Hatutan.com, (09 Novembru 2022), Díli—Arguidu JPP ne’ebé óho matebian Aires Celestino Adelaide iha Lurumata, suku Fatuhada, postu administrativu Dom Aleixo, munsípiu Díli livre totál hosi responsabilidade kriminál tanba idade sei kiik.

Sala julgamentu TDD.

Desizaun ne’e Tribunál Distritál Díli (TDD) foti liu hosi despaixu ne’ebé hatún hosi juiz Titulár Ivan Suritai bainhira prezide julgamentu iha Kuarta (09/11/2022), MP reprezenta hosi Prokuradór Domingos Barreto no arguidu hetan asisténsia legál hosi Defensór Públiku Henrique Mariz.

Lee Mós: PNTL Detein JPP Ne’ebé Deskonfia Sona-mate Aires Celestino Adelaide

Maski iha interrogatóriu dahuluk, parte Ministériu Públiku (MP) liu hosi Prokuradór Domingos Barreto promove arguidu JPP no EFP ho krime omisídiu simples bazeia bá artigu 138 hosi Kódigu Penál Timor Leste, maibé ikus mai TDD identifika katak, JPP idade sei kiik nune’e deside liberta hosi responsabilidade kriminál.

Advertisement

Libertasaun ne’e TDD foti bazeia bá Kódigu Penál Timor Leste nian iha artigu 20 kona-bá imputibilidade iha ne’ebé arguidu idade seidauk to’o atu responsabiliza aktu krime ne’ebé nia halo.

Kona-bá ne’e parte defeza no Defensór Públiku, Henrique Marís aseita ho desizaun ne’ebé Tribunál  foti tanba ne’e Lei mak hateten.

“Ne’e Lei mak determina katak ema ne’ebé labele simu responsabilidade kriminál ne’e klaru,” Defensór Públiku, Henrique Maríz hateten iha TDD, Kuarta (09/11/2022).

Alende ne’e, TDD aplika Termu Identidade Rezidénsia (TIR) ba arguidu EFP tanba arguidu rasik la involve direta ka ajuda arguidu JPP hodi sona mate Aires Celestino Adelaide.

Kazu insidente omesídiu ne’e akontese iha Domigu (6/11/2022), maizumenus 20:30 kalan Otl, bainhira vítima Aires Celestino Adelaide halimar hamutuk ho arguidu na’in-rua iha bairu-laran.

Advertisement

Durante halimar hamutuk ne’e, arguidu JPP foti tudik hatudu halimar ba matebian Aires Celestino Adelaide nia oin, maibé derrepente arguidu JPP  ho tudik iha liman ne’e sona tebes ba matebian nia kakorok.

Hosi kazu insidente ne’e rezulta rán sai makaas iha vítima nia kakorok no família sira transporta duni bá Hospitál Nacional Guido Valadáres (HNGV) Bidau, Díli, maibé la salva nia vida.

Ho akontesimentu ne’e, Polisia Nasional Timor-Leste (PNTL), Komandu Munisípiu Díli, liuhosi Eskuadra Dom Aleixo to’o kedan iha lokál krime, hodi kaptura suspeitu sira no detein iha sela detensaun eskuadra Dom Aleixo durante oras 72.

PNTL asegura mós evidénsia hanesan tudik ne’ebé autór sira uza hodi sona iha vitima nia kakorok.

Jornalista: Rogério Pereira Cárceres

Advertisement