Hatutan.com, (22 Outubru 2022), Díli—Prezidente Repúblika, José Ramos-Horta defende nesesidade atu iha konetividade aero entre Timor-Leste no Kambódia, hodi fasilita mobilidade sidadaun.

Prezidente Republika (PR), José Ramos-Horta hala’o enkontru kortejia ho entidade importante sira Kambódia nian hanesan Prezidente Senadu, Say Chhun, Prezidente Asembleia Nasionál, Heng Samrin no Primeiru-Ministru, Hun Sen, hodi ko’alia kona-bá reforsu relasaun bilaterál entre Timor-Leste (TL) ho Kambódia, Kinta (20/10/2022). Foto/Média PR.

“Akordu ne’e, bolu air service agreement ka akoordu servisu aero ne’e hanesan akordu umbrella ka sombriña. Signifika akordu jerál, atu bele dezenvolve konetividade aero, atu ita bele iha voo normál entre Kambódia ho mai Timor no Timor bá Kambódia,” Hatutan.com sita deklarasaun Xefe Estadu hafoin sai sasin ba assinatura akordu entre Ministra Negósiu Estranjeiru no Kooperasaun Adalgiza Magno ho Reiñu Kambodia, iha komunikadu.

Lee Mós: Kambódia Admira no Apoia Totalmente Adezaun TL ba ASEAN

Tuir Xefe Estadu, akordu servisu aero ne’e la signifika halo lalais kontetividade, tanba presiza halo investimentu hosi empreza Kambódia balun.

“Sira bele halo, sira sei estuda, bele ka la’e, iha sustentabilidade ka la’e, iha passajeiru ka la’e, maibé kompaña aero iha mundu, sira nia governu subsidia maka’as, tanba negósiu aero, kompaña aero, la’ós fásil,” Xefe Estadu hateten.

Estadu Timor-Leste ho Reinu Kambódia, presiza tau investimentu hodi dada interesse hosi empreza aero ruma, atu halo operasaun mensál, tanba empreza bo’ot hanesan Fly Emirates no Qatar Airway mós hetan apoiu maka’as hosi sira nia governu.

Projetu ne’e sei sai alterativu bá viajen entre Dili ba Phonom Pen no mós ba kontinente Europa no bá Xina, ho folin tikete barratu.

“Se buat sira ne’e estuda halo didi’ak, halo promosaun di’ak, passajeiru sira hosi Xina, sira mai Phonon Penn, tanba aviaun hosi Xina mai Kambódia ne’e atus ida kada loron, aviaun oi-oin, balun karga aerea, balun turista. Entaun, passajeiru hosi Xina hakarak  bá Timor, uluk liu hosi Singapura, liu hosi Bali sempre problema, bele karik mai Phonon Penn bá Timor,” Xefe Estadu esplika.

Prezidente Republika Ramos-Horta halo konsulta ho entidade barak no presiza investimentu maka’as, hodi fó estímulu ba iha seitór seluk.

Jornalista: Vito Salvadór