Hatutan.com, (09 Dezembru 2022), Díli—Servisu Informasaun Polísia Nasionál (SIPN) Servisu Sekreta parte Leste hamutuk ho Servisu Nasionál Intelijensia (SNI), hamutuk ho Forsa Rezerva no ekipa Patrulla Esquadra Polísia Nasionál Timor Leste (PNTL) eskuadra Kristo Rei, detein membru Grupu Arte Marsiál (GAM) hosi PSHT na’in-11 no na’in-ida seluk hosi IKS.

Servisu Informasaun Polísia Nasionál (SIPN) Servisu Sekreta parte Leste hamutuk ho Servisu Nasionál Intelijensia (SNI), hamutuk ho Forsa Rezerva no ekipa Patrulla Esquadra Polísia Nasionál Timor Leste (PNTL) eskuadra Kristo Rei, detein membru Grupu Arte Marsiál (GAM) hosi PSHT na’in-11 no na’in-ida seluk hosi IKS. Foto/PNTL.

Membru GAM hirak ne’e viola Lei númeru 5/2017, pratika Arma Branka ne’ebé defini iha artigu 2 númeru 1 ko’alia kona-bá katana, espada no rama ambon, iha aldeia Kakeu-Laran, Suku Becora, Postu-Administrativu Kristo-Rei, Munisípiu Díli.

Lee Mós: Joven Na’in-rua Uza Farda Arte Marsiál “Asalta” Membru PNTL

PNTL halo kapturasaun ba joven hirak ne’e iha tuku 11:50 Kinta kalan, tanba iha tendénsia atu ataka malu entre joven no iha fatin akontesimentu ekipa asegura mós sasan kro’at sira hanesan katana tipu samurai-1, maubeka naruk-1, tudik-2, besi kanu-1, tizoura tesi besi-1, besi beton 12 mili-1 fiska-3 ho kedan besi beton ne’ebé tesi badak ona inklui fatuk hodi lansa iha fiska iha pasta ida nia laran.

Advertisement

Tuir deklarasaun hosi reprezentante Grupu Arte Marsiais PSHT ne’ebe hetan kapturasaun, katak nia koñese di’ak suspeitu na’in 10 ne’ebé mak hamutuk ho joven balun mai hosi bairru seluk tuda uma no sira ne’e hosi organizasaun Arte Ritual 77 ne’ebé akontese kalan-kalan hahú kedan iha loron Segunda to’o agora.

“Kona-bá kazu ne’e, sira informa ona suspeitu sira nia naran ba PNTL Eskuadra Kristo Rei no ohin kalan kontinua tuda tan fali sira tanba ne’e sira sai ho sasan kro’at,” Hatutan.com sita komunikadu.

Sasan kro’at ne’ebé Membru GAM utiliza iha Kristu Rei. Foto/PNTL.

Relasiona ho Arma Branca ne’ebé mak sira lori, reprezentante ne’e hateten katak sasan kro’at ne’e sira prepara de’it atu salva sira nia an karik Grupu 77 sira ba ataka iha sira nia bairru laran, nune’e sira iha biban halo atake hasoru.

Hafoin rona deklarasaun hirak ne’e, ekipa halo prevensaun asegura kedan joven hirak ne’e ho sasan kro;at sira no lori ba Eskuadra PNTL Kristo Rei hodi halo prosesu identifikasaun no kontinua halo auto entrega ba Servisu Investigasaun Kriminál iha Komandu PNTL Munisipiu Dili no halo detensaun durante oras 12 no sei kontinua halo prosesu investigasaun.

Jornalista: Rogério Pereira Cárceres

Advertisement