiku Umanu

Sosializasaun ne’e halo iha fatin rua mak hanesan edifísiu Cruz Vermelha Santa Rosa-Covalima no ida seluk hala’o iha edifisiu PRADET Ronpe, ne’ebé lokaliza iha Suai Vila, Munisípiu Covalima.

Oradór sira mai hosi Servisu Migrasaun, PNTL-VPU no-mós ajénsia Organizasaun Nasoens Unidas (ONU), liuhosi projetu IOM.

“Matéria hirak ne’ebé oradór sira desimina maka Lei Migrasaun no Ázilu, ko’alia mós atividade sira kona-bá prevensaun no luta kontra tráfiku ba ema sira inklui programa bá fortalesimentu jestaun fronteira nasionál nian ne’ebé  apoia hosi OIM ne’ebé reflete iha área prinsipál tolu – prevensaun, prosesu kriminál sira no protesaun ba vítima sira,” Hatutan.com sita komunikadu.

Ministériu Interiór liuhosi Servisu Migrasaun rasik reafirma ona kompromisu hodi halibur esforsu nesesáriu sira hotu atu prevene no kombate tráfiku umanu no kumpri obrigasaun internasionál sira ne’ebé asume ona hosi Estadu Timor-Leste iha konstituisaun no iha Lei Prevensaun no Luta Kontra Tráfiku Umanu.

Sosializasaun ne’ebé hala’o durante loron tolu ne’e loke hosi Reprezentante Administradór Munisípiu Covalima, Afonso Nogeira no hetan partisipasaun másimu hosi Autoridade Lokál, Líder Komunitária, Autoridade Seguransa, Autoridade Justisa, Emprezáriu lokál, Sosiedade Sivíl no-mós sivitas akadémika sira.

Jornalista: Rogério Pereira Cárceres