Hatutan.com, (05 Dezembru 2022), Díli—Saláriu désimu terseiru ka gaji ke-13  bá tinan 2022 ne’e sai polémika entre Governu ho Prezidente Repúblika (PR), José Ramos-Horta.

Lee Mós : Saláriu Désimu Terseiru, Governu dehan Prezidente Repúblika husu Halo Ajustamentu Bá Buat Balun

Prezidente Repúblika (PR) José Ramos-Horta konversa hela ho Primeiru-Ministru (PM), Taur Matan Ruak iha Vila Maumeta Munisípiu Ataúro, Segunda (21/11/2022). Foto/Dok.Hatutan

Governu mantein Lei anteriór sira iha tinan-tinan liubá atu selu saláriu désimu terseiru  ka gaji ke-13 ne’e universal bá funsionáriu públiku hotu-hotu, funsionáriu ajente administrasaun públiku hotu-hotu, asesór  sira hotu, inklui membru Parlamentu Nasionál, membru Governu  hotu no mós eis-titular  órgaun soberanu sira  hotu.

Tuir fontes Hatutan.com iha Gabinete Prezidénsia Repúblika ne’ebé rejeita atu publika nia identidade informa katak,  Prezidente Repúblika  (PR), José Ramos-Horta sei promulga duni saláriu désimu terseiru ne’e, maibé sei iha lia-menon ruma  tanba nia “la konkorda” atu  asesór nasionál ho asesór internasionál sira ne’ebé kada fulan simu saláriu boot ($1000 bá leten)  simu hotu saláriu désimu terseiru ne’e.

Liuhosi reuniaun Konsellu Ministru nian  iha loron 03 fulan-Dezembru 2022, aprova ona alterasaun bá diploma kona-bá pagamentu estraodinária bá saláriu adisionál fulan ida nian. Alterasaun ne’ebé Governu aprova, sei iha diretu bá pagamentu ne’ebé refere funsionáriu sira no ajente administrasaun públika no mós traballadór bá administrasaun públika kontratadu termu sertu ho saláriu ne’ebé ki’ik hosi $500 no ne’ebé la presta atividade profesionál iha gabinete ministerial sira.

Alterasaun bá Dekretu-Lei kona-bá subsídiu fim do ano ne’ebé baibain bolu saláriu désimu terseiru ka gaji ke-13 hosi Konsellu Ministru, hodi kategoriza bá funsionáriu públiku no ajente administrasaun nian ho saláriu $500 labele simu, hamosu kontroversu.

Kontroversu ne’e mosu hafoin Governu anunsia ofisilamente alterasaun bá Dekretu-Lei ne’e iha Kuarta foin lalais ne’e.
Iha komunikadu imprensa hosi Governu hateten katak, rezultadu hosi alterasaun ne’e Governu hakarak fó deit salariu 13 ba funsionariu administrasaun publika ho funsionariu sira ne’ebé ho kontratu termu sertu ho salariu ki’ik-liu $500.

Fontes iha Gabinete Prezidénsia Repúblika haktuir mensajen Prezidente Repúblika nian katak Prezidente Repúblika  absolutamente afavór bá saláriu désimu terseiru ka gaji ke-13, maibé la konkorda   asesór nasionál ho asesór internasionál sira simu saláriu boot mós atribui hotu saláriu désimu terseiru bá sira.  

Lee Mós : HOAX, Prezidente Repúblika Veta Saláriu Désimu Terseiru

Prezidente Repúblika, Membru Parlamentu Nasional,  membru Governu, Prezidente Tribunál Rekursu, Prokuradór Jerál Repúblika, inklui eis-titular sira, kada fulan simu saláriu boot (liu $500). Tanba ne’e, Prezidente Repúblika hanoin katak ladún refleta bá polítika poupansa tanba ema ho saláriu boot liu mós simu hotu saláriu désimu terseiru nian.

Hosi sorin seluk, Ministru Finansa, Rui Augusto Gomes, bá jornalista sira iha Palasiu Governu, Segunda (05/12/2022), esklarese katak kona-bá  polémika ne’e hodi dehan katak, iha loron 17 fulan-Novembru liubá, Governu haruka tiha ona propósta bá Prezidente Repúblika (PR), José Ramos-Horta. Propósta ida-ne’e, kada tinan sira liubá hanesan de’it, hahú kedan iha 2019, 2020 no to’o 2021 nian mós hanesan.

Iha Dekretu Lei ne’e iha 3 ko’alia kona-bá Benefisiáriu sira iha direitu bá pagamentu estraordináriu ne’e mak hanesan;

Prezidente Repúblika, Xefe Kaza Sivíl, Xefe Kaza Militár, titular kargu diresaun no kargu xefia sira ho traballadór sira hotu iha Prezidénsia Repúblika .

Prezidente Parlamentu Nasionál, Vise-Prezidente Parlamentu Nasionál , membru Parlamentu Nasionál, inklui titular sira kargu diresaun no kargu xefia ho funsionáriu hotu iha Parlamentu Nasionál .

Primeiru-Ministru ho membru Governu sira hotu, Prezidente Tribunál Rekursu, ho juis sira hotu, Prokuradór Jerál Repúblika ho nia adjuntu,  prokuradór distritál sira ho mós defensór públiku sira, Provedór Direitu Umanu no Justisa (PDHJ) ho nia adjuntu sira, titular sira ho kargu xefia no funsionáriu sira iha Komisaun Anti Korrupsaun (CAC), Inspetór Jerál Estadu, no mós eis-titular, ho eis-membru órgaun soberanu sira hotu.

Jornalista : Vito Salvadór