Hatutan.com, (06 Dezembru 2022), Díli- Prezidente Repúblika (PR), José Ramos-Horta, husu ona bá Tribunál Rekursu (TR) atu halo fiskalizasaun preventiva  bá fundu veteranu ne’ebé Governu ho Parlamentu Nasionál aprova ho montante billaun ida dólar Amerikanu (USD) iha proposta Orsamentu Jerál Estadu (OJE) 2023.

Lee Mós : Governu Fiar Prezidente Repúblika Promulga OJE 2023

Prezidente Repúblika, José Ramos-Horta. Foto/Elio dos Santos da Costa

Prezidente Repúblika, José Ramos-Horta, Segunda kalan (05/12/2022) haktuir bá jornalista sira iha Palásiu Prezidensiál Nicolau Lobato, Díli, katak OJE 2023 haruka ba Tribunál Rekursu atu halo fiskalizasaun preventiva  bá de’it fundu veteranu nian ho montante orsamentu billaun ida USD.

Bainhira Prezidente Repúblika iha dúvida balun kona-bá parte konstitusionál únika institutusaun atu bele rezolve dúvida sira ne’e mak Tribunál Rekursu.

“Jurista balun ne’ebé la’ós agora de’it desde tinan kotuk ne’eba hanesan kestióna konstituisiinalidade fundu veteranu nian entaun ha’u nu’udar Xefe Estadu, ha’u tenke haruka lai ba Tribunál Rekursu, kazu Bankada CNRT hatama kleur tiha ona ne’eduni Tribunál sei fó klarifikasaun bá ida-ne’e iha tempu badak, la afeta, no laiha impaktu bá tempu aprovasaun bá promulgasaun Orsamentu Jerál Estadu ne’e sei akontese fim do ano,” Prezidente Repúblika José Ramos-Horta hateten.

Uainhira jornalista sira husu ho razaun saida mak Prezidente Repúblika hakarak husu fiskalizasaun preventiva   bá fundu veteranu nian ne’e rasik, Ramos-Horta argumenta katak Fundu veteranu ne’e la’ós fundu ida atu hasai osan hosi fundu ne’e selu veteranu sira, fundu veteranu konforme Governu esplika  billaun ida USD atu halo investimentu ruma iha nasionál ka internasionál, investimentu ne’e bele fó retornu hanesan 3% bá billaun ida USD entaun ho retornu ne’e mak bele ajuda veteranu sira fó bolsu estudu, saúde, hadia sira nia uma, osan sei la sai tan husi OJE, no la sai husi fundu ne’eduni, sei mai husi retornu lukru reseita ne’ebé mai hosi investimentu fundu veteranu ne’e mak Governu nia intensaun, nia hanoin. Maibé Tribunál Rekursu sei haree konstituisionalidade fundu veteranu ne’e.

“Ha’u hanoin di’ak liu haruka bá Tribunál Rekursu, se Tribunál Rekursu deklara inkonstitusionalidade laiha impaktu bá OJE 2023,” Xefe Estadu ne’e afirma tan. 

Lee Mós : Prezidente Repúblika Sei Haruka Proposta OJE 2023 Bá TR Halo Fiskalizasaun Abstrata

Jornalista: Vito Salvadór