Hatutan.com, (04 Novembru 2022), Díli-Ministériu Agrikultura no Peska (MAP) sei  iha tinan 2023 konstrui no hadi’a irrigasaun rua ne’ebé lokaliza iha Postu Administrativu Laivai, Munisipiu Lospalos ho ida seluk iha Galata, Munisípiu Baucau.

Lee Mós : 2022, MAP Hadi’a Irrigasaun Sanulu

Irrigasaun ne’ebé kanaliza bee bá natar hektare 75 iha Aldeia Raimate, Suku Asulau-Sare, Postu Administrativu Hatulia, Munisípiu Ermera.  Foto/Dok.Hatutan.com.

Ministru Agrikultura no Peska (MAP), Pedro dos Reis, informa, iha tinan ida ne’e, konkursu públiku bá hadi’a irrigasaun boot rua ne’e MAP anunsia ona kompañia manán na’in sira, no hein de’it atu hahú sira-nia implementasaun projetu iha terrenu.

“Irrigasaun  Galata nia kustu  millaun $11 no  irrigasaun  Laivai besik millaun $8 no bá irrigasaun sira ne’ebé mak ki’ik-oan tama iha lista hotu kedas,” Ministru Agrikultura no Peska (MAP), Pedro dos Reis, hateten bá jornalista sira hafoin sorumutuk Konsellu Ministru ordináriu iha Palásiu Governu, Díli, Sesta (04/11/2022).

Ministru Pedro dos Reis, informa  irrigasaun sira ne’ebé mak aat iha 04 fulan-Abríl 2021 MAP halo ona esforsu, hadi’a ona irrigasaun balu, no balu mak hanesan tama iha konkursu públiku ona atu bele iha faze implementasaun.

“Iha Postu Administrativu Lacló, Munisípiu Manatuto, estragu barak, ita labele halo eskema irrigasaun ida  ita mesak bá halo, sé enkuantu mota halai la tuir fatin. Entaun, liña ministerial pore-ezemplu obras públika, nia bá satan lai mota ne’e halai tuir dalan maka, ita sei halo planu para hodi tula bee bá kanu irrigasaun nian,” Pedro dos Reis esplika.

MAP  haree uluk mak eskema irrigasaun ki’ik-oan sira ne’ebé mak iha liu área potensiál, sei tau hotu iha planu, tanba orsamentu bá atu hadi’a irrigasaun sira ne’e aprovadu. Maibé la’ós timor laran hotu.

Lee Mós : Irrigasaun iha Manatuto Kontinua Át Kauza Husi Kalamidade 04 Abríl 2021

Apoiu Fini Batar Bá Toos-na’in Sira

Tuir planu, iha semana balu mai oin tán MAP sei halo distribuisaun fini batar bá toos na’in sira, tanba oras ne’e TL tama ona iha tempu udan monu rai.

Distribuisaun fini ida ne’e, hanaran fini komersiál bá iha komunidade sira, no prosesu konkursu públiku  MAP loke dala-rua tiha ona. Primeiru, dokumentu sira ne’ebé mak parte kompañia sira submete falla. Entaun, nia haruka loke fila-fali tender, tanba buat hotu tenke la’o tuir nia norma ho nia regra sira mak loloos.

“Ohin ha’u hatene ona, semana ida ne’e, ami pronunsia ona bá sira ne’ebé mak atu sai manán, no sira-nia time oráriu  molok ema atu kuda sasán sira ne’e, fahe ona, tanba ita haree agora udan daudaun ona,” Pedro dos Reis hateten.

Hatán kona-bá karik distribuisaun fini komersiál ida ne’e, distribui ka fahe universalmente ka bá ema hothotu, Pedro dos Reis dehan, MAP nia polítika fahe tratór, ne’e bá de’it ema sira ne’ebé konsidera hanesan vulneravel. Tanba ne’e, fini mós fó bá iha asosiasaun sira, MAP labele fó bá ema hothotu tanba osan la to’o.

Jornalista: Rogério Pereira Cárceres