Hatutan.com, (09 Novembru 2022), Díli—Governu liu hosi Konsellu Ministru (KM) hala’o sorumutuk iha Palásiu Governu, iha Dili  aprova ona projetu Dekretu-Lei, ne’ebé aprezenta hosi Primeiru-Ministru, Taur Matan Ruak  ne’ebé halo alterasaun dahuluk ba Dekretu-Lei númeru 37/2022, loron 25 fulan-maiu, kona-bá subsídiu fim do ano ba “Uma-ka’in”, hodi klarifika ámbitu hosi ninia aplikasaun.

Reuniaun Konsellu Ministru (KM). Foto/Elio dos Santos da Costa

Ho alterasaun ne’e, benefisia sira hosi apoiu ida-ne’e maka agregadu família sira ne’ebé rejistu ona to’o loron 28 fulan-fevereiru tinan 2022, iha livru Rejistu “Uma Kain”, ne’ebé daudaun ne’e iha territóriu nasionál.

Lee Mós: Ramos-Horta Sei Husu Altera Dekretu Lei Subsídiu $200

“Agregadu família sira ne’e iha ne’ebé la iha elementu ida ne’ebé simu fulan-fulan, ho forma regulár, rendimentu sira ne’ebé mai hosi serbisu iha instituisaun públika ka entidade privada, rendimentu emprezariál, rendimentu prediál ka rendimentu sira ne’ebé hetan hosi prestasaun sosiál liuhosi rejime kontributivu, la kontributivu, ka espesiál, ne’ebé ninia valór aas liu duké $500,” Hatutan.com sita komunikadu.

Advertisement

Hodi bele simu pagamentu ne’e, reprezentante “Uma-Ka’in” ne’ebé benefisiáriu tenke subskreve deklarasaun ida hodi konfirma katak, la iha membru ida hosi Uma-Ka’in ne’e, ne’ebé regulár simu fulan-fulan, rendimentu aas liu duké dolar amerikanu 500.

Reprezentante hosi Uma-Ka’in ne’ebé subskreve deklarasaun ne’e, hatene katak saida maka deklara ne’e la loos, iha obrigasaun atu fó fila-fali valór ne’ebé simu ba Estadu, no bele hetan responsabilidade kriminál, tuir lei haruka.                                      

Jornalista: Rogério Pereira Cárceres

Advertisement