Hatutan.com, (20 Dezembru 2022), Díli—Reprezentante estudante hosi Eskola Sekundária Tékniku Vokasionál (ESTV) Munisipiu Aileu-Vila, Carla Maria Mendonça sai manán na’in dahuluk iha kompetisaun diskursu públiku nível nasionál.

Estudante Eskola Sekundáriu Tékniku Vokasionál Aileu-Vila ho Eskola Sekundáriu Tékniku Vokasionál Ernesto Fernandes Dudu Ermera Gleno, ho diretora Fórum Tau Matan (FTM) no ekipa Júri ba kompetisaun diskursu Públiku iha salaun Fundasaun Oriente, Suku Gricenford, Postu Administrativu Na’in-Feto, Munisipiu Dili, Segunda (19/12/2022).

Eventu ne’e organiza hosi organizasaun sosiedade sívil, Fórum Tau Matan (FTM) iha salaun Fundasaun Oriente, Suku Gricenford, Postu Administrativu Na’in-Feto, Munisípiu Díli no hetan apoiu fundu hosi Gabinete Primeiru Ministru (PM) bá asuntu Serviço de Apoio á Sociedade Civil e Auditória Social (SASCAS).

Lee Mós: Influensia Teknolojia Komunikasaun bá Estilu Moris Sosiedade Ohin Loron

Totál estudante Eskola Sekunária Tékniku Vokasionál (ESTV) ne’ebé selesionadu hodi partisipa iha diskursu públiku nível nasionál ne’e hamutuk na’in-sia.

Hosi ESTV Ernesto Fernandes “Dudu” Gleno-Ermera, reprezenta hosi estudante na’in-haat, Alexandre Martins nia tópiku diskursu maka “Juventude Pasadu mak Determina destinu nasaun Timor-Leste, no Juventude prezente mak autór bá dezenvolvimentu nasionál”.

Constantino Soares dos Santos, “Papél foinsa’e hodi Kontribui bá Kresimentu iha Timor-Leste”. Adriana Soibere Brites, “Partisipasaun iha Dezenvolvimentu Nasionál”, no  estudante Tiago Soares Casimiro nia tema aprezentasaun maka “Edukasaun Transformativu”.

Hosi ESTV Munisipiu Aileu, reprezenta hosi estudante na’in-lima (5) mak hanesan Melinha de Jesus ho tópiku, “Papél Juventude”. Carla Maria Mendonça “Prevene Isin-rua Sedu no Kaben Sedu”. Josefina Susanty hato’o kona-bá “Meiu Ambiente”, Josefina de Jesus Madeira aprezenta kona-bá “Importánsia Edukasaun” no Idelfonso Tilman Soares nia temátiku maka “Apoiu Agrikultura”.

Durante aprezentasaun, kompetitór sira hetan julga ka avalia hosi juri hamutuk na’in-tolu mak hanesan, Juli da Silva, José Raúl ho Monaliza Barreto.

Hafoin rona aprezentasaun, rezultadu hosi juri sira fó sai katak estudante na’in-haat (4) mak selesionadu hanesan manán na’in bá iha kompetisaun diskursu públiku ne’e.

Manan na’in sira hosi Eskola Sekundáriu Tékniku Vokasionál Aileu-Vila ho Eskola Sekundáriu Tékniku Vokasionál Ernesto Fernandes Dudu Ermera Gleno iha kompetisaun diskursu Públiku ne’ebé hala’o salaun Fundasaun Oriente, Suku Gricenford, Postu Administrativu Na’in-Feto, Munisipiu Dili, Segunda (19/12/2022).

Primeiru lugár, Carla Maria Mendonça ho ninia pontus (90), segundu-lugár Constantino Soares dos Santos ho valór (89), terseiru-lugar okupa hosi Adriana Soibere Brites ho pontu (88,5) no Tiago Soares Casimiro okupa kuartu-lugár ho ninia pontu 87.

Reprezentante Ekipa Juri ka julgadór, Juli da Silva, hateten, rezultadu kompetisaun diskursu hosi estudante sira ne’e tanba iha aprezentasaun ne’e haree liubá pontu importante tolu mak hanesan, matéria, jestaun no métodu.

“Kada juri ho ninia pontus. Nune’e, hosi pontus ne’ebé mak ami fó bá iha aprezentadór sira. Entaun ami soma hamutuk hetan rezultadu ida-ne’e,” Juli da Silva hateten durante anúnsia rezultadu finál diskursu iha salaun Fundasaun Oriente, Suku Gricenford, Postu Administrativu Na’in-Feto, Munisipiu Dili, Segunda (19/12/2022).

Rezultadu valór ne’ebé mak juri ida-idak fó, mai hosi rezultadu aprezentasaun estudante sira nian iha diskursu, ligadu ho matéria, métódu nomós maneira aprezentasaun nian.

Manán na’in dahuluk, Carla Maria Mendonça espresa sentimentu ksolok tanba bele hetan primeiru lugár iha kompetisaun diskursu ne’e.

Kona-bá ninia preparasaun hosi inisiu mai to’o iha faze kompetisaun ne’e, ladun másimu, tanba durante ne’e sira mós hasoru hela ezame finál iha eskola, nune’e tenke konsentra liu bá ezame.   

Carla Maria Mendonça promete, bá oin sei esforsa nafatin liuhosi halo preparasaun di’ak liután, nune’e bele partisipa iha kompetisaun diskursu sira  iha futuru.

Manán na’in daruak, hosi eskola Sekundáriu Tékniku Vokasional (ESTV) Ernesto Fernandes “Dudu” Ermera-Gleno, Costantino Soares dos Santos, konsidera loron 19 fulan dezembru, nu’udár loron ida importante tebes bá nia, tanba okupa pozisaun iha segundu lugár iha diskursu públiku.

“Momentu ida importante loos no previléjiu bá ha’u tanba hetan segundu lugár,” Costantino Soares dos Santos hateten.

Manán na’in datoluk, hosi Eskola Sekundária Tékniku Vokasional (ESTV), Ernesto Fernandes “Dudu”, Gleono-Ermera, Adriana Brites sente animadu tebes ho atividade kompetisaun diskursu públiku ne’ebé mak organiza hosi ekipa SASCAS no Forum Tau Matan (FTM).

“Hanesan juventude feto ida, ha’u sente apresia loos bá atividade ne’ebé ohin ami mai kompete ho eskola Aileu no ami Ermera,” Adriana Brites hateten.

Tiágo Soares Casimiro, ne’ebé mak sai manán na’in bá dahaat mós hosi ESTV, Ernesto Fernandes “Dudu” Gleono-Ermera expresa sentimentu ksolok tanba iha kompetisaun diskursu ne’e nia bele okupa kuartu-lugár, kompara ho nia kolega sira seluk ne’ebé ‘seidauk’ iha sorte atu manán.

Diretora FTM, Eduarda Martins Gonçalves rekoñese katak, preparasaun sira hotu hosi inisiu, la’ós FTM mesak mak organiza, maibé serbisu hamutuk ho eskola rua ESTV Aileu Villa ho ESTV Ernesto Fernandes “Dudu” Gleno-Ermera, oinsá bele halo selesaun bá estudante sira, hodi partisipa iha FTM nia formasaun, molok tama to’o iha faze kompetisaun diskursu públiku programa ida ne’e.

Molok ne’e, FTM halo uluk formasaun durante loron rua bá estudante sira iha ESTV Aileu Vila no loron rua iha ESTV Gleno-Ermera.

Haoin formasaun, ekipa sira FTM nian hamutuk ho diretór eskola sira halo selesaun bá estudante hirak ne’ebé mak bele reprezenta ninia eskola, hodi partisipa iha diskursu públiku ne’e.

“Hosi ne’ebá, sira nia preparasaun, la’os de’it fahe matéria kona-bá jestaun orsamentu, planu negósiu lideransa, maibé oinsá atu lori estudante sira bele iha abilidade ko’alia iha públiku,” Eduarda Martins Gonçalves, hateten.

Razaun FTM hakarak foku uluk bá estudante ESTV tanba tuir rezultadu peskiza ne’ebé ekipa peskizadór sira FTM nian ho Rede Edukasaun TLC halo hatudu katak, maioria eskola tékniku vokasionál iha Timor laran, barak mak hasoru problema kona-bá matéria, fasilidade no ekipamentu sira bá iha prátika.

Alende ne’e, bá estudante ka juventude sira ne’ebé maka nia familia ekonómia la sufisiente, bele utiliza matéria ne’ebé matéria sira mak hetan iha formasaun bá diskursu públiku ne’e, sai nu’udár bukae ida bá sira bele kria rasik kampu traballu bá aan, liuhosi halo negósiu ki’ik oan ruma iha sira nia komunidade.

FTM eskolla ESTV Aileu Villa ho ESTV Ernestu Fernandes “Dudu” Gleno-Ermera ne’e, sai nu’udár projetu pilótu ida. Tanba ne’e, planu bá oin, sei lori mós estudante sira hosi munisipiu seluk ho RAEOA, atu partisipa mós iha eventu ne’ebé mak hanesan.

Ho projetu pilótu ida ne’e sai hanesan sasukat bá ekipa FTM atu haree no avalia kualidade eskola tékniku vokasional sira ne’ebé mak Governu liuhosi Ministériu Edukasaun Juventude no Desportu (MEJD) estabelese iha munisipiu sira, nia kualidade iha ka la’e, diferensa ne’e iha ne’ebé no sira nia problema saida de’it estudante ESTV sira hasoru iha eskola.

Jornalista: Rogério Pereira Cárceres/Elio dos Santos da Costa