Hatutan.com, (16 Dezembru 2022), Díli—Prezidente Repúblika (PR), José Ramos-Horta preokupa ho rekrutamentu brigada sira ba órgaun eleitorál hanesan Comissão Nacional das Eleições (CNE) ho Sekretariadu Tékniku Administrasaun Eleitorál (STAE).

CNE ho STAE atualiza preparasaun bá eleisaun Parlamentár tinan 2023, bá Prezidente Repúblik, José Ramos-Horta iha Palasiu Prezidensiál, Sesta (16/12/2022).

Preokupasaun ne’e Xefe Estadu hato’o bainhira líder másimu hosi CNE ho STAE atualiza preparasaun bá eleisaun Parlamentár tinan 2023, iha Palasiu Prezidensiál, Sesta (16/12/2022).

Lee Mós: CNE Preparadu Organiza Eleisaun Parlamentár 2023

Prezidente CNE, José Agostinho Belo hateten kona-bá rekrutamentu ba brigade, Prezidente Repúblika mós kestióna no CNE sente katak iha duni buat balun ne’ebé hosi baze mós kestiona.

“Ita presiza hadi’a no ami sente katak hanesan órgaun eleitorál CNE ho STAE tenta buka forma di’ak atu eleisaun ne’e aseguru no ema nia fiar ba órgaun rua ne’e metin nafatin. Timoroan tenke hamutuk tanba ne’e mak ami servisu ho onestidae no servisu ho parte hotu-hotu ba eleisaun nian,” José Agostinho Belo hateten, hafoin hasoru-malu ho Prezidente Repúblika.

Iha sorumutu ne’e parte CNE ho STAE hato’o liu-liu kona-bá preparasaun ne’ebé iha hanesan halo hela edukasaun sivika, enkontru komunidade ne’ebé iha no halo avaliasaun nasionál ne’ebé CNE halo hodi haree ba eleisaun sira ne’ebé liu bá saida mak presiza hadi’a no ida ne’ebé di’ak ona tenke halo di’ak liu tán inklui halo supervizaun ba servisu tomak ne’ebé CNE no STAE halo no rekrutamentu ba ofisiál sira hodi garante eleisaun Parlamentár.

Iha mós reuniaun ho partidu polítiku sira atu oinsá bele garante no estabilidade ho ida ne’e mak Xefe Estadu konvida CNE no STAE hodi husu kona-bá preparasaun.

“Ami nia preparasaun másimu ona, ami hein de’it bainhira mak Xefe Estadu tuir Konstitusaun iha kompeténsia atu fó sai no marka data ba eleisaun. Ba órgaun eleitorál hanesan CNE no STAE ami preparadu atu realiza eleisaun,” nia hateten.

Prezidente CNE hatutan Resensiamentu ne’e obrigatóriu, antes eleisaun tenke halo resenseamentu tanba ne’e servisu ne’ebé STAE halo liga ho resenseamentu la’o hela no foin taka iha 30 Novembru 2022.

CNE mós superviziona no hanoin katak iha Janeiru 2023 sei kontinua nune’e eleitór sira ne’ebé atu troka hela fatin nune’e mós ba estudante sira no joven sira iha estrajeiru ne’e bele reajusta sira nia dadus atu nune’e labele lakon sira nia direitu votu.

Resensiamentu refere sei halo mós estudante sira ne’ebé foin mak atinji idade 17 atu nune’e iha eleisaun 2023 sidadaun hotu-hotu ne’ebé tinan to’o ona idade 17 bele partisipa iha eleisaun hodi fó sira nia votu.

Nune’e mós Diretór Jerál Interinu STAE, Leonardo Amarál hateten rekrutamentu ba ofisiál eleitorál sira tuir Funsaun Públika transparante tanba STAE halo rekrutamentu bazeia ba saida mak Funsaun Públika husu hanesan prosesu fó sai avizu, simu aplikante ho dokumentu, hosi ne’ebá aplika mós prova eskrita no orál, atu bele hetan kandidatu ida kualifikadu nune’e hanoin katak durante ne’e transparansia hela.

Iha tempu badak STAE sei atualiza baze de dadus ba públiku atu hotu-hotu iha serteza  ba númeru eleitorál óbitu hira no eleitor sira ne’ebé sei partisipa iha eleisaun Parlamentár tinan 2023, no atualizasaun baze de dadus ne’ebé STAE sei fó sai to’o 30 Novembru tinan 2022.

Jornalista: Vito Salvadór